ព្រឹត្តិការណ៍ប្រកួតពានរង្វាន់ Daiichi Junior Cup រដូវកាលទី១ បានបញ្ចប់ដោយជោគជ័យ ដោយក្នុងនោះក្រុមសាលាបាល់ទាត់ពស់កេងកេង បានក្លាយជាម្ចាស់ជើងឯក លើការប្រកួតកម្រិតអាយុក្រោម១២ឆ្នាំ (U12) ខណៈក្រុមសៀមរាប យូណាយធីត បានឈ្នះពាន U14 ក្រោយឆ្លងកាត់ការប្រកួតដ៏ស្វិតស្វាញ កាលពីចុងសប្តាហ៍កន្លងទៅ ។
ដោយក្រុមសាលាបាល់ទាត់ ពស់កេងកេង បានយកឈ្នះក្រុម Shine Academy ៣-០ ដើម្បីគ្រងជើងឯក កម្រិត U12 រីឯការប្រកួតកម្រិត U14 វិញ ក្រុមសៀមរាយយូណាយធីត បានយកឈ្នះក្រុម Might Men ៣-០ ។
ជុំវិញការរៀបចំការប្រកួតពានរង្វាន់ Daiichi Junior Cup រដូវកាលទី១ លោក ង៉ែត វុទ្ធី តំណាងអ្នករៀបចំកម្មវិធី បានអះអាងថា បានទទួលជោគជ័យលើសការរំពឹងទុក ព្រោះការប្រកួតបានដំណើរយ៉ាងរលូន តាំងពីជម្រុះតាមមណ្ឌល ដល់វគ្គផ្តាច់ព្រ័ត្រនេះ ហើយមាតាបិតា និងអាណាព្យាបាលរបស់កីឡាករទាំង២កម្រិតអាយុនេះ បានមកចូលរួមគាំទ្រច្រើនមែនទែន នៅលើទីលាន ព្រោះនេះជាបរិបទថ្មីនៃការបង្កើតឱ្យមានការប្រកួតបាល់ទាត់ ដែលស្របទៅនឹងស្ថានភាពជាក់ស្តែងរបស់ក្មេងៗ។
លោក ង៉ែត វុទ្ធី បានបន្តទៀតថា៖ «ព្រឹត្តិការណ៍នេះ វាមិនមែនគ្រាន់តែជាកម្មវិធីបាល់ទាត់ធម្មតានោះទេ ប៉ុន្តែវាជាវេទិកាមួយសម្រាប់ឱ្យក្រុមបណ្តុះបណ្តាលយុវជនទៅតាមខេត្ត ដោយគាត់មានការហ្វឹកហាត់ត្រឹមត្រូវ មានឱកាសប្រកួត និងមានផែនការរយៈពេលវែង ដូចដែលកម្មវិធីធ្វើ»។ ហើយការរៀបចំ ឱ្យក្មេងៗលេង នៅតារាងតូច ដែលម្ខាងមានគ្នាត្រឹម៤នាក់នេះ វាបានផ្តល់ឱកាសឱ្យក្មេងៗលេងបាល់បានច្រើន គឺខុសពីការលេងតារាងធំម្ខាង១១នាក់ ដោយក្មេងៗឆាប់ហត់ ហើយការលេងគ្នាច្រើននៅលើទីលាន វាទាមទារនូវបែបបទបច្ចេកទេសនៃការរៀបចំផ្សេងៗ ដែលហាក់នៅឆ្ងាយពីការយល់ដឹងរបស់ក្មេងៗ ព្រោះក្មេងៗ ត្រូវការត្រឹមការលេងបាល់ទៅតាមលទ្ធភាពរបស់ពួកគេអាចធ្វើបាន។
លោក វុទ្ធី បញ្ជាក់ថា៖ «នេះគ្រាន់តែជារដូវកាលទី១ ប៉ុន្តែជាចំណុចចាប់ផ្តើម ដែលយើងបានចាត់ទុកថា ជាបរិបទមួយ ដែលក្មេងៗចាប់ផ្តើមទទួលបាន ការបណ្តុះបណ្តាលបាល់ទាត់ ក្នុងហ្គេមកម្រិតតូច លេងម្ខាង៤នាក់ ដែលផ្តល់ឱកាសឱ្យក្មេងៗ លេងបាល់បានច្រើន និងបានបញ្ចេញនូវ សមត្ថភាព និងបច្ចេកទេស ក៏ដូចជា ទទួលបានបទពិសោធន៍ថ្មីៗ ត្រឡប់ទៅវិញ ហើយនៅរដូវកាលក្រោយៗទៀត ៕
