វេទិកាសាធារណៈនៅឃុំដំណាក់រាំង បន្តស្តាប់បញ្ហាពីមូលដ្ឋាន និងស្វែងរកដំណោះស្រាយជាក់ស្តែងជូនប្រជាពលរដ្ឋ

លោកជំទាវ ឈី វិជ្ជរ៉ា រដ្ឋលេខាធិការក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមុនីជ័យ ដោយមានការចូលរួមពីឯកឧត្តម ឈួរ សុបញ្ញា រដ្ឋលេខាធិការក្រសួងធម្មការ និងសាសនា បានអញ្ជើញចូលរួមវេទិកាសាធារណៈថ្នាក់ឃុំ និងថ្នាក់ដឹកនាំក្រុមការងាររាជរដ្ឋាភិបាល អាជ្ញាធរមូលដ្ឋាន មន្ត្រីជំនាញ ព្រះសង្ឃ និងប្រជាពលរដ្ឋ សរុបប្រមាណ ២០០អង្គ/នាក់នៅបរិវេណវត្តអារាមធម្មបញ្ញាមហាព្រហ្ម ឃុំដំណាក់រាំង ស្រុកសាមគ្គីមុនីជ័យ ខេត្តកំពង់ស្ពឺ។វេទិកាសាធារណៈនេះ រៀបចំឡើងក្នុងគោលបំណងបន្តបង្កើនភាពជិតស្និទ្ធរវាងក្រុមការងាររាជរដ្ឋាភិបាល អាជ្ញាធរ មន្ត្រីជំនាញ និងប្រជាពលរដ្ឋ តាមរយៈការស្តាប់ដោយផ្ទាល់នូវមតិយោបល់ សំណូមពរ កង្វល់ និងបញ្ហាប្រឈមនានាដែលប្រជាពលរដ្ឋកំពុងជួបប្រទះនៅមូលដ្ឋាន ដើម្បីរួមគ្នាពិភាក្សា ស្វែងរកដំណោះស្រាយសមស្របតាមសមត្ថកិច្ច និងជំរុញការផ្តល់សេវាសាធារណៈឱ្យកាន់តែមានប្រសិទ្ធភាព និងឆ្លើយតបតាមតម្រូវការជាក់ស្តែង។

ក្នុងឱកាសនោះ ប្រជាពលរដ្ឋបានចូលរួមយ៉ាងសកម្ម ដោយបានលើកឡើងនូវមតិយោបល់ សំណូមពរ និងបញ្ហាប្រឈមមួយចំនួន ពាក់ព័ន្ធនឹងជីវភាពរស់នៅ ការផ្តល់សេវាសាធារណៈ ហេដ្ឋារចនាសម្ព័ន្ធ ការគ្រប់គ្រង និងប្រើប្រាស់ធនធានទឹក សន្តិសុខ សណ្តាប់ធ្នាប់ និងបញ្ហាប្រឈមផ្សេងៗនៅក្នុងសហគមន៍។ ទន្ទឹមនឹងការលើកឡើងពីបញ្ហា ប្រជាពលរដ្ឋក៏បានស្នើឱ្យអាជ្ញាធរ និងមន្ត្រីជំនាញពាក់ព័ន្ធបន្តយកចិត្តទុកដាក់ ពិនិត្យ និងស្វែងរកដំណោះស្រាយឱ្យបានសមស្របទៅតាមស្ថានភាព និងលទ្ធភាពជាក់ស្តែង។

ឯកឧត្តម ឈួរ សុបញ្ញា បានលើកឡើងថា វេទិកាសាធារណៈ គឺជាស្ពានដ៏សំខាន់សម្រាប់ផ្សារភ្ជាប់រវាងប្រជាពលរដ្ឋ និងស្ថាប័នរដ្ឋ ព្រោះការអភិវឌ្ឍមូលដ្ឋានឱ្យមានប្រសិទ្ធភាព និងចំគោលដៅ ត្រូវចាប់ផ្តើមពីការស្តាប់ឱ្យបានច្បាស់នូវបញ្ហាពិតប្រាកដ និងតម្រូវការពិតប្រាកដរបស់ប្រជាពលរដ្ឋ។ ឯកឧត្តមបានបញ្ជាក់ថា ការងារមូលដ្ឋានមិនមែនជាកាតព្វកិច្ចរបស់អាជ្ញាធរ ឬស្ថាប័នណាមួយតែឯងនោះទេ ប៉ុន្តែត្រូវការការចូលរួម និងកិច្ចសហការពីគ្រប់ភាគី រួមមាន ស្ថាប័នរដ្ឋ អាជ្ញាធរមូលដ្ឋាន មន្ត្រីជំនាញ ព្រះសង្ឃ សហគមន៍ និងប្រជាពលរដ្ឋ។ ក្នុងន័យនេះ ការស្តាប់មតិរបស់ប្រជាពលរដ្ឋត្រូវផ្សារភ្ជាប់ជាមួយការទទួលខុសត្រូវ ការតាមដាន និងការឆ្លើយតប ដើម្បីប្រែក្លាយសំណូមពរទៅជាដំណោះស្រាយជាក់ស្តែង។ ឯកឧត្តម ឈួរ សុបញ្ញា ក៏បានលើកឡើងពីសារៈសំខាន់នៃវត្តអារាមក្នុងសង្គមខ្មែរ ដែលក្រៅពីជាទីកន្លែងសម្រាប់ប្រតិបត្តិព្រះពុទ្ធសាសនា និងបណ្តុះសីលធម៌ហើយនោះ វត្តអារាមក៏ជាទីប្រជុំជន និងជាផ្នែកមួយនៃសហគមន៍ ដែលអាចរួមចំណែកក្នុងការលើកកម្ពស់សាមគ្គីភាព ការអប់រំ ការចែករំលែក និងការចូលរួមដោះស្រាយបញ្ហាសង្គមនៅមូលដ្ឋាន។

