ឯកឧត្តម ឧត្តមសេនីយ៍ឯក ឃឹង សារ៉ាត់ និងលោកជំទាវ ឆាយ សាលីន អញ្ជើញចូលរួមកាន់បិណ្ឌវេនទី៦ នៅវត្តអង្គកំណប់ ខេត្តតាកែវ

នៅព្រឹកថ្ងៃទី០២ ខែតុលា ឆ្នាំ២០២៦ ត្រូវនឹងថ្ងៃកាន់បិណ្ឌវេនទី៦ នៃពិធីបុណ្យភ្ជុំបិណ្ឌ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន នៃអគ្គស្នងការដ្ឋាននគរបាលជាតិ និងលោកជំទាវ ឆាយ សាលីន ព្រមទាំងសហការី និងពុទ្ធបរិស័ទចំណុះជើងវត្ត បាននាំយកទេយ្យវត្ថុ ចង្ហាន់ និងបច្ច័យ ទៅវេរប្រគេនព្រះសង្ឃក្នុងពិធីបុណ្យកាន់បិណ្ឌវេនទី៦ នៅវត្តអង្គកំណប់ ស្ថិតក្នុងភូមិស្វាខម ឃុំដូង ស្រុកបាទី ខេត្តតាកែវ។

ក្នុងឱកាសដ៏វិសេសវិសាលនោះ មុននឹងប្រារព្ធពិធីរាប់បាតប្រគេនព្រះសង្ឃ ឯកឧត្តម និងលោកជំទាវ បានប្រារព្ធពិធីបង្សុកូលឧទ្ទិសកុសលជូនចំពោះ ឧបាសក ឃឹង ពួយ និងឧបាសិកា ស ធឿង ដែលត្រូវជាមាតាបិតាបង្កើត ព្រមទាំងឧទ្ទិសកុសលដល់ដួងវិញ្ញាណក្ខន្ធវីរកងទ័ពកម្ពុជា ដែលបានពលីជីវិតបូជាសាច់ស្រស់ឈាមស្រស់ក្នុងការការពារបូរណភាពទឹកដីមាតុភូមិកន្លងមក​ សូមឱ្យដួងវិញ្ញាណក្ខន្ធអ្នកមានគុណ និងបុព្វបុរសយុទ្ធជនទាំងអស់ បានទទួលនូវចំណែកបុណ្យកុសល និងទៅសោយសុខក្នុងឋានបរមសុខ កុំបីឃ្លៀងឃ្លាតឡើយ។

បន្ទាប់ពីបានអុជធូប ថ្វាយផ្កាភ្ញីចំពោះព្រះពុទ្ធរូប និងបំពេញកិច្ចសាសនាតាមទំនៀមទម្លាប់រួចមក ឯកឧត្តម ឧត្តមសេនីយ៍ឯក ឃឹង សារ៉ាត់ និងលោកជំទាវ ឆាយ សាលីន បាននាំយកទេយ្យវត្ថុ គ្រឿងឧបភោគបរិភោគជាច្រើនមុខ បច្ច័យ និងរៀបចំចង្ហាន់ប្រគេនព្រះសង្ឃ ព្រមទាំងបានចែកអំណោយជូនដល់លោកយាយជីលោកតាជីដែលបានចូលរួមក្នុងពិធីបុណ្យនោះផងដែរ។

សូមបញ្ជាក់ថា ពិធីបុណ្យភ្ជុំបិណ្ឌ គឺជាពិធីបុណ្យប្រពៃណីព្រះពុទ្ធសាសនាដ៏ធំមួយរបស់ប្រទេសកម្ពុជា ដែលប្រារព្ធឡើងចាប់ពីថ្ងៃ ១រោច ដល់ថ្ងៃ ១៥រោច ខែភទ្របទ ដោយមានការចូលរួមយ៉ាងផុសផុលពីសំណាក់ពុទ្ធបរិស័ទគ្រប់ទិសទី ក្នុងស្មារតីដឹងគុណូបការៈ និងឧទ្ទិសកុសលជូនដល់បុព្វការីជន និងញាតិកាលទាំងប្រាំពីរសន្តាន។

ពិធីបុណ្យប្រចាំឆ្នាំដែលមានរយៈពេល ១៥ថ្ងៃនេះ បែងចែកជាពីរដំណាក់កាលសំខាន់ៗ គឺពិធីកាន់បិណ្ឌ (ចាប់ពីថ្ងៃ ១រោច ដល់ថ្ងៃ ១៤រោច) និងថ្ងៃភ្ជុំបិណ្ឌធំ (ថ្ងៃ ១៥រោច)។ ក្រៅពីកិច្ចវឌ្ឍនភាពខាងសាសនា ពិធីបុណ្យនេះក៏បានឆ្លុះបញ្ចាំងពីអត្តសញ្ញាណវប្បធម៌ខ្មែរយ៉ាងច្បាស់លាស់ តាមរយៈការធ្វើនំប្រពៃណី ដូចជានំអន្សម និងនំបត់ ព្រមទាំងការរៀបចំកន្ទោង ឬសំពៅបណ្តែតទឹកជូនដំណើរដូនតា។ បុណ្យភ្ជុំបិណ្ឌមិនត្រឹមតែជាកាតព្វកិច្ចខាងជំនឿសាសនាប៉ុណ្ណោះទេ ប៉ុន្តែជាកម្លាំងចលករដ៏សំខាន់ក្នុងការរឹតចំណងសាមគ្គីភាពគ្រួសារ លើកកម្ពស់សីលធម៌នៃការដឹងគុណ និងថែរក្សាកេរដំណែលវប្បធម៌ដូនតាឱ្យស្ថិតស្ថេរគង់វង្សតរៀងទៅ៕