ឯកឧត្តម កែ គឹមយ៉ាន និងលោកជំទាវអញ្ជើញរាប់បាត្រឧទ្ទិសកុសលជូនដួងវិញ្ញាណក្ខន្ធបុព្វបុរស វីរៈកងទ័ពនិងវីរៈនគរបាល ដែលបានពលីជីវិតការពារទឹកដី

ខេត្តបន្ទាយមានជ័យ : នៅថ្ងៃទី១០ ខែមេសា ឆ្នាំ២០២៦ នេះ ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលខេត្តបន្ទាយមានជ័យ និងលោក​ជំទាវ​ ឧកញ៉ា​ អគ្គមហា​ឧបាសិកា​សិរីករុណាបទុមរតន៍​បណ្ឌិត​ ម៉ៅ​ ម៉ាល័យ​ អមដោយក្រុមការងារបានធ្វើពិធីសូត្រមន្ត បង្សុកូល រាប់បាត្រនិងវេរចង្ហាន់ប្រគេនដល់ព្រះសង្ឃ ដើម្បីឧទ្ទិសកុសលដល់បុព្វការីជន មហាបុព្វបុរសខ្មែរ វីរៈកងទ័ព នគរបាល ដែលបានធ្វើពលីក្នុងបុព្វហេតុការពារទឹកដីព្រមទាំងសំណេះសំណាលសួរសុខទុក្ខជាមួយមនុស្សវ័យចាស់ចំនួន ២០០នាក់ នៅសួនតេជោឈ្នះឈ្នះ ក្នុងសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។

ក្នុងឱកាសនោះ ឯកឧត្ដម កែ គឹមយ៉ាន បាននាំនូវបណ្តាំផ្ញើសួរសុខទុក្ខ នឹករលឹក លើកទឹកចិត្ត ជូនពរជ័យពីសម្ដេចតេជោ ហ៊ុន សែន ប្រធានព្រឹទ្ធសភា  សម្តេច ឃួន សុដារី ប្រធានរដ្ឋសភា និងសម្តេចធិបតី ហ៊ុន ម៉ាណែត នាយកដ្ឋមន្រ្តី នៃព្រះរាជាណាចក្រកម្ពុជាជូនដល់ប្រជាពលរដ្ឋទាំងអស់ ជាពិសេសបងប្អូនវ័យចាស់នៃមហាគ្រួសារ អ្នកខេត្តបន្ទាយមានជ័យ ។

ក្នុងឱកាសនោះដែរ ឯកឧត្តម កែ គឹមយ៉ាន និងលោកជំទាវបានថ្វាយនូវគ្រឿងសក្ការៈបូជាបួងសួងសុំសេចក្តីសុខសប្បាយ សំណាងល្អដល់ប្រជាពលរដ្ឋយើងទាំងអស់គ្នានិងបានរៀបពិធីរាប់បាត្រព្រះសង្ឃចំនួន១០៨អង្គ ដើម្បីឧទ្ទិសផលកុសលដល់ញាតិការទាំង៧សណ្តាន បុព្វបុរស​ បុព្វការី​ជន​ ដួងវិញ្ញាណក្ខន្ធរបស់យុទ្ធជនពលីក្នុងបុព្វហេតុជាតិមាតុភូមិទៅចាប់យោងយកនៅឋានបរមសុខកុំប្បីឃ្លៀងឃ្លាតឡើយ ។

ជាមួយគ្នានេះ ឯកឧត្តម កែ គឹមយ៉ាន បានសំណូមពរដល់អ្នកចូលរួមនិងប្រជាពលរដ្ឋទាំងអស់ឲ្យបន្តរក្