កម្ពុជា និងជប៉ុន ប្រកាសបើកកិច្ចប្រតិបត្តិការបោសសម្អាតមីនដំណាក់កាលទី៣ ក្រោមទុនជំនួយជាង ១១លានដុល្លារ

នៅថ្ងៃទី១៨ ខែឧសភា ឆ្នាំ២០២៦ នៅមណ្ឌលអភិវឌ្ឍន៍ស៊ីម៉ាក់មរតកតេជោ ខេត្តបាត់ដំបង បានរៀបចំប្រារឰពិធីផ្ទេរ-ប្រគល់សមិទ្ធផល នៃគម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីន ដំណាក់កាលទី២ និងការបើកកិច្ចប្រតិបត្តិការគម្រោងថ្មី ដំណាក់កាលទី៣ ដែលជាហិរញ្ញប្បទានឥតសំណងរបស់រដ្ឋាភិបាលជប៉ុន ផ្ដល់ជូនរាជរដ្ឋាភិបាលកម្ពុជា គាំទ្រអង្គភាពCMAC ក្រោមអធិបតីភាពដ៏ខ្ពង់ខ្ពស់ឯកឧត្តម ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្ដរជាតិ និងលោក​ជំទាវ​ ខេង​ សំវ៉ាដា​ តំណាងដ៏ខ្ពង់ខ្ពស់បំផុត សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា​ និងលោកជំទាវ​បណ្ឌិត​ ពេជ​ ចន្ទមុន្នី​ ហ៊ុន​ ម៉ាណែត រួមជាមួយឯកឧត្តម UENO Atsushi ឯកអគ្គរដ្ឋទូតជប៉ុនប្រចាំកម្ពុជា។
សូមជម្រាបថា គម្រោងសមាហរណកម្មការបោស​សម្អាតមីន និងជួយសង្គ្រោះ​ជន​ពិការ​ដោយ​សារមីនដំណាក់កាលទី២នេះ រដ្ឋាភិបាលជប៉ុនបានសម្រេចផ្តល់ជំនួយហិរញប្បទានឥតសំណងមានទឹកប្រាក់សរុបចំនួន២.០០០លានយ៉េន ស្មើនឹងជិត​១៧លានដុល្លារអាម៉េរិក សម្រាប់រយៈពេល៤៥ខែ (០១ មេសា ២០២២ ដល់ថ្ងៃទី៣១ ធ្នូ ២០២៥) ដែលត្រូវអនុវត្តគម្រោងនៅខេត្តបាត់ដំបង ខេត្តពោធិ៍សាត់ និងខេត្តប៉ៃលិន ព្រមទាំងសម្រេចបានសមិទ្ធផលមានជាអាទិ៍៖ បោសសម្អាតផ្ទៃដីចម្ការមីន/គ្រាប់បានចំនួន១២.០១១ហិកតា ស្មើនឹង១២៧% ធៀបនឹងផែនការ។ រុករក​ឃើញនិងកម្ទេចចោលគ្រាប់មីន&គ្រាប់យុទ្ធភណ្ឌមិនទាន់ផ្ទុះគ្រប់ប្រភេទចំនួន២៧.៨៤៧គ្រាប់ និង​​ផ្ដល់សារអប់រំយល់ដឹងពីមីនបានចំនួន១២.៥៨២លើក មានប្រជាពលរដ្ឋចូលរួមសរុបចំនួន៣៤៣.២០៩​​នា​ក់។ ប្រជាពលរដ្ឋទទួលផលពីគម្រោងនេះមានចំនួន៧៦៣.៦០២នាក់។ សាងសង់ផ្លូវគ្រួសក្រហមប្រវែង៩.៨០០ម៉ែត្រ និងសំណង់រំដោះទឹកគ្រប់ប្រភេទចំនួន២៩កន្លែង ទិញសម្ភារបោសសម្អាត​​មីន​មួយចំនួន​រួមមាន៖ ម៉ាស៊ីនរាវមីន ALIS ចំនួន១២គ្រឿង គ្រឿងចក្របោសសម្អាតមីនKomatsu ចំនួន១គ្រឿង រថយន្តសណ្តោងចំនួន១គ្រឿង និងគ្រឿបន្លាស់ផងដែរ។
ដោយឡែកសម្រាប់គម្រោងថ្មី ដំណាក់កាលទី៣ ដែលត្រូវសម្ពោធបើកការដ្ឋាននៅថ្ងៃនេះ មានហិរញ្ញប្បទានឥតសំណងចំនួន១.៧០០លានយ៉េន ស្មើនឹងប្រមាណ១១លានដុល្លារអាមេរិក សម្រាប់រយៈពេល២៤ខែ(១៩ មករា ២០២៦-១៨ មករា ២០២៨) ដើម្បីគាំទ្រអង្គភាពCMAC លើគោលដៅដូចជា បោសសម្អាតផ្ទៃដីចម្ការមីន/គ្រាប់ចំនួន៤.៩៣៩ហិកតា ក្នុងភូមិសាស្រ្ដខេត្តពោធិ៍សាត់ ខេត្តបាត់ដំបង និងខេត្តកោះកុង ព្រមទាំងឆ្លើយតបសំណើសុំអន្ដរាគមន៍បន្ទាន់ក្នុងខេត្តប៉ៃលិន។ ការជួយសង្គ្រោះជនរងគ្រោះដោយសារមីន និងការអភិវឌ្ឍសហគមន៍ក្រោយបោសសម្អាតមីនរួច។ ទិញម៉ាស៊ីនរាវមីនALIS និងកសាងប្រព័ន្ធទិន្នន័យបញ្ញាសិប្បនិមិ្មត(AI)។
ឆ្លៀតក្នុងឱកាសនោះដែរ ឯកឧត្តមប្រតិភូ ហេង រតនា បានគោរពគោរពថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនិងប្រជាជនជប៉ុន​ដែលបានផ្តល់ជំនួយទាំងសម្ភារៈ និងថវិកា​ ដើម្បីគាំទ្រអង្គភាពCMAC ក្នុងការបោសសម្អាតមីននៅកម្ពុជា ជាពិសេសសម្ដេចមហាបវរ​ធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា​ ដែលបានផ្តល់ការគាំទ្រយ៉ាងពេញទំហឹងដល់អង្គភាពCMAC និងគោរពថ្លែងអំណរចំពោះឯកឧត្តម ឧបនាយករដ្ឋមន្រ្តី ដែ​លបានផ្ដល់ការគាំទ្រ និងតែងតែជួយសម្របសម្រួលគម្រោងនេះ។ ​ ក៏ដូចជាថ្លែងអំណរគុណចំពោះដៃគូអភិវឌ្ឍ និងម្ចាស់ជំនួយទាំងអស់ ដែលបានចូលរួមចំណែកក្នុងការអនុវត្តផែនការយុទ្ធសាស្រ្ដរបស់រាជរដ្ឋាភិបាល សំដៅឆ្ពោះទៅរកកម្ពុជាអស់ការគំរាមកំហែងដោយសារគ្រាប់មីនប្រឆាំងមនុស្ស​នៅត្រឹមចុងឆ្នាំ២០៣០ និងកាត់បន្ថយការគំរាមកំហែងដោយ​សារបញ្ហាសំណល់គ្រាប់យុទ្ធភណ្ឌសង្គ្រា​ម​ត្រឹមឆ្នាំ២០៣៥។