ឯកឧត្តម ទេសរដ្ឋមន្រ្តី គន់ គីម អញ្ជើញដឹកនាំកិច្ចប្រជុំពិនិត្យវឌ្ឍនភាពការងារ ត្រៀមរៀបចំកិច្ចប្រជុំគណៈកម្មាធិការប្រតិបត្តិ លើកទី៣៨ និងមហាសន្និបាត VECONAC លើកទី២៥

នៅថ្ងៃទី១១ ខែសីហា ឆ្នាំ២០២៦ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន អគ្គលេខាធិការសមាគមអតីតយុទ្ធជន និងនិវត្តជនកម្ពុជា និងជាប្រធានប្តូរវេន VECONAC បានអញ្ជើញជាអធិបតីដឹកនាំកិច្ចប្រជុំ ដើម្បីស្តាប់របាយការណ៍ និងពិនិត្យមើលវឌ្ឍនភាពការងាររបស់លេខាធិការដ្ឋាន VECONAC ២០២៦ត្រៀមលក្ខណៈធ្វើជាម្ចាស់ផ្ទះនៃកិច្ចប្រជុំក្រុមប្រឹក្សាប្រតិបត្តិលើកទី៣៨ និងមហាសន្និបាតលើកទី២៥ នៃសហព័ន្ធអតីតយុទ្ធជនអាស៊ាន (VECONAC) ដែលគ្រោងប្រព្រឹត្តទៅនាដើមខែតុលា ឆ្នាំ២០២៦ នៅរាជធានីភ្នំពេញ។

ពិធីនេះបានប្រព្រឹត្តទៅនៅសាលប្រជុំទីស្នាក់ការកណ្តាលសមាគមអតីតយុទ្ធជន និងនិវត្តជនកម្ពុជា ស្ថិតក្នុងភូមិស្លាបតាអោន ឃុំគគីរ ស្រុកកៀនស្វាយ ខេត្តកណ្តាល ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាថ្នាក់ដឹកនាំ និងមន្ត្រីថ្នាក់កណ្តាលនៃសមាគមអតីតយុទ្ធជន និងនិវត្តជនកម្ពុជា ព្រមទាំងក្រុមការងារលេខាធិការដ្ឋាន VECONAC ឆ្នាំ២០២៦។

នៅក្នុងឱកាសនោះ ឯកឧត្តម ទេសរដ្ឋមន្រ្តី គន់ គីម ប្រធានប្តូរវេន VECONAC​ មានប្រសាសន៍ថា ការទទួលធ្វើជាម្ចាស់ផ្ទះរៀបចំកិច្ចប្រជុំថ្នាក់តំបន់ VECONAC ២០២៦ នៅខែតុលា ២០២៦ ខាងមុខនេះ គឺជាកិត្តិយសសម្រាប់ប្រទេសជាតិកម្ពុជា និងសមាគមអតីតយុទ្ធជន និងនិវត្តជនកម្ពុជា។

ឯកឧត្តម ទេសរដ្ឋមន្រ្តី បានណែនាំឱ្យក្រុមការងារជំនាញគ្រប់ផ្នែក និងផ្នែកទាក់ទងទ នៃលេខាធិការដ្ឋានទាំងអស់ ត្រូវខិតខំប្រឹងប្រែងយកចិត្តទុកដាក់បំពេញភារកិច្ចតាមផ្នែករៀងៗខ្លួនដោយស្មារតីទទួលខុសត្រូវខ្ពស់ លើការងារការបរទេស ពិធីការ ការស្នាក់នៅ ការពារសន្តិសុខសុវត្ថិភាព ខ្លឹមសារកិច្ចប្រជុំ និងផ្សព្វផ្សាយ ដើម្បីធានាឱ្យព្រឹត្តិការណ៍នេះ ប្រព្រឹត្តទៅដោយរលូន និងទទួលបានលទ្ធផលល្អ។

សូមជម្រាបថា កិច្ចប្រជុំសហព័ន្ធអតីតយុទ្ធជននៃបណ្តាប្រទេសអាស៊ាន (VECONAC) ធ្វើឡើងក្នុងគោលដៅចម្បងរួមមាន៖ ពង្រឹងសុខុមាលភាព និងជីវភាពអតីតយុទ្ធជន, កិច្ចសហប្រតិបត្តិការ និងមិត្តភាពរវាងសមាគមអតីតយុទ្ធជន, ការគាំទ្រ និងការការពារសិទ្ធិអតីតយុទ្ធជន, ការចូលរួមចំណែកក្នុងសន្តិសុខ និងសន្តិភាពតំបន់ និងការផ្លាស់ប្តូរវេនធ្វើជាប្រធាន និងការអនុម័តសេចក្តីសម្រេច៕