ឯកឧត្តម ទេសរដ្ឋមន្រ្តី គន់ គីម អញ្ជើញចុះពិនិត្យស្ថានភាពរស់នៅ និង អាជីវកម្មប្រជាពលរដ្ឋភៀសសឹក ក្នុងខេត្តបន្ទាយមានជ័យ

នៅថ្ងៃទី២៣ ខែមិថុនា ឆ្នាំ២០២៦ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការ សមាគមអតីតយុទ្ធធន និងនិវត្តជនកម្ពុជា បានអញ្ជើញចុះពិនិត្យស្ថានភាពរស់នៅ និងអាជីវកម្មតាមខ្នងផ្ទះបណ្តោះអាសន្នប្រជាពលរដ្ឋភៀសសឹក ព្រមទាំងការបន្តសាងសង់ផ្ទះបណ្តោះអាសន្ន ស្ថិតក្នុងភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ។

ក្នុងពេលអញ្ជើញចុះពិនិត្យតាមខ្នងផ្ទះ ឯកឧត្តម ទេសរដ្ឋមន្រ្តី សូមកោតសរសើរដល់ប្រជាពលរដ្ឋភៀសសឹកដែលបានរៀបចំផ្ទះរបស់ខ្លួនប្រកបដោយសោភ័ណភាព បូករួមជាមួយការដាំដុះដំណាំហូបផ្លែជុំវិញផ្ទះ។

ឯកឧត្តម ទេសរដ្ឋមន្រ្តី មានប្រសាសន៍ថា រាជរដ្ឋាភិបាលដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី មានគោលនយោបាយច្បាស់លាស់ ក្នុងការជួយស្តាឡើងវិញនូវជីវភាពរបស់ប្រជាពលរដ្ឋភៀសសឹក។

ឯកឧត្តម ទេសរដ្ឋមន្រ្តី មានប្រសាសន៍ទៀតថា ជាក់ស្តែង ប្រជាពលរដ្ឋភៀសសឹកដែលស្នាក់នៅផ្ទះបណ្តោះអាសន្ន ត្រូវបានក្រសួង-ស្ថាប័ន និង អាជ្ញាធរមូលដ្ឋានដែលជាសេនាធិការរបស់រាជរដ្ឋាភិបាល យកចិត្តទុកដាក់មើលការខុសត្រូវ និង ដោះស្រាយបញ្ហាប្រឈមនានា ដែលពួកគាត់ជួបប្រទះសំដៅជួយសម្រួល និង រក្សា លំនឹងជីវភាពរបស់ពួកគាត់។

ឯកឧត្តម ទេសរដ្ឋមន្រ្តី បញ្ជាក់ថា អំឡុងពេលស្នាក់នៅផ្ទះបណ្តោះអាសន្ន បងប្អូនប្រជាពលរដ្ឋភៀសសឹកបានទទួលការយកចិត្តទុកដាក់មើលថែទាំងពីសំណាក់រាជរដ្ឋាភិបាល និងមន្ត្រីអាជ្ញាធរពាក់ព័ន្ធ រួមទាំងមហាជន និង សប្បុរសជនគ្រប់ទិសទី ក្នុងនាមជាមហាគ្រួសារខ្មែរតែមួយ និងក្រោមស្មារតីផ្សារភ្ជាប់រវាងសមរភូមិមុខ និង សមរភូមិក្រោយ ដោយគ្មានពលរដ្ឋណាម្នាក់ត្រូវបានបោះបង់ឱ្យនៅ ឯកាឡើយ ទោះជាក្នុងកាលៈទេសៈ ណាក៏ដោយ។

ឯកឧត្តម ទេសរដ្ឋមន្រ្តី កត់សម្គាល់ឃើញថា ប្រជាពលរដ្ឋភៀសសឹកភាគច្រើនបានខិតខំប្រឹងប្រែង ក្នុងការរៀបចំជីវភាពរស់នៅតាមរយៈមុខរបរ និងអាជីវកម្មរបស់ខ្លួនយ៉ាងល្អប្រសើរ។

ឆ្លៀតក្នុងឱកាសចុះពិនិត្យស្ថានភាពតាមខ្នងផ្ទះ ឯកឧត្តម គន់ គីម បានសំណូមពរដល់ប្រជាពលរដ្ឋដែលជួបប្រទះបញ្ហាប្រឈម សូមរាយការណ៍ទៅកាន់ក្រុមការងារអាជ្ញាធរមូលដ្ឋាន ឬអាជ្ញាធរខេត្ត ដែលប្រចាំការនៅក្នុងភូមិ ដើម្បីចុះពិនិត្យ និងដោះស្រាយបានទាន់ពេលវេលា៕