ឯកឧត្តមឧបនាយករដ្ឋមន្ត្រី សាយ សំអាល់ អញ្ជើញជាអធិបតីក្នុងកម្មវិធីជំនួបវាគ្មិនពិសេស «មនសិការពលរដ្ឋល្អ» នៅខេត្តព្រះសីហនុ

ខេត្តព្រះសីហនុ៖ គណៈកម្មាធិការសហភាពសហព័ន្ធយុវជនកម្ពុជា (ស.ស.យ.ក.) សហការជាមួយរដ្ឋបាលខេត្តព្រះសីហនុ បានរៀបចំពិធីសំណេះសំណាល និងកម្មវិធីជំនួបវាគ្មិនពិសេស ក្រោមប្រធានបទ «មនសិការពលរដ្ឋល្អ» យ៉ាងគគ្រឹកគគ្រេង ថ្ងៃទី០៦ ខែមិថុនា ឆ្នាំ២០២៦ ។

ពិធីនេះបានប្រព្រឹត្តទៅក្រោមអធិបតីភាពរបស់ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ និងជាអនុប្រធានសហភាពសហព័ន្ធយុវជនកម្ពុជា។ ក៏មានការអញ្ជើញចូលរួមពី ឯកឧត្តមប្រធានក្រុមប្រឹក្សាខេត្តព្រះសីហនុ ឯកឧត្តមអភិបាល នៃគណៈអភិបាលខេត្តព្រះសីហនុ ឯកឧត្តម លោកជំទាវ លោក លោកស្រី ជាថ្នាក់ដឹកនាំ មន្ត្រីរាជការ ព្រមទាំងយុវជន និងសមាជិក ស.ស.យ.ក. ។

កម្មវិធីជំនួបវាគ្មិនពិសេសនេះ ត្រូវបានរៀបចំឡើងក្នុងគោលបំណង បំផុសស្មារតីស្នេហាជាតិ លើកកម្ពស់សីលធម៌សង្គម និងពង្រឹងការយល់ដឹងអំពីកាតព្វកិច្ចរបស់បុគ្គលម្នាក់ៗក្នុងនាមជាពលរដ្ឋល្អ។

នៅក្នុងឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ បានចែករំលែកនូវបទពិសោធន៍ ព្រមទាំងទស្សនទានសំខាន់ៗទៅកាន់អង្គពិធី ជាពិសេសស្រទាប់យុវជន ដោយបានសង្កត់ធ្ងន់លើចំណុចគន្លឹះចំនួន ៣ រួមមាន៖

1. ការចូលរួមអភិវឌ្ឍន៍សហគមន៍ ការដើរតួជាកម្លាំងចលករក្នុងការថែរក្សាសន្តិសុខ សណ្តាប់ធ្នាប់ និងការចូលរួមសម្អាតអនាម័យបរិស្ថាននៅក្នុងខេត្តព្រះសីហនុ ដែលជាទីក្រុងទេសចរណ៍ និងសេដ្ឋកិច្ចដ៏សំខាន់។

2. ការគោរពច្បាប់ និងបទដ្ឋានសង្គម ការបង្ហាញគំរូទន់ភ្លន់តែម៉ឺងម៉ាត់ក្នុងការគោរពច្បាប់ចរាចរណ៍ ការជៀសវាងពីគ្រឿងញៀន និងល្បែងស៊ីសងគ្រប់ប្រភេទ។

3. ការអភិវឌ្ឍសមត្ថភាពផ្ទាល់ខ្លួន ការពង្រឹងចំណេះដឹង និងបច្ចេកវិទ្យាដើម្បីដើរឲ្យទាន់ការវិវត្តនៃសង្គមឌីជីថល ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល។

«មនសិការពលរដ្ឋល្អ មិនមែនកើតឡើងដោយឯកឯងនោះទេ តែវាផ្តើមចេញពីការស្រឡាញ់ ប្តេជ្ញាចិត្ត និងការលះបង់របស់បុគ្គលម្នាក់ៗ ដើម្បីឧត្តមប្រយោជន៍រួមនៃសង្គមជាតិទាំងមូល។»

ពិធីសំណេះសំណាលនេះ បានបញ្ចប់ទៅយ៉ាងល្អ ថ្នាក់ដឹកនាំ និងអ្នកចូលរួមទាំងអស់ បានបង្ហាញការប្តេជ្ញាចិត្តយ៉ាងមុតមាំក្នុងការនាំយកសារ និងស្មារតីនៃ «មនសិការពលរដ្ឋល្អ» នេះ ទៅផ្សព្វផ្សាយ និងអនុវត្តជាក់ស្តែងនៅក្នុងមូលដ្ឋាន រង្វង់គ្រួសារ និងសហគមន៍ រៀងៗខ្លួន ដើម្បីរួមចំណែកធ្វើឲ្យខេត្តព្រះសីហនុកាន់តែមានការអភិវឌ្ឍ ប្រកបដោយភាពស៊ីវិល័យ និងសុភមង្គល៕

អត្ថបទ:ស្រីមុំ