ក្រសួងកសិកម្ម និង IFAD ជំរុញការពង្រីកសេវាឌីជីថល ដើម្បីលើកកម្ពស់ផលិតភាព និងពង្រីកទីផ្សារកសិផលរបស់កសិករ
(ភ្នំពេញ)៖ ក្រសួងកសិកម្ម រុក្ខាប្រមាញ់ និងនេសាទ និងមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) បានជំរុញការពង្រីកសេវាឌីជីថលនៅកម្រិតសហគមន៍កសិកម្ម ដើម្បីពង្រឹងសមត្ថភាពកសិករក្នុងការប្រើប្រាស់បច្ចេកវិទ្យា បង្កើនផលិតភាព និងស្វែងរកទីផ្សារសម្រាប់ផលិតផលកសិកម្មឱ្យកាន់តែមានប្រសិទ្ធភាព ស្របតាមទិសដៅទំនើបកម្មវិស័យកសិកម្មនៅកម្ពុជា។
ថ្លែងក្នុងសិក្ខាសាលាស្តីពីការផ្លាស់ប្តូរពីសកម្មភាពសាកល្បង ទៅកាន់ការផ្តល់សេវាឌីជីថលកម្រិតសហគមន៍កសិកម្មប្រកបដោយនិរន្តរភាព និងមានលក្ខណៈជាស្ថាប័ន នៅរាជធានីភ្នំពេញ នាថ្ងៃទី៣០ ខែតុលា ឆ្នាំ២០២៦ ឯកឧត្តមបណ្ឌិត មាស ពិសិដ្ឋ ជា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) បានគូសបញ្ជាក់ពីសារៈសំខាន់នៃការបញ្ជ្រាបចំណេះដឹងឌីជីថលដល់កសិករ ដើម្បីឱ្យពួកគាត់អាចសម្របខ្លួនទៅនឹងការវិវត្តនៃបច្ចេកវិទ្យា និងទាញយកអត្ថប្រយោជន៍ពីឱកាសទីផ្សារថ្មីៗ។
ឯកឧត្តមបណ្ឌិតបានមានប្រសាសន៍ថា៖«យើងត្រូវតែជួយប្រជាពលរដ្ឋ ជាពិសេសកសិកររបស់យើង ឱ្យមានចំណេះដឹងផ្នែកបច្ចេកវិទ្យាឌីជីថល ដើម្បីឱ្យពួកគាត់អាចដើរទាន់ការវិវត្តនៃបច្ចេកវិទ្យាដែលកំពុងមានការរីកចម្រើនយ៉ាងឆាប់រហ័ស។ ប្រព័ន្ធបច្ចេកវិទ្យាអាចជួយសម្រួលដល់កសិករក្នុងការស្វែងរកទីផ្សារ និងលក់ផលិតផលកសិកម្ម តាមរយៈការផ្សព្វផ្សាយព័ត៌មានអំពីផលិតផលរបស់ពួកគាត់ទៅកាន់អ្នកទិញដែលមានតម្រូវការ»។
ឯកឧត្តមបានបន្ថែមថា ការប្រើប្រាស់បច្ចេកវិទ្យាឌីជីថលក៏អាចជួយឱ្យកសិករទទួលបានចំណេះដឹង និងជំនាញបច្ចេកទេសថ្មីៗ ពាក់ព័ន្ធនឹងការដាំដុះ ការថែទាំដំណាំ និងការប្រមូលផល ដើម្បីបង្កើនទិន្នផល និងលើកកម្ពស់គុណភាពផលិតផល ដោយមិនចាំបាច់ពង្រីកផ្ទៃដីស្រែចម្ការដែលពួកគាត់កំពុងប្រើប្រាស់នោះឡើយ។
ជាមួយគ្នានេះ លោក Frew Behabtu នាយក IFAD ប្រចាំកម្ពុជា បានថ្លែងអំណរគុណចំពោះដៃគូអភិវឌ្ឍន៍ អង្គការដៃគូ សហករណ៍កសិកម្ម និងក្រសួងស្ថាប័នពាក់ព័ន្ធ ដែលបានចូលរួមគាំទ្រការអនុវត្តសកម្មភាពផ្លាស់ប្តូរបទពិសោធន៍នៅតាមមូលដ្ឋាន និងការបន្តជំរុញការអភិវឌ្ឍសេវាកម្មឌីជីថលសម្រាប់កសិករ។
លោកបានលើកឡើងថា ការជំរុញបេសកកម្មនេះស្របទៅនឹង «យុទ្ធសាស្ត្របញ្ចកោណ» របស់រាជរដ្ឋាភិបាល និងរបៀបវារៈទំនើបកម្មវិស័យកសិកម្ម។ ជាពិសេស ការពង្រីកវិសាលភាពរបស់កម្មវិធី ASPIRE-AT ទៅកាន់សហគមន៍កសិកម្មទំនើបចំនួន ៥០ នឹងជួយបង្កើនការតភ្ជាប់រវាងសហករណ៍កសិកម្មជាមួយប្រភពហិរញ្ញវត្ថុ សេវាប្រមូលផ្តុំផលិតផល ការកែច្នៃ ការតាមដានប្រភពដើមផលិតផល និងទីផ្សារ។
យោងតាមលទ្ធផលនៃគម្រោង SEEDS ក្នុងអំឡុងឆ្នាំ២០២៤-២០២៥ គម្រោងនេះបានផ្តល់អត្ថប្រយោជន៍ដល់កសិករខ្នាតតូចនៅតាមជនបទចំនួន ១២.០៣៤នាក់ នៅទូទាំងតំបន់ ក្នុងនោះមានសមាជិកសហករណ៍កសិកម្មចំនួន ៥.០៣៧នាក់ មកពីសហករណ៍កសិកម្មចំនួន ៨នៅកម្ពុជា។
ក្នុងការអនុវត្ត គម្រោងបានបង្កើត និងគាំទ្រក្រុមអ្នកដឹកនាំផ្នែកកសិកម្មឌីជីថល (Digital Agriculture Arrowheads – DAA) ដែលភាគច្រើនជាស្ត្រី និងយុវជនឱ្យដើរតួនាទីជាគ្រូបង្គោល និងអ្នកណែនាំនៅក្នុងសហគមន៍ ដើម្បីជួយកសិកររៀនប្រើប្រាស់ឧបករណ៍ និងកម្មវិធីឌីជីថលដែលសមស្របនឹងតម្រូវការជាក់ស្តែងនៅមូលដ្ឋាន។ ក្នុងនោះ កម្មវិធីទូរស័ព្ទ «ចម្ការ» (Chamka) របស់កម្ពុជា ក៏បានចូលរួមគាំទ្រដល់ការគ្រប់គ្រងផលិតកម្ម និងការស្វែងរកទីផ្សារផលិតផលកសិកម្មផងដែរ៕
