Zillion

Everton សម្រេចបញ្ចប់តំណែងអ្នកចាត់ការ Frank Lampard

ក្លិប​ Everton បានសម្រេច​បញ្ចប់​តំណែង​អ្នកចាត់ការ Frank Lampard ហើយ​ក្រោយ​ដឹកនាំ​ក្រុមមិនបានល្អ ក្រោយបរាជ័យចំនួន៩ប្រកួត ក្នុង ១២ប្រកួត​ចុងក្រោយ​នៅ Premier League និងចុង​​ចាញ់ក្រោម​ស្នាដៃ West Ham កាលពី​ថ្ងៃ​សៅរ៍​ផងដែរ ។

បច្ចុប្បន្ននេះ Everton ឈរ​លេខ១៩ មាន ១៥ពិន្ទុ​ស្មើ​ជាមួយ​ក្រុម​បាត​តារាង Southampton បន្ទាប់ពី​ការប្រកួត​ចំនួន ២០ប្រកួត​រដូវ​កាល​នេះ​។ ​អតីត​ខ្សែបម្រើ​ក្រុម​ជម្រើសជាតិ​អង់គ្លេស​វ័យ ៤៤ឆ្នាំ​រូបនេះបានមក​ជំនួស​តំណែង​លោក Rafael Benitez កាលពី​ខែមករា​ ឆ្នាំ២០២២ នៅពេលដែល Everton ឈរ​លេខ ១៦ នៅពេលនោះ និង​ជួយ Everton រួច​ផុតពី​ការ​កាត់​ចោល​។

​​ក្រោម​ការដឹកនាំ​របស់ Frank Lampard នៅ Everton សរុប​ចំនួន ៣៨ប្រកួត​រួមមាន​ឈ្នះ ៩ ស្មើ ៨ ចាញ់ ២១ ដែលជា​ស្ថិតិ​ជា​មធ្យម​ដ៏​អាក្រក់​មួយ​បើ​ប្រៀបធៀប​នឹង​អ្នកចាត់ការ​មុនៗ​។ ​Everton នៅពេលនេះ​កំពុង​ស្វែងរក​អ្នកចាត់ការ​ថ្មី​ជា​ចាំបាច់ ហើយ​មនុស្ស​ ៣នាក់​ត្រូវបាន​គេ​រំពឹងថា​នឹង​អាច​ក្លាយជា​អ្នកចាត់ការ​បន្ត​ពី Lampard រួមមាន Wayne Rooney, Marcelo Bielsa និង Sean Dyche៕