ស្ពានថ្មថ្មីឆ្លងកាត់ស្ទឹងស្ទោង ខេត្តកំពង់ធំ ត្រៀមដាក់ឲ្យឆ្លងកាត់ ដែលជាចំណងដៃដ៏ថ្លៃថ្លារបស់សម្តេចធិបតី ហ៊ុន ម៉ាណែត 

ខេត្តកំពង់ធំ ៖ សមិទ្ធផលដ៏សំខាន់មួយដែលបាននាំមកនូវក្ដីសប្បាយរីករាយយ៉ាងក្រៃលែងដល់ប្រជាពលរដ្ឋក្នុងមូលដ្ឋាន នោះគឺ ស្ពានថ្មថ្មីមួយខ្សែ ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ត្រៀមប្រគល់ជូនប្រជាពលរដ្ឋប្រើប្រាស់ ដើម្បីសម្រួលដល់ការធ្វើដំណើរ ឆ្លងកាត់ស្ទឹងស្ទោង ក្នុងភូមិអូរដូង ឃុំម្សាក្រង ស្រុកស្ទោង ខេត្តកំពង់ធំ។

សូមបញ្ជាក់ថា ក្រោមការចង្អុលបង្ហាញដ៏ខ្ពង់ខ្ពស់របស់សម្ដេចមហាបវរធិបតី និងការដឹកនាំអនុវត្តផ្ទាល់របស់ឧបនាយករដ្ឋមន្ត្រីប្រចាំការ វង្សី វិស្សុត ប្រធានក្រុមការងារចុះមូលដ្ឋានខេត្តកំពង់ធំ រួមជាមួយកិច្ចសហការខ្ពស់ពី ឯកឧត្តម ឆាយ រិទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ និងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ព្រមទាំងការយកចិត្តទុកដាក់ខ្ពស់របស់ឯកឧត្តម នួន ផារ័ត្ន អភិបាលខេត្តកំពង់ធំ បានធ្វើឱ្យស្ពាននេះលេចចេញជារូបរាងឡើង។

ស្ពានថ្មថ្មីនេះនឹងជំនួសស្ពានឈើចាស់ទ្រុឌទ្រោម ដែលធ្លាប់បានកសាងដោយសហគមន៍និងសប្បុរសជន ក៏ដូចជាធានាសុវត្ថិភាព ឆាប់រហ័ស និងងាយស្រួលជាងមុនសម្រាប់ការធ្វើដំណើររបស់ប្រជាពលរដ្ឋ សិស្សានុសិស្ស និងលោកគ្រូ អ្នកគ្រូ ជាពិសេសនៅរដូវវស្សា។ ស្ពាននេះនឹងជួយលើកកម្ពស់សេដ្ឋកិច្ចមូលដ្ឋាន ដោយសម្រួលដល់ការដឹកជញ្ជូនកសិផល និងទំនិញផ្សេងៗ។ ស្ពានថ្មីនេះមានទទឹង ៨ម៉ែត្រ បណ្ដោយ ៦០ម៉ែត្រ និងមានជើងទេផ្លូវបេតុងសងខាងប្រវែង ១៥០ម៉ែត្រ៕