ឯកអគ្គរាជទូតម៉ាឡេស៊ី និងរដ្ឋបាលខេត្តព្រះសីហនុ បើកយុទ្ធនាការមនុស្សធម៌ វះកាត់មាត់ឆែបជូនកុមារក្រីក្រដោយឥតគិតថ្លៃ!

ខេត្តព្រះសីហនុ: នាព្រឹកថ្ងៃអាទិត្យ ទី១០ ខែឧសភា ឆ្នាំ២០២៦ នៅមន្ទីរពេទ្យបង្អែកខេត្តព្រះសីហនុ មានរៀបចំពិធីបើកយុទ្ធនាការមនុស្សធម៌ ពិនិត្យ និងវះកាត់ដោយឥតគិតថ្លៃ ជូនដល់អ្នកជំងឺមាត់ឆែប ក្រអូមមាត់ឆែប និងពិការភាពមុខមាត់ផ្សេងៗ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម Shaharuddin Onn ឯកអគ្គរាជទូតវិសាមញ្ញ និងពេញសមត្ថភាពនៃប្រទេសម៉ាឡេស៊ី ប្រចាំព្រះរាជាណាចក្រកម្ពុជា និងលោកជំទាវ ព្រមទាំង លោក ឯម ភាព អភិបាលរងនៃគណៈអភិបាលខេត្តព្រះសីហនុ។
​បេសកកម្មមនុស្សធម៌ដែលផ្តល់ពន្លឺសង្ឃឹមដល់កុមារកម្ពុជា
​យុទ្ធនាការដ៏មានសារៈសំខាន់នេះ រៀបចំឡើងដោយ អង្គការស្នាមញញឹមកម្ពុជា (Smile Cambodia) ដែលជាអង្គការឈានមុខក្នុងការផ្តល់សេវាកម្មវះកាត់មាត់ឆែបជូនដល់ទារក និងកុមារដែលមានជីវភាពខ្វះខាត។ ចាប់តាំងពីការបង្កើតឡើងក្នុងឆ្នាំ២០០២ អង្គការសម្រេចបាននូវជោគជ័យយ៉ាងធំធេងដោយបានផ្តល់ការវះកាត់ជូនកុមារបានជាង ៥,០០០នាក់។ នេះគឺជាបេសកកម្មលើកទី១៥ របស់អង្គការនៅកម្ពុជា និងជាលើកទី២ សម្រាប់ខេត្តព្រះសីហនុ ដោយយុទ្ធនាការនេះមានរយៈពេល ៣ថ្ងៃ ចាប់ពីថ្ងៃទី១០ ដល់ថ្ងៃទី១៣ ខែឧសភា ឆ្នាំ២០២៦។
​
​ក្នុងឱកាសនោះ ឯកឧត្តម Shaharuddin Onn បានសម្តែងនូវក្តីរំភើបសប្បាយរីករាយ និងបានថ្លែងអំណរគុណយ៉ាងជ្រាលជ្រៅចំពោះរដ្ឋបាលខេត្ត មន្ទីរសុខាភិបាលខេត្ត ព្រមទាំងក្រុមគ្រូពេទ្យស្ម័គ្រចិត្តពីប្រទេសម៉ាឡេស៊ី និងដៃគូឧបត្ថម្ភទាំងអស់។ ឯកឧត្តមបានគូសបញ្ជាក់ថា៖ «គោលបំណងចម្បងរបស់យើង គឺការកសាងភាពភ្លឺស្វាងរួមគ្នាសម្រាប់កុមារកម្ពុជា។ ម៉ាឡេស៊ី និងកម្ពុជា មិនត្រឹមតែជាដៃគូពាណិជ្ជកម្មដ៏ល្អប៉ុណ្ណោះទេ ប៉ុន្តែយើងក៏ជាដៃគូមនុស្សធម៌ដែលតែងតែឈរនៅក្បែរគ្នាជានិច្ច»។
​
​ជាការឆ្លើយតប លោក ឯម ភាព អភិបាលរងខេត្តព្រះសីហនុ បានពាំនាំនូវប្រសាសន៍ថ្លែងអំណរ គុណដល់ឯកឧត្តមឯកអគ្គរាជទូត ដែលបានដឹកនាំក្រុមគ្រូពេទ្យជំនាញមកជួយដល់កុមារក្នុងខេត្តព្រះសីហនុ។ លោកបានសង្កត់ធ្ងន់ថា ក្រោមការដឹកនាំប្រកបដោយចក្ខុវិស័យរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រាជរដ្ឋាភិបាលនីតិកាលទី៧ បានដាក់ចេញនូវគោលនយោបាយគាំពារសង្គមយ៉ាងរឹងមាំ។
​លោកអភិបាលរងបានបន្តថា រដ្ឋបាលខេត្តកំពុងខិតខំពង្រីកសេវាសុខាភិបាលឱ្យកាន់តែមានប្រសិទ្ធភាព ផ្តោតលើ៖
​សមធម៌ និងសុវត្ថិភាព៖ ធានាឱ្យបាននូវការថែទាំសុខភាពដល់គ្រប់ស្រទាប់វណ្ណៈ។
​សុខភាពមាតា និងទារក៖ ពង្រឹងការអន្តរាគមន៍លើអាហារូបត្ថម្ភ និងសុខភាពបន្តពូជ។
​ការបង្ការហានិភ័យហិរញ្ញវត្ថុ៖ ជួយសម្រាលបន្ទុកដល់គ្រួសារក្រីក្រតាមរយៈកម្មវិធីមូលនិធិសមធម៌សុខាភិបាល។

​ជាទីបញ្ចប់ គណៈអធិបតីបានប្រកាសបើកដំណើរការការវះកាត់ជាផ្លូវការ និងបានដើរសួរសុខទុក្ខក្រុមគ្រួសារអ្នកជំងឺ ដែលកំពុងរង់ចាំទទួលសេវាដោយក្តីសង្ឃឹមយ៉ាងមុតមាំចំពោះ «មុខមាត់ថ្មី និងស្នាមញញឹមថ្មី» សម្រាប់បុត្រធីតារបស់ពួកគេ៕

អត្ថបទ:មន សូត្រ
រូបភាព:វណ្ណថៃ