ឯកឧត្តម ឌិត ទីណា រដ្ឋមន្ត្រីកសិកម្មកម្ពុជា និងឯកឧត្តមរដ្ឋមន្ត្រីហ្វីលីពីន អញ្ជើញទស្សនាស្តង់ពិព័រណ៍កសិកម្មកម្ពុជា (CAFE26) នៅមជ្ឈមណ្ឌលកោះពេជ្រ

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកម្ពុជា ព្រមទាំង ឯកឧត្តម Francisco P. Tiu Laurel Jr. រដ្ឋមន្ត្រីក្រសួងកសិកម្ម នៃសាធារណរដ្ឋហ្វីលីពីន និងប្រតិភូអមដំណើរ បានអញ្ជើញចូលរួមទស្សនាស្តង់ពិព័រណ៍ និងផលិតផលកសិកម្មកម្ពុជា ក្នុងព្រឹត្តិការណ៍ «វេទិកា និងពិព័រណ៍កសិកម្មកម្ពុជា» ឬ CAFE26 នាថ្ងៃទី ២៣ ខែតុលា ឆ្នាំ២០២៦ នេះ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

​ព្រឹត្តិការណ៍ CAFE26 ដែលប្រព្រឹត្តទៅចាប់ពីថ្ងៃទី ២៣ ដល់ថ្ងៃទី ២៥ ខែតុលា ឆ្នាំ២០២៦ គឺជាវេទិកាយ៉ាងសំខាន់ក្នុងការជួបជុំរវាងតួអង្គពាក់ព័ន្ធក្នុងវិស័យកសិកម្ម រាប់ចាប់ពីកសិករ សហគមន៍កសិកម្មទំនើប អ្នកកែច្នៃ វិនិយោគិន រហូតដល់អ្នកនយោបាយ និងប្រតិភូអន្តរជាតិ។

​ក្នុងអំឡុងពេលនៃការទស្សនាស្តង់ផលិតផល ថ្នាក់ដឹកនាំក្រសួងកសិកម្មនៃប្រទេសទាំងពីរ បានយកចិត្តទុកដាក់ពិនិត្យមើលយ៉ាងស្ទាត់ជំនាញលើផលិតផលកសិកម្មកែច្នៃ ស្រូវ-អង្ករគុណភាពខ្ពស់ ដំណាំហូបផ្លែ បន្លែសុវត្ថិភាព និងបច្ចេកវិទ្យាកសិកម្មទំនើបៗដែលផលិត និងបំពាក់ដោយស្នាដៃកូនខ្មែរ។ ការអញ្ជើញវត្តមានរបស់រដ្ឋមន្ត្រីកសិកម្មហ្វីលីពីននាពេលនេះ ស្តែងឲ្យឃើញយ៉ាងច្បាស់ពីការចាប់អារម្មណ៍ស្វែងយល់អំពីសក្ដានុពលកសិផលកម្ពុជា និងការបើកឱកាសថ្មីៗក្នុងការផ្លាស់ប្តូរពាណិជ្ជកម្ម និងបទពិសោធន៍រវាងប្រទេសទាំងពីរ។

​ឯកឧត្តមរដ្ឋមន្ត្រី ឌិត ទីណា បានគូសបញ្ជាក់អំពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការរៀបចំ និងប្រែក្លាយវិស័យកសិកម្មឲ្យទៅជា «កសិកម្មពាណិជ្ជកម្ម» ដែលមានខ្សែច្រវ៉ាក់ផលិតកម្មរឹងមាំ មាននិរន្តរភាព និងឆ្លើយតបទៅនឹងតម្រូវការទីផ្សារអន្តរជាតិ។ ការតាំងបង្ហាញផលិតផលក្នុងពិព័រណ៍ CAFE26 មិនត្រឹមតែជាការបង្ហាញពីសមត្ថភាពផលិតរបស់កម្ពុជាប៉ុណ្ណោះទេ ប៉ុន្តែថែមទាំងជាស្ពានចងភ្ជាប់ទំនាក់ទំនងធុរកិច្ច (B2B) រវាងវិនិយោគិនក្នុងស្រុក និងបរទេសទៀតផង។

​កិច្ចសហប្រតិបត្តិការរវាងកម្ពុជា និងហ្វីលីពីនក្នុងវិស័យកសិកម្ម ត្រូវបានរំពឹងថានឹងកាន់តែមានភាពស៊ីជម្រៅបន្ថែមទៀត តាមរយៈការផ្លាស់ប្តូរបច្ចេកវិទ្យា ការពង្រឹងសន្តិសុខស្បៀង និងការបង្កើនទំហំពាណិជ្ជកម្មនាំចេញ-នាំចូលកសិផលទៅវិញទៅមកនាពេលខាងមុខ។

​សូមជម្រាបជូនថា «វេទិកា និងពិព័រណ៍កសិកម្មកម្ពុជា ឆ្នាំ២០២៦» (CAFE26) នៅមជ្ឈមណ្ឌលសន្និបាត និងពិព័រណ៍កោះពេជ្រ ដោយព្រឹត្តិការណ៍ដ៏ធំប្រចាំឆ្នាំលើកទី២ នេះ ប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី២៣ ដល់ថ្ងៃទី២៥ ខែតុលា ឆ្នាំ២០២៦។