ឯកឧត្តម ឈៀង យ៉ាណារ៉ា ទេសរដ្ឋមន្រ្តីទទួលបន្ទុកបេសកកម្មពិសេស អនុប្រធានទី ២ នៃក្រុមប្រឹក្សាអភិវឌ្ឍន៍កម្ពុជា (ក.អ.ក.) និងលោកជំទាវ Vladanka Andreeva តំណាងប្រធានសម្របសម្រួលប្រព័ន្ធអង្គការសហប្រជាជាតិប្រចាំកម្ពុជា (UN Resident Coordinator to Cambodia) បានដឹកនាំកិច្ចប្រជុំលើកទី១ នៃគណៈកម្មាធិការដឹកនាំការងាររួម (1st Joint Steering Committee–JSC)

ដោយ ប្រុស អាន ចេញផ្សាយ ថ្ងៃទី 12 ខែ ឧសភា ឆ្នាំ 2026 333

នាព្រឹកថ្ងៃអង្គារ ១១រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១២ ខែឧសភា ឆ្នាំ២០២៦ នៅទីស្តីការក្រុមប្រឹក្សាអភិវឌ្ឍន៍កម្ពុជា(ក.អ.ក), ឯកឧត្តម ឈៀង យ៉ាណារ៉ា ទេសរដ្ឋមន្រ្តី ទទួលបន្ទុក បេសកកម្ម ពិសេស អនុប្រធានទី ២ នៃក្រុមប្រឹក្សាអភិវឌ្ឍន៍កម្ពុជា (ក.អ.ក.) និងលោកជំទាវ Vladanka Andreeva តំណាងប្រធានសម្របសម្រួលប្រព័ន្ធអង្គការសហប្រជាជាតិប្រចាំកម្ពុជា (UN Resident Coordinator to Cambodia) បានដឹកនាំកិច្ចប្រជុំលើកទី១ នៃគណៈកម្មាធិការដឹកនាំការងាររួម (1st Joint Steering Committee–JSC) ។ កិច្ចប្រជុំនេះមានគោលបំណង ពិនិត្យនិងពិភាក្សាលើវឌ្ឍនភាពប្រចាំឆ្នាំ២០២៥ និងលើកទិសដៅការងារអាទិភាពឆ្នាំ២០២៦ នៃការអនុវត្ដក្របខ័ណ្ឌកិច្ចសហប្រតិបត្តិការអភិវឌ្ឍន៍ប្រកបដោយចីរភាពរបស់អង្គការសហប្រជាជាតិឆ្នាំ២០២៤-២០២៨ (United Nations Sustainable Development Cooperation Framework – UNSDCF 2024-2028) ។ កិច្ចប្រជុំនេះមានការអញ្ជើញចូលរួមពី ឯកឧត្តម លោកជំទាវ លោក លោកស្រីតំណាងក្រសួង-ស្ថាប័នពាក់ព័ន្ធរបស់រាជរដ្ឋាភិបាលចំនួន២៧ និងតំណាងជាន់ខ្ពស់មកពីបណ្ដាស្ថាប័ននៃអង្គការសហប្រជាជាតិ សរុប៩០ រូប ។
ជាកិច្ចចាប់ផ្ដើម ឯកឧត្តមទេសរដ្ឋមន្រ្ដី បានសម្តែងនូវការស្វាគមន៍យ៉ាងកក់ក្តៅចំពោះ ឯកឧត្តម លោកជំទាវ លោក លោកស្រីតំណាងក្រសួង-ស្ថាប័នពាក់ព័ន្ធ និងតំណាងជាន់ខ្ពស់មកពីបណ្ដាស្ថាប័ននៃអង្គការសហប្រជាជាតិ ដែលបានចំណាយពេលវេលាដ៏មានតម្លៃចូលរួមក្នុងកិច្ចប្រជុំនាព្រឹកនេះ និងបានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អរវាងរាជរដ្ឋាភិបាលកម្ពុជា