រដ្ឋមន្រ្តីសុខាភិបាល៖ «បានគូសរំលេចលើកយកស្ថានភាពថ្មីដែលស្មុគស្មាញ ផ្តោតលើកត្តាបម្រែបម្រួល និងកត្តាប្រឈម សម្រាប់អនាគតសុខភាពប្រជាជន»។

រាជធានីភ្នំពេញ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍យ៉ាងដូច្នេះនៅក្នុងឱកាសឯកឧត្តមអញ្ជើញដឹកនាំកិច្ចប្រជុំកម្រិតថ្នាក់ដឹកនាំលើកទី១ សម្រាប់ខែកញ្ញា ដើម្បីលើកទិសដៅ និងជំរុញការងារបន្តនៅទីស្ដីការក្រសួងសុខាភិបាលនារសៀលថ្ងៃទី៧ ខែកញ្ញា ឆ្នាំ២០២៦។កិច្ចប្រជុំនេះមានការអញ្ជើញចូលរួមពី ថ្នាក់ដឹកនាំក្រសួង និងអង្គភាពថ្នាក់កណ្តាល មន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត។

ក្នុងឱកាសនេះដែរ ឯកឧត្តមសាស្រ្តាចារ្យរដ្ឋមន្រ្តី បានថ្លែងនូវការកោតសរសើរចំពោះកិច្ចខិតខំប្រឹងប្រែងក្នុងការបំពេញភារកិច្ចរបស់ខ្លួន ដោយស្មារតីទទួលខុសត្រូវ បម្រើសេវាសុខាភិបាលជូនប្រជាពលរដ្ឋនៅមូលដ្ឋាន ជាពិសេសសេវាសុខភាពបឋម បង្កើនការផលិតសារអប់រំ និងជំរុញការផ្សព្វផ្សាយឱ្យកាន់តែទូលំទូលាយ ដើម្បីលើកកម្ពស់សុខភាពជូនប្រជាពលរដ្ឋឱ្យកាន់តែប្រសើរឡើង។

ឯកឧត្តមសាស្រ្តាចារ្យរដ្ឋមន្រ្តី គូសរំលឹកនូវចំណុច ដើម្បីសម្រេចនូវចក្ខុវិស័យសម្រាប់អនាគតសុខភាពប្រជាជនកម្ពុជា ត្រូវគិតផ្តោតសំខាន់លើស្ថានភាពថ្មីដែលស្មុគស្មាញ សម្រាប់សុខាភិបាលកម្ពុជា នូវចំណុចសំខាន់ៗរួមមាន បម្រែបម្រួលអេពីដេមីសាស្រ្ត បម្រែបម្រួលប្រជាសាស្រ្ត បម្រែបម្រួលសង្គម បម្រែបម្រួលផ្នែកហិរញ្ញវត្ថុ។ ទន្ទឹមនឹងនេះ ចំពោះកត្តាបញ្ហាប្រឈម ដែលកើតឡើងចំពោះមុខ ១) ប្រឈមជាទូទៅ៖ សុខភាពបរិស្ថាន ការប្រែប្រួលអាកាសធាតុ ហានីភ័យការរីករាលដាលជំងឺឆ្លង ២) បញ្ហាប្រឈមជាក់លាក់ ៖ ពង្រឹងគុណភាព ធនធានមនុស្ស ការពិនិត្យព្យាបាលនិងរដ្ឋបាលផ្នែកវេជ្ជសាស្រ្ត និងការប្រើប្រាស់ឱសថឱ្យបាសមស្រប ៣) បញ្ហាប្រឈមបច្ចេកទេស ផ្តោតលើគុណភាព និងប្រសិទ្ធភាព ៤) បញ្ហាប្រឈមជាយុទ្ធសាស្រ្ត ដែលជាកត្តាត្រូវគិតគូរដើម្បីឈានទៅសម្រេចការគ្របដណ្តប់សុខភាពជាសកល។

ឯកឧត្តមសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំ បន្តការយកចិត្តទុកដាក់ខ្ពស់ពីជំងឺមិនឆ្លង និងជំងឺឆ្លង ជាពិសេសជំងឹគ្រុនឈាម និងជំងឺកំពុងមានការឆ្លងនៅបណ្តាប្រទេសមួយចំនួន៕