ភ្នំពេញ ៖ កំណាត់ផ្លូវជាតិលេខ ៨ មានប្រវែងជាង ៤០ គីឡូម៉ែត្រ ចាប់ពីស្ពានព្រែកតាមាក់ ក្នុងស្រុកខ្សាច់កណ្តាល ខេត្តកណ្ដាល ទៅដល់ព្រំប្រទល់ស្រុកពារាំង ខេត្តព្រៃវែង ត្រូវបានសង់ពង្រីកពី ២ គន្លង ទៅ ៤ គន្លង ដើម្បីបង្កើនសមត្ថភាពដឹកជញ្ជូន និងសម្រួលការធ្វើដំណើររបស់ប្រជាពលរដ្ឋ។
រាជរដ្ឋាភិបាលបានកំពុងសិក្សាលទ្ធភាពស្ថាបនា និងកែលម្អផ្លូវជាតិលេខ ៨ បន្ថែមទៀត ដើម្បីឱ្យខ្សែផ្លូវយុទ្ធសាស្ត្រមួយនេះមានគុណភាព និងសមត្ថភាពឆ្លើយតបទៅនឹងតម្រូវការប្រើប្រាស់នាពេលអនាគត។
ឯកឧត្តម ឈួន វិន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានដឹកនាំក្រុមការងារជំនាញចុះពិនិត្យស្ថានភាពជាក់ស្តែងតាមបណ្តោយផ្លូវជាតិលេខ ៨ ចាប់ពីស្ពានព្រែកតាមាក់ខេត្តកណ្តាល រហូតដល់ស្រុកពញាក្រែកខេត្តត្បូងឃ្មុំ។
ដំំណើរបេសកកម្មនេះ មានការចូលរួមពីថ្នាក់ដឹកនាំ និងមន្ត្រីជំនាញក្រសួងសាធារណការ និងដឹកជញ្ជូន តំណាងធនាគារ AIIB ព្រមទាំងមន្ត្រីមន្ទីរសាធារណការ និងដឹកជញ្ជូនខេត្តកណ្ដាល ព្រៃវែង និងត្បូងឃ្មុំ ដើម្បីពិនិត្យស្ថានភាពផ្លូវ ប្រមូលទិន្នន័យបច្ចេកទេស និងពិភាក្សាជាមួយអាជ្ញាធរពាក់ព័ន្ធ។
ការពង្រីកផ្លូវជាតិលេខ ៨ មានសារៈសំខាន់ជាពិសេសចំពោះការដឹកជញ្ជូនផលិតផលកសិកម្ម និងទំនិញពីតំបន់ផលិតកម្មទៅកាន់ទីផ្សារ និងតភ្ជាប់ទៅកាន់តំបន់ព្រំដែន។
ផ្លូវជាតិលេខ ៨ មានប្រវែងសរុប ១២៣,៦ គីឡូម៉ែត្រ ចាប់ពីរង្វង់មូលស្ពានព្រែកតាមាក់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ដល់ចំណុចប្រសព្វផ្លូវជាតិលេខ ៧ ត្រង់គីឡូម៉ែត្រលេខ ១៧២+៧០០ ស្ថិតក្នុងឃុំកោងកាង ស្រុកពញ្ញាក្រែក ខេត្តត្បូងឃ្មុំ ឆ្លងកាត់ខេត្តកណ្ដាល ខេត្តព្រៃវែង និងខេត្តត្បូងឃ្មុំ។
ផ្លូវនេះមានសារៈសំខាន់ក្នុងការតភ្ជាប់រាជធានីភ្នំពេញ តាមខេត្តកណ្ដាល ព្រៃវែង និងត្បូងឃ្មុំ ទៅកាន់តំបន់ភាគខាងកើត និងតំបន់ព្រំដែនកម្ពុជា–វៀតណាម៕
