ឯកឧត្តម ឧត្តមសេនីយ៍ឯក ឃឹង សារ៉ាត់ និងលោកជំទាវ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អញ្ជើញដង្ហែអង្គកឋិនទានសាមគ្គី វេរប្រគេនព្រះសង្ឃគង់ចាំព្រះវស្សាក្នុងពុទ្ធសីមាវត្តអង្គ ខេត្តតាកែវ ប្រមូលបច្ច័យសរុបចំនួនជាង ៦៦ លានរៀល

នៅព្រឹកថ្ងៃអាទិត្យ ទី០១ ខែវិច្ឆិកា ឆ្នាំ២០២៦ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន នៃអគ្គស្នងការដ្ឋាននគរបាលជាតិ និងលោកជំទាវ ឆាយ សាលីន បានអញ្ជើញជាតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ រួមជាមួយមន្ត្រីរាជការ អាជ្ញាធរដែនដី និងពុទ្ធបរិស័ទជិតឆ្ងាយ ដង្ហែអង្គកឋិនទានមហាសាមគ្គី វេរប្រគេនព្រះភិក្ខុសង្ឃដែលគង់ចាំព្រះវស្សាអស់ត្រីមាស ក្នុងពុទ្ធសីមាវត្តអង្គ ស្ថិតក្នុងភូមិតានន ឃុំត្នោត ស្រុកបាទី ខេត្តតាកែវ ស្របតាមពុទ្ធានុញ្ញាត និងប្រពៃណីព្រះពុទ្ធសាសនា។
ពិធីដង្ហែអង្គកឋិនទានត្រូវបានរៀបចំឡើងយ៉ាងអធិកអធម អមដំណើរដោយក្រុមតន្ត្រីឆៃយាំប្រពៃណីខ្មែរយ៉ាងកងរំពង។ ឯកឧត្តម និងលោកជំទាវ បានដឹកនាំពុទ្ធបរិស័ទដង្ហែត្រៃចីវរ និងទេយ្យវត្ថុប្រទក្សិណជុំវិញព្រះវិហារចំនួន ៣ ជុំ បន្ទាប់មកបានចូលទៅកាន់ព្រះវិហារ អុជធូបទៀន ថ្វាយគ្រឿងសក្ការបូជាចំពោះព្រះពុទ្ធបដិមា នមស្សការព្រះរតនត្រ័យ សមាទានសីលប្រាំ និងអារាធនាព្រះសង្ឃចម្រើនព្រះបរិត្ត ដើម្បីបណ្តេញឧបទ្រពចង្រៃ ព្រមទាំងបួងសួងសុំសិរីសួស្តី ជ័យមង្គល វិបុលសុខជូនដល់ប្រជាជាតិខ្មែរ។
ថ្លែងសំណេះសំណាលក្នុងឱកាសនោះ ឯកឧត្តម ឧត្តមសេនីយ៍ឯក ឃឹង សារ៉ាត់ បានពាំនាំនូវការផ្តាំផ្ញើសួរសុខទុក្ខ និងក្តីនឹករលឹកពីសំណាក់ ឯកឧត្តម នាយឧត្តមសេនីយ៍ ស ថេត និងលោកជំទាវ ជូនចំពោះព្រះសង្ឃ អាជ្ញាធរដែនដី និងបងប្អូនប្រជាពលរដ្ឋទាំងអស់។ ឯកឧត្តមបានគូសបញ្ជាក់ថា ភាពសុខសាន្ត និងការប្រារព្ធពិធីបុណ្យទានដ៏អធិកអធមនេះ គឺមិនអាចកាត់ផ្តាច់ចេញពី «សុខសន្តិភាព» បានឡើយ ដែលជាសមិទ្ធផលកើតចេញពីនយោបាយឈ្នះ-ឈ្នះ ដឹកនាំដោយ សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា។
ទន្ទឹមនឹងនេះ បច្ចុប្បន្នក្រោមការដឹកនាំដ៏ស្វាហាប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រាជរដ្ឋាភិបាលនីតិកាលទី៧ បាននិងកំពុងអនុវត្តយុទ្ធសាស្ត្របញ្ចកោណ-ដំណាក់កាលទី១ ដើម្បីជំរុញការអភិវឌ្ឍសង្គមជាតិ។ ក្រោមម្លប់សន្តិភាព វិស័យពុទ្ធចក្រ និងអាណាចក្រតែងតែដើរទន្ទឹមគ្នា ដោយវត្តអារាមនៅតែជាថ្នាលបណ្តុះបណ្តាលសីលធម៌ និងជាទីពឹងផ្លូវចិត្តយ៉ាងសំខាន់របស់ពលរដ្ឋ។ ឯកឧត្តមក៏បានថ្លែងអំណរគុណយ៉ាងជ្រាលជ្រៅចំពោះសទ្ធាជ្រះថ្លារបស់ពុទ្ធបរិស័ទទាំងអស់ ដែលបានរួមសាមគ្គីគ្នារៀបចំអង្គកឋិនទាននេះឡើង។
ជាកិច្ចបញ្ចប់ ឯកឧត្តម ឧត្តមសេនីយ៍ឯក ឃឹង សារ៉ាត់ និងលោកជំទាវ បានប្រគេនអង្គកឋិនទាន ត្រៃចីវរ ព្រមទាំងបច្ច័យសង្កត់ត្រៃ និងបច្ច័យសាមគ្គីសរុបចំនួនជាង ៦៦ លានរៀល វេរប្រគេនដល់ព្រះសង្ឃ ដើម្បីទុកចាត់ចែងកសាងសមិទ្ធផលនានាក្នុងវត្តអង្គ ជាមួយគ្នានោះ ឯកឧត្តម និងលោកជំទាវ ក៏បាននាំយកថវិកា និងទេយ្យទានមួយចំនួន ឧបត្ថម្ភជូនដល់លោកយាយ លោកតា ចាស់ព្រឹទ្ធាចារ្យ យុវជន និងកងកម្លាំងប្រជាការពារដែលបានចូលរួមសម្របសម្រួលក្នុងពិធីបុណ្យនេះផងដែរ