ក្រសួងព័ត៌មាន និងស្ថានឯកអគ្គរដ្ឋទូតគុយបា រួមគ្នារៀបចំពិព័រណ៍រូបថត អបអរខួបលើកទី៦៥ នៃថ្ងៃបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋគុយបា ក្នុងគោលបំណងដើម្បីរំលឹកចំណងមិត្តភាព និងកិច្ចសហប្រតិបត្តិការដ៏រឹងមាំលើវិស័យទេសចរណ៍ សេដ្ឋកិច្ច និងការផ្លាស់ប្តូរវប្បធម៌ ដើម្បីផលប្រយោជន៍ប្រទេសទាំងពីរ,

(ភ្នំពេញ)៖ ពិព័រណ៍រូបថត អបអរខួបលើកទី៦៥ នៃថ្ងៃបង្កើតទំនាក់ទំនងការទូតរវាង ព្រះរាជាណាចក្រកម្ពុជា និងសាធារណរដ្ឋគុយបា ត្រូវបានរៀបចំឡើងដោយទីភ្នាក់ងារសារព័ត៌មានកម្ពុជា AKP នៃក្រសួងព័ត៌មាន និងស្ថានឯកអគ្គរដ្ឋទូតគុយបា ប្រចាំកម្ពុជា នៅរសៀលថ្ងៃទី២១ ខែមេសា ឆ្នាំ២០២៦ នាសាលចតុម្មុខមង្គលទីស្តីការក្រសួងព័ត៌មាន ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ Milena Caridad Zalddivar Piedra ឯកអគ្គរដ្ឋទូតនៃសាធារណរដ្ឋគុយបា ប្រចាំកម្ពុជា។
ពិធីនេះក៏មានការអញ្ជើញចូលរួមពី លោកជំទាវ និន សាផុន ប្រធានគណៈកម្មាធិការទី៩ នៃរដ្ឋសភា និងជាប្រធានក្រុមមិត្តភាពសភាកម្ពុជា-គុយបា, លោកជំទាវកិត្តិបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារី, ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, លោកជំទាវ អ៊ាត សោភា រដ្ឋលេខាធិការប្រចាំការក្រសួងការបរទេស និងសហប្រតិបត្តិការអន្តរជាតិ ព្រមទាំងវត្ត ឯកឧត្តម លោកជំទាវ តំណាងស្ថានទូតមួយប្រចាំកម្ពុជា។

លោកជំទាវ Milena Caridad Zalddivar Piedra បានគូសបញ្ជាក់ថា ពិព័រណ៍រូបថតនេះ គឺជាព្រឹត្តិការណ៍សំខាន់នៃទំនាក់ទំនងពិសេស និងជាប្រវត្តិសាស្ត្ររវាងសាធារណៈរដ្ឋគុយបា និងព្រះរាជាណាចក្រកម្ពុជា ដែលជាប្រជាជាតិដាច់ស្រយាលពីរដែលចំណងការទូត ត្រូវបានបង្កើតឡើងនៅថ្ងៃទី១៥ ខែមេសា ឆ្នាំ១៩៦០។
លោកជំទាវ ឯកអគ្គរដ្ឋទូត បានលើកឡើងថា ការលើកទឹកចិត្តពិសេសមួយគឺការគោរពចំពោះទំនួលខុសត្រូវប្រវត្តិសាស្ត្រ ដើម្បីគោរពដល់ចំណងមិត្តភាព និងក្តីស្រលាញ់រវាងប្រជាជាតិយើង ដែលបង្កើតឡើងដោយសម្តេចព្រះបិតា នរោត្តម សីហនុ និងមេដឹកនាំប្រវត្តិសាស្ត្រនៃបដិវត្តគុយបា អគ្គមេបញ្ជាការ Fidel Castro Ruz ។
រូបថតនីមួយៗ សរុបចំនួន ៣១សន្លឹក បានបង្ហាញពីឫសគល់ជ្រៅនៃទំនាក់ទំនង ដែលបង្កើតឡើងនៅលើឆន្ទៈនយោបាយ ការគោរព និងការយោគយល់គ្នាទៅវិញទៅមក លះបង់ចំពោះគោលការណ៍មិនចូលបក្សសម្ព័ន្ធ កិច្ចសហប្រតិបត្តិការដើម្បីការអភិវឌ្ឍន៍ និងការបំពេញបន្ថែម។ រូបភាពខ្លះនឹងមិនត្រូវបានផ្សព្វផ្សាយសម្រាប់មនុស្សជាច្រើន ប៉ុន្តែប្រាកដជាទាក់ទាញចិត្តប្រជាជនគុយបា និងប្រជាពលរដ្ឋកម្ពុជាគ្រប់ជំនាន់ ដោយឆ្លុះបញ្ចាំង ពីព្រឹត្តិការណ៍សំខាន់ៗក្នុងរយៈពេល ៦៥ឆ្នាំនៃចំណងមិត្តភាពដ៏ជិតស្និទ្ធ និងគំរូ។
ការតាំងពិព័រណ៍រូបថតនេះគ្រាន់តែជាការឆ្លុះបញ្ចាំងពីប្រវត្តិសាស្រ្តនៃទំនាក់ទំនង ដែលនៅឆ្ងាយពីការបំផ្លាញតាមរយៈបរិបទប្រវត្តិសាស្ត្រចម្រុះ និងសក្ដានុពលភូមិសាស្ត្រ នយោបាយ បានរក្សាភាពរឹងមាំ និងភាពធន់របស់ពួកគេ ហើយនៅតែរឹងមាំដដែលទៅថ្ងៃអនាគត។
ប្រជាជនគុយបានឹងដឹងគុណជានិច្ចចំពោះការគាំទ្រដ៏យូរអង្វែង របស់កម្ពុជាចំពោះការតស៊ូរបស់ប្រជាជនគុយបាដើម្បីការពារអធិបតេយ្យភាព និងឯករាជ្យរបស់ពួកគេ។
លោកជំទាវ បានគូសបញ្ជាក់ថា “យើងជា ប្រទេសមានសន្តិភាព យើងមិនជំរុញសង្គ្រាម យើងមិនចូលចិត្តសង្គ្រាម យើងពង្រឹង សាមគ្គីភាព និងកិច្ចសហប្រតិបត្តិការក្នុង ចំណោមប្រជាជន ប៉ុន្តែយើងបានត្រៀមខ្លួន ដើម្បីការពារសន្តិភាពដែលយើងចង់បាន ”។

