ឧបនាយករដ្ឋមន្ដ្រី នេត សាវឿន ទទួលជួបសម្ដែងការគួរសម និងពិភាក្សាការងារជាមួយអនុរដ្ឋមន្ដ្រីក្រសួងការបរទេសវៀតណាម, និងត្រៀមសម្របសម្រួលដំណើរទស្សនកិច្ចរបស់នាយករដ្ឋមន្ត្រីវៀតណាមថ្មី

ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន នៅរសៀលថ្ងៃទី២៨ ខែកញ្ញា ឆ្នាំ២០២៦ បានទទួលជួបសម្ដែងការគួរសម និងពិភាក្សាការងារជាមួយឯកឧត្តម ង្វៀន ម៉ាញ គឿង អនុរដ្ឋមន្ត្រីក្រសួងការបរទេសវៀតណាម ក្នុងឱកាសដែលភាគីវៀតណាមកំពុងត្រៀមរៀបចំដំណើរទស្សនកិច្ចរបស់ឯកឧត្តម ឡេ មិញ ហ៊ឹង នាយករដ្ឋមន្ត្រីថ្មីរបស់វៀតណាម មកកាន់កម្ពុជា ពីថ្ងៃទី៩-១០ ខែតុលា ឆ្នាំ២០២៦ ខាងមុខ។

ក្នុងជំនួបនេះ ឯកឧត្តម ង្វៀន ម៉ាញ គឿង បានជម្រាបថា ដំណើរទស្សនកិច្ចនេះ គឺជាដំណើរទស្សនកិច្ចក្រៅប្រទេសលើកដំបូងរបស់នាយករដ្ឋមន្ត្រី ឡេ មិញ ហ៊ឹង បន្ទាប់ពីត្រូវបានជ្រើសតាំងជានាយករដ្ឋមន្ត្រីថ្មីរបស់វៀតណាម ដែលបង្ហាញពីសារៈសំខាន់នៃទំនាក់ទំនង និងកិច្ចសហប្រតិបត្តិការរវាងកម្ពុជា និងវៀតណាម។

ជាការឆ្លើយតប ឯកឧត្តមសន្តិបណ្ឌិត នេត សាវឿន បានបញ្ជាក់ថា កម្ពុជានឹងត្រៀមជានិច្ច និងសម្របសម្រួលតាមការចាំបាច់ ដើម្បីធានាឱ្យដំណើរទស្សនកិច្ចរបស់នាយករដ្ឋមន្ត្រីវៀតណាម ប្រព្រឹត្តទៅដោយរលូន និងទទួលបានលទ្ធផលផ្លែផ្កាសម្រាប់ប្រទេសទាំងពីរ។
ភាគីទាំងពីរក៏បានរំលឹកពីទំនាក់ទំនង និងកិច្ចសហប្រតិបត្តិការដ៏ស្អិតរមួតរវាងកម្ពុជា-វៀតណាម លើវិស័យការពារជាតិ សន្តិសុខ និងសេដ្ឋកិច្ច-សង្គម ព្រមទាំងបានពិភាក្សាអំពីការត្រៀមរៀបចំពិធីអបអរសាទរខួបលើកទី៦០ នៃទំនាក់ទំនងកម្ពុជា-វៀតណាម នាពេលខាងមុខ។