ពុទ្ធបរិស័ទយ៉ាងច្រើនកុះករ អញ្ជើញមកធ្វើបុណ្យរាប់បាត្រ និងបង្សុកូល នៅវត្តឥន្ទញ្ញាណ ដើម្បីឧទ្ទិសកុសលជូនបុព្វការីជន និងវីរកងទ័ពជួរមុខ

[ខេត្តព្រះសីហនុ] – ក្នុងបរិយាកាសដ៏រីករាយនៃពិធីបុណ្យចូលឆ្នាំថ្មី ប្រពៃណីជាតិខ្មែរ មហាសង្រ្កាន្ត ឆ្នាំមមី អដ្ឋស័ក ពុទ្ធសករាជ ២៥៦៩ ត្រូវនឹងថ្ងៃអង្គារ ១២រោច ខែចេត្រ ឆ្នាំមមី (ថ្ងៃទី១៤ ខែមេសា ឆ្នាំ២០២៦) ពុទ្ធបរិស័ទជិតឆ្ងាយបានអញ្ជើញមកជួបជុំគ្នាយ៉ាងច្រើនកុះករនៅ វត្តឥន្ទញ្ញាណ ដើម្បីប្រារព្ធពិធីបុណ្យតាមបែបសាសនា។

នៅក្នុងឱកាសដ៏វិសេសវិសាលនេះ បងប្អូនប្រជាពលរដ្ឋបានរៀបចំចង្ហាន់ ភេសជ្ជៈ និងទេយ្យទានផ្សេងៗ ដើម្បីយកមកប្រគេនព្រះសង្ឃ រាប់បាត្រ និងធ្វើពិធីបង្សុកូល។ កម្មវិធីបុណ្យនេះត្រូវបានរៀបចំឡើងក្នុងគោលបំណងសំខាន់ៗចំនួនពីរ៖
១. ឧទ្ទិសកុសលជូនបុព្វការីជន៖ ដើម្បីឧទ្ទិសបុណ្យកុសលជូនដល់ញាតិការទាំង ៧ សន្តាន ដែលបានចែកឋានទៅកាន់លោកខាងមុខ និងសព្វសត្វទាំងឡាយក្នុងវដ្តសង្សារ។
២. រំលឹកគុណវីរកងទ័ព៖ អ្វីដែលកាន់តែពិសេសនោះ គឺការឧទ្ទិសកុសលជូនចំពោះវិញ្ញាណក្ខន្ធវីរកងទ័ពជួរមុខ ដែលបានពលីជីវិតស្រស់នៅសមរភូមិ ដើម្បីការពារទឹកដី និងសេចក្តីសុខសាន្តរបស់ជាតិមាតុភូមិ។

ជាមួយគ្នានេះដែរ ទិដ្ឋភាពនៅវត្តឥន្ទញ្ញាណបានបង្ហាញពីការថែរក្សាទំនៀមទម្លាប់ដ៏ល្អផូរផង់របស់ខ្មែរ និងការបង្ហាញនូវស្មារតីសាមគ្គីភាព រួមទាំងការដឹងគុណចំពោះអ្នកមានគុណ និងវីរបុរសស្នេហាជាតិ ក្នុងទិវាចូលឆ្នាំថ្មីដែលជាទិវានៃសិរីសួស្តីសម្រាប់ប្រជាជាតិទាំងមូល៕

រូបភាព៖ វត្តឥន្ទញ្ញាណ
អត្ថបទ៖ ម៉ារ៉ាឌី