ឯកឧត្តម រដ្ឋមន្ត្រី នេត្រ ភក្ត្រា មានប្រសាសន៍លើកឡើងថា ចាប់តាំងពីការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណដ្ឋគុយបា នាថ្ងៃទី១៥ ខែមេសា ឆ្នាំ១៩៦០ ក្រោមព្រះរាជតម្រិះផ្តួចផ្តើមរបស់ សម្តេចព្រះនរោត្តម សីហនុ ព្រះបរមរតនកោដ្ឋ និង ឯកឧត្តម Fidel Castro អគ្គមគ្គុទេសក៏បដិវត្តន៍គុយបា ប្រទេសយើងទាំងពីរបានបន្តពង្រឹងទំនាក់ទំនង និងកិច្ចសហប្រតិបត្តិការទ្វេភាគីយ៉ាងជិតស្និទ្ធលើវិស័យនានា ដូចជា នយោបាយ អប់រំ សុខាភិបាល កីឡា និងវិស័យព័ត៌មាន។ល។ ទំនាក់ទំនងទាំងនេះ ត្រូវបានបង្កើតឡើងដោយឈរលើមូលដ្ឋាននៃការគោរពគ្នាទៅវិញទៅមក ការយោគយល់ និងការគាំទ្រគ្នានៅលើឆាកអន្តរជាតិ។

ឯកឧត្តមរដ្ឋមន្ត្រី បានគូសបញ្ជាក់ថា ការរៀបចំពិព័រណ៍រូបថតនាពេលនេះ គឺជាការបង្ហាញពីសមិទ្ធផល និងព្រឹត្តិការណ៍សំខាន់ៗក្នុងប្រវត្តិសាស្ត្រ និងការផ្សាភ្ជាប់ទំនាក់ទំនងរវាងប្រទេសទាំងពីរ។ រូបថតចំនួន ៣១សន្លឹក ដែលយកមកតាំងបង្ហាញនៅពេលនេះ ជាសក្ខីភាពដែលឆ្លុះបញ្ចាំងពី៖ (ទី១) ការបង្កើតទំនាក់ទំនងការទូត កិច្ចសហប្រតិបត្តិការ ទ្វេភាគី និងព្រឹត្តិការណ៍ប្រវត្តិសាស្ត្រសំខាន់ៗ (ទី២) ជំនួយរបស់គុយបា នៅចុងទសវត្សរ៍១៩៧០ និងទសវត្សរ៍១៩៨០ និង (ទី៣) ទស្សនកិច្ចផ្លូវការនានារវាងថ្នាក់ដឹកនាំនៃប្រទេសទាំងពីរ។ ក្នុងចំណោមរូបថតដែលយកមកតាំងបង្ហាញនៅទីនេះ មានរូបថត សម្តេចតេជោ ហ៊ុន សែន ដែលបានធ្វើទស្សនកិច្ចទៅកាន់ប្រទេសគុយបាក្នុងឆ្នាំ១៩៩៩ ដោយពេលនោះ សម្តេច បានទទួលគ្រឿងឥស្សរិយយសថ្នាក់ខ្ពស់បំផុត (the Order of José Martí) របស់គុយបា។ សម្តេចតេជោ បានអញ្ជើញទៅគុយបាម្តងទៀត ក្នុងឆ្នាំ២០២២ និងបន្ទាប់មកក្នុងខែតុលា ឆ្នាំដដែល ឯកឧត្តម Manuel Marrero Cruz នាយករដ្ឋមន្ត្រីគុយបា ក៏បានមកបំពេញទស្សនកិច្ចនៅកម្ពុជាផងដែរ។ រូបថតទាំងនេះ មិនត្រឹមតែបង្ហាញពីអតីតកាលប៉ុណ្ណោះទេ ប៉ុន្តែថែមទាំងជាភស្តុតាងនៃ មិត្តភាព និងកិច្ចសហប្រតិបត្តិការ ដែលបាននិងកំពុងបន្តរីកចម្រើនទៅមុខជានិរន្តផងដែរ៕