និងប្រព័ន្ធអង្គការសហប្រជាជាតិដោយសម្រេចបានលទ្ធផលផ្លែផ្កាជាច្រើនតាមរយៈការអនុវត្តក្របខ័ណ្ឌកិច្ចសហប្រតិបត្តិការអភិវឌ្ឍន៍ប្រកបដោយចីរភាពរបស់អង្គការសហប្រជាជាតិឆ្នាំ២០២៤-២០២៨ (United Nations Sustainable Development Cooperation Framework 2024-2028) កន្លងមក ។ ឯកឧត្តមទេសរដ្ឋមន្រ្ដីបានរំព្ញកជូនអង្គប្រជុំពីសាវតា និងសារៈសំខាន់នៃការបង្កើតគណៈកម្មាធិការដឹកនាំការងាររួម ដែលមានតួនាទីក្នុងការពិនិត្យ តាមដានវឌ្ឍនភាព និងផ្ដល់អនុសាសន៍ជាមូលដ្ឋានដើម្បីដោះស្រាយបញ្ហាប្រឈមនានាក្នុងអំឡុងពេលនៃការអនុវត្ដ UNSDCF 2024-2028 ។
ទន្ទឹមនឹងនេះ លោកជំទាវ Vladanka Andreeva បានបង្ហាញការកោតសរសើរចំពោះការអភិវឌ្ឍន៍យ៉ាងឆាប់រហ័សរបស់កម្ពុជាលើគ្រប់វិស័យ និងកត់ត្រានូវរាល់អនុសាសន៍របស់អង្គប្រជុំ ដើម្បីធានាការអនុវត្តផែនការអាទិភាពឆ្នាំ ២០២៦ ទទួលបានលទ្ធផលកាន់តែប្រសើរឡើង ។ លោកជំទាវបានមានប្រសាសន៍បន្ថែមថា៖ «កិច្ចប្រជុំគណៈកម្មាធិការដឹកនាំការងាររួម គឺជាឱកាសដ៏សំខាន់មួយសម្រាប់ពិនិត្យឡើងវិញនូវសមិទ្ធផលដែលយើងសម្រេចបានរួមគ្នាក្នុងឆ្នាំ២០២៥កន្លងមក ព្រមទាំងឯកភាពលើអាទិភាពឆ្នាំ២០២៦ ។ អង្គការសហប្រជាជាតិ នៅតែបន្តប្តេជ្ញាធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា និងដៃគូពាក់ព័ន្ធ ដើម្បីសម្រេចលទ្ធផលជាក់ស្តែងសម្រាប់ប្រជាជន និងគាំទ្រដល់វឌ្ឍនភាពឆ្ពោះទៅរកគោលដៅអភិវឌ្ឍន៍ប្រកបដោយចីរភាព…»
អង្គប្រជុំបានប្រព្រឹត្តទៅដោយទទួលបានលទ្ធផលផ្លែផ្កា តាមរយៈបទបង្ហាញ និងកិច្ចពិភាក្សាផុលផុសពីតួអង្គពាក់ព័ន្ធ ព្រមទាំងការកំណត់អាទិភាពជំហានបន្ទាប់ ។ ទន្ទឹមនេះអង្គប្រជុំបានអនុម័តលក្ខខណ្ឌយោងការងាររបស់គណៈកម្មាធិការដឹកនាំការងាររួម (JSC’s Term of Reference) ដែលនឹងក្លាយជាយន្ដការសម្រាប់បង្កើនប្រសិទ្ធភាពការសម្របសម្រួល និងតាមដាន នៃការអនុវត្តក្របខ័ណ្ឌកិច្ចសហប្រតិបត្តិការអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ ឆ្នាំ២០២៤-២០២៨ ។ ជាមួយគ្នានេះ អង្គប្រជុំបានវាយតម្លៃខ្ពស់ចំពោះសមិទ្ធផលសម្រេចបានក្នុងឆ្នាំ២០២៥ នៃការអនុវត្តក្របខ័ណ្ឌកិច្ចសហប្រតិបត្តិការអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ ឆ្នាំ២០២៤-២០២៨ ពិសេសការចូលរួមរបស់ភាគីពាក់ព័ន្ធក្នុងការជម្រុញការអភិវឌ្ឍក្នុងវិស័យ និងអនុវិស័យមួយចំនួនដូចជា វិស័យសុខាភិបាល, វិស័យអប់រំ, វិស័យបរិស្ថាន, វិស័យពិការភាព, ការអភិវឌ្ឍធនធានមនុស្ស , ការលើកម្ពស់ប្រព័ន្ធគាំពារសង្គម , ប្រព័ន្ធអភិបាលកិច្ច និងការបោសសំអាតមីន ។ សមិទ្ធផលទាំងនេះពិតជាបានបំពេញបន្ថែមដល់កិច្ចខិតខំប្រឹងប្រែងរបស់រាជរដ្ឋាភិបាលក្នុងការជម្រុញកំណើនសេដ្ឋកិច្ចប្រកបដោយចីរភាព ។
អង្គប្រជុំបានរំលេចនូវអាទិភាពជាយុទ្ធសាស្រ្ដចំនួន ៣ ក្នុងការអនុវត្ដកិច្ចការងារបន្ដរបស់ UNSDCF 2024-2028 រួមមាន៖
១. ត្រូវបន្ដពង្រឹងភាពស៊ីសង្វាក់គ្នារវាងអាទិភាពគោលនយោបាយ និងការអនុវត្ត ជាពិសេសនៅកម្រិតថ្នាក់ក្រោមជាតិ ដើម្បីធានាឱ្យលទ្ធផលដែលសម្រេចបានមានប្រសិទ្ធភាពខ្ពស់ និងឆ្លើយតបទៅនឹងតម្រូវការរបស់ប្រជាពលរដ្ឋ ។
២. ត្រូវលើកកម្ពស់ប្រសិទ្ធភាពនៃការប្រើប្រាស់ហិរញ្ញប្បទានសហប្រតិបត្តិការអភិវឌ្ឍន៍ ជាពិសេសក្នុងបរិបទនៃបម្រែបម្រួលទិដ្ឋភាពហិរញ្ញវត្ថុសកល ។ ក្នុងនោះរួមមាន ការកៀរគរហិរញ្ញប្បទានប្រកបដោយនវានុវត្តន៍ ការពង្រឹងការគ្រប់គ្រងហិរញ្ញវត្ថុសាធារណៈ និងតម្រឹមការប្រើប្រាស់ធនធានឱ្យស្របតាមអាទិភាពអភិវឌ្ឍន៍ជាតិ ។
៣. ត្រូវពន្លឿនការអនុវត្ដការងារក្រោមអភិក្រមអន្ដវិស័យ ដើម្បីដោះស្រាយបញ្ហាប្រឈមនានាដូចជា ការប្រែប្រួលអាកាសធាតុ កិច្ចគាំពារសង្គម និងបរិវត្តកម្មសេដ្ឋកិច្ច ។
ជាកិច្ចបញ្ចប់, ឯកឧត្តមទេសរដ្ឋមន្រ្ដី បានវាយតម្លៃខ្ពស់ និងកោតសរសើរចំពោះការចូលរួមយ៉ាងសកម្មពីតំណាងក្រសួង-ស្ថាប័ន, និងតំណាងបណ្ដាស្ថាប័ននៃអង្គការសហប្រជាជាតិក្នុងកិច្ចប្រជុំនេះ ។ ជាមួយគ្នានេះ ឯកឧត្តម បានសម្ដែងការជឿជាក់ថា កិច្ចប្រជុំលើកទី១នេះ នឹងចូលរួមចំណែកក្នុងការពង្រឹង ការអនុវត្ដក្របខ័ណ្ឌកិច្ចសហប្រតិបត្តិការអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ ឆ្នាំ២០២៤-២០២៨ ឱ្យកាន់តែមានប្រសិទ្ធភាពខ្ពស់។