Zillion

Barcelona ចង់លក់ Raphinha ទៅឲ្យ Arsenal

ក្លឹប​អ្នក​មាន​បុណ្យ Barcelona ត្រូវ​បាន​គេ​រាយការណ៍​ថា ទាម​ទារ​ប្រាក់​រហូត​ដល់​ទៅ 100 លាន​អឺរ៉ូ លើ​​ការ​លក់​ខ្សែ​ប្រយុទ្ធ​ Raphinha ទៅ​ឲ្យ​ក្លឹប​កាំភ្លើងធំ Arsenal។

​ក្រុម​ដែល​កំពុង​ឈរ​នៅ​កំពូល​តារាង​នៃ​ក្របខ័ណ្ឌ Premier League បាន​ងាក​មក​ចាប់​អារម្មណ៍​លើ Raphinha ជា​ថ្មី​ម្ដង​ទៀត​បន្ទាប់​ពី​ពួក​គេ​បាន​ខកខាន​ក្នុង​ការ​ចុះ​ហត្ថលេខា​លើកីឡាករសញ្ជាតិអ៊ុយក្រែន Mykhaylo Mudryk ខណៈដែល​កីឡាករ​រូប​នេះ​បានសម្រេចផ្ទេរ​ទៅក្លឹប​តោខៀវ Chelsea។

Raphinha ជា​អតីត​កីឡាករ​របស់​ក្លឹប Rennes បាន​ស៊ុតបញ្ចូលទី 11 គ្រាប់ និង​ជួយ​ឲ្យ Leeds United បន្ត​នៅ​ក្នុង​ការ​ប្រកួត​ប្រជែង​ក្របខណ្ឌ Premier League កាល​ពី​រដូវកាល​មុន តែយ៉ាង​ណា Raphinha បាន​សម្រេច​ចិត្ត​ផ្ទេរ​ទៅ​ទឹកដី​អេស្ប៉ាញ​ដោយ​ចូលរួម​ជាមួយ Barcelona។

សូមជម្រាបផងដែរថា ខ្សែ​ប្រយុទ្ធ​សញ្ជាតិ​ប្រេស៊ីល​រូប​នេះ នៅ​មាន​កុងត្រា​ជាមួយ Barcelona រហូត​ដល់​ឆ្នាំ 2027 ហើយ​ក្លឹប​នឹង​មិន​បង្ខំ​ចិត្ត​លក់​គាត់​ក្នុង​តម្លៃ​ថោក​នោះ​ឡើយ។ ដោយ​យោងតាម​របាយការណ៍​ពី Sports mole  បាន​អះអាង​ថា ប្រសិន​បើ Arsenal ចង់​បាន Raphinha នោះ​ពួក​គេ​នឹង​ត្រូវ​ចំណាយ​ប្រាក់​មិន​ក្រោម 100 លានអឺរ៉ូ​ឡើយ ដែល​តម្លៃ​នេះ​ស្មើ​នឹង​តម្លៃ​ផ្ទេរ Mykhaylo Mudryk ដែរ៕