ដោយឡែក លោកអភិបាលរងស្រុកសាមគ្គីមុនីជ័យ បានជម្រាបជូនអង្គវេទិកាអំពីការងាររបស់រដ្ឋបាលស្រុក និងវិធានការឆ្លើយតបចំពោះបញ្ហាប្រឈមរបស់ប្រជាពលរដ្ឋ។ លោកបានបញ្ជាក់ថា រាល់សំណូមពរដែលស្ថិតក្នុងសមត្ថកិច្ចរបស់រដ្ឋបាលស្រុក នឹងត្រូវពិនិត្យ និងបន្តដោះស្រាយទៅតាមលទ្ធភាពជាក់ស្តែង ខណៈបញ្ហាដែលលើសពីសមត្ថកិច្ច នឹងត្រូវសម្របសម្រួល និងបញ្ជូនទៅស្ថាប័នជំនាញពាក់ព័ន្ធ ដើម្បីពិនិត្យ និងស្វែងរកដំណោះស្រាយបន្ត។

លោកជំទាវ ឈី វិជ្ជរ៉ា បានវាយតម្លៃខ្ពស់ចំពោះការចូលរួមរបស់ប្រជាពលរដ្ឋ ក្រុមការងារ អាជ្ញាធរ និងមន្ត្រីជំនាញ ដែលបានចូលរួមពិភាក្សាដោយបើកចំហ និងក្នុងស្មារតីស្ថាបនា។ លោកជំទាវបានគូសបញ្ជាក់ថា វេទិកាសាធារណៈមិនមែនគ្រាន់តែជាកន្លែងទទួលស្តាប់សំណូមពរនោះទេ ប៉ុន្តែជាយន្តការសម្រាប់ធ្វើឱ្យការងាររបស់រដ្ឋកាន់តែខិតជិតប្រជាពលរដ្ឋ និងធ្វើឱ្យការឆ្លើយតបរបស់អាជ្ញាធរកាន់តែចំតម្រូវការជាក់ស្តែង។ លោកជំទាវបានណែនាំដល់អាជ្ញាធរ និងមន្ត្រីជំនាញពាក់ព័ន្ធ ត្រូវកត់ត្រា ចាត់ថ្នាក់ និងពិនិត្យរាល់បញ្ហា និងសំណូមពរដែលបានលើកឡើង ដោយបញ្ហាណាដែលអាចដោះស្រាយបាននៅមូលដ្ឋាន ត្រូវខិតខំដោះស្រាយឱ្យបានទាន់ពេលវេលា ខណៈបញ្ហាដែលលើសពីសមត្ថកិច្ច ត្រូវបន្តរាយការណ៍ និងសម្របសម្រួលទៅថ្នាក់ ឬស្ថាប័នពាក់ព័ន្ធ។ ទន្ទឹមនឹងនេះ ត្រូវមានការតាមដានលទ្ធផល និងផ្តល់ព័ត៌មានត្រឡប់ទៅប្រជាពលរដ្ឋវិញ ដើម្បីធានាថា សំណូមពររបស់ប្រជាពលរដ្ឋត្រូវបានស្តាប់ បញ្ហាត្រូវបានយកចិត្តទុកដាក់ និងដំណោះស្រាយត្រូវបានជំរុញទៅតាមសមត្ថកិច្ច និងលទ្ធភាពជាក់ស្តែង។

ជារួម វេទិកាសាធារណៈនៅឃុំដំណាក់រាំង បានប្រព្រឹត្តទៅក្នុងបរិយាកាសស្និទ្ធស្នាល បើកចំហ និងប្រកបដោយស្មារតីស្ថាបនា ដោយប្រជាពលរដ្ឋមានឱកាសបញ្ចេញមតិដោយផ្ទាល់ ខណៈក្រុមការងារ អាជ្ញាធរ និងមន្ត្រីជំនាញបានស្តាប់ បកស្រាយ និងឆ្លើយតបតាមសមត្ថកិច្ច។ វេទិកានេះក៏បានរួមចំណែកពង្រឹងទំនុកចិត្ត និងកិច្ចសហការរវាងរដ្ឋ និងប្រជាពលរដ្ឋ ព្រមទាំងជំរុញការគ្រប់គ្រងមូលដ្ឋានឱ្យកាន់តែមានការចូលរួម និងឆ្លើយតបចំពោះតម្រូវការជាក់ស្តែងរបស់ប្រជាពលរដ្ឋ។