ឯកឧត្តម ឈួរ សុបញ្ញា អញ្ជើញជាអធិបតីក្នុងពិធីឈាបនកិច្ច និងគោរពវិញ្ញាណក្ខន្ធឧបាសក ឡុង ដែង ញោមបង្កើតព្រះសម្ភារវិសុទ្ធិ ឡុង សុមុនី ព្រះមេគណ គណមហានិកាយ ខេត្តព្រះវិហារ

ខេត្តព្រះវិហារ៖ នៅថ្ងៃចន្ទ ១៤រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៣ ខែកក្កដា ឆ្នាំ២០២៦ ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការនិងសាសនា បានអញ្ជើញជាអធិបតីក្នុងពិធីឈាបនកិច្ច និងគោរពវិញ្ញាណក្ខន្ធ ឧបាសក ឡុង ដែង ដែលត្រូវជាញោមប្រុសបង្កើតរបស់ ព្រះសម្ភារវិសុទ្ធិ ឡុង សុមុនី ព្រះមេគណ គណមហានិកាយ ខេត្តព្រះវិហារ ដែលបានទទួលអនិច្ចកម្មនៅថ្ងៃទី១១ ខែកក្កដា ឆ្នាំ២០២៦ ក្នុងជន្មាយុ ៧៨ឆ្នាំ វេលាម៉ោង ៩:០៩ នាទីព្រឹក ដោយរោគាពាធ ដែលពិធីឈាបនកិច្ចបានប្រារព្ធធ្វើនៅវត្តប្រាសាទគោកបេង ស្ថិតនៅភូមិគោកបេង ក្រុងព្រះវិហារ ខេត្តព្រះវិហារ។

ឯកឧត្តមបានមានប្រសាសន៍ថា ការបាត់បង់ឧបាសក ឡុង ដែង មិនមែនជាការបាត់បង់របស់ក្រុមគ្រួសារតែមួយប៉ុណ្ណោះទេ ប៉ុន្តែក៏ជាការបាត់បង់ពុទ្ធបរិស័ទដ៏ល្អមួយរូប ដែលបានចំណាយអស់មួយជីវិតក្នុងការប្រកាន់ខ្ជាប់សីលធម៌ គោរពព្រះរតនត្រ័យ និងគាំទ្រកិច្ចការព្រះពុទ្ធសាសនាដោយសទ្ធាជ្រះថ្លា។ ជីវិតរបស់លោក គឺជាគំរូនៃការតស៊ូ ការអត់ធ្មត់ ការលះបង់ និងការចិញ្ចឹមបីបាច់កូនចៅដោយផ្អែកលើគុណធម៌ និងព្រហ្មវិហារធម៌។ អ្វីដែលធ្វើឱ្យជីវិតរបស់ឧបាសក ឡុង ដែង កាន់តែមានអត្ថន័យនោះ គឺការបានបណ្តុះបណ្តាលកូនឱ្យក្លាយជាព្រះសង្ឃដ៏មានគុណូបការៈមួយអង្គ ដែលសព្វថ្ងៃកំពុងបំពេញព្រះបេសកកម្មដឹកនាំគណៈសង្ឃខេត្តព្រះវិហារ ថែរក្សាវិន័យសង្ឃ លើកកម្ពស់ការអប់រំព្រះធម៌ និងបម្រើព្រះពុទ្ធសាសនា។ នេះគឺជាផ្លែផ្កានៃការអប់រំក្នុងគ្រួសារ ដែលបានរីកដុះដាលទៅជាប្រយោជន៍ដល់ព្រះពុទ្ធសាសនា និងសង្គមជាតិទាំងមូល។ ព្រះពុទ្ធបរមគ្រូបានត្រាស់ថា៖ «មាតាបិតា បុព្វាចរិយា» មាតាបិតាជាគ្រូដំបូងរបស់កូន។ គ្រូដំបូងដ៏ល្អ អាចបណ្តុះបានកូនល្អ។ កូនល្អអាចក្លាយជាអ្នកដឹកនាំល្អ។ អ្នកដឹកនាំល្អអាចកសាងសង្គមល្អ។ គុណមាតាបិតាមិនត្រឹមតែមានចំពោះគ្រួសារប៉ុណ្ណោះទេ ប៉ុន្តែមានតម្លៃចំពោះសង្គម និងជាតិទាំងមូលផងដែរ។ ព្រះពុទ្ធបរមគ្រូបានត្រាស់ថា៖ «សព្វេ សង្ខារា អនិច្ចា» សង្ខារទាំងឡាយតែងមានការប្រែប្រួលជាធម្មតា។ ទោះបីជារូបកាយរបស់ឧបាសក ឡុង ដែង បានរលាយទៅតាមច្បាប់ធម្មជាតិក៏ដោយ ប៉ុន្តែគុណបំណាច់ សេចក្តីស្រឡាញ់ ការអប់រំទូន្មាន និងអំពើល្អដែលលោកបានសាង នឹងមិនរលាយបាត់ទៅតាមរូបកាយឡើយ។ ផ្ទុយទៅវិញ វានឹងបន្តរស់នៅក្នុងចិត្តកូនចៅ ក្នុងព្រះពុទ្ធសាសនា និងក្នុងស្នាមញញឹមរបស់អ្នកដែលបានទទួលផលពីការលះបង់របស់លោក។

ក្នុងឱកាសដ៏សែនសោកសៅនេះ ឯកឧត្តមសូមចូលរួមនូវសមានទុក្ខ និងការចូលរួមរំលែកមរណទុក្ខយ៉ាងជ្រាលជ្រៅជាមួយព្រះសម្ភារវិសុទ្ធិ ឡុង សុមុនី ព្រមទាំងក្រុមគ្រួសារសព ចំពោះការបាត់បង់ញោមប្រុសជាទីគោរពស្រឡាញ់ ដែលជាសសរស្តម្ភដ៏រឹងមាំនៃគ្រួសារ និងជាអ្នកមានគុណដ៏ឧត្តុង្គឧត្តម។ ក្នុងវេលាដ៏ក្រៀមក្រំនេះ ឯកឧត្តមសូមឧទ្ទិសកុសលផលបុណ្យទាំងឡាយ ជូនដល់វិញ្ញាណក្ខន្ធ ឧបាសក ឡុង ដែង សូមបានទៅចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ និងសូមប្រគេនពរ ព្រះសម្ភារវិសុទ្ធិ ឡុង សុមុនី ព្រមទាំងជូនពរក្រុមគ្រួសារសព ឱ្យមានព្រះកាយ និងកម្លាំងចិត្តរឹងមាំ បន្តថែរក្សា និងលើកតម្កើងកេរដំណែលគុណធម៌ដែលឧបាសកបានបន្សល់ទុក ឱ្យស្ថិតស្ថេរជានិច្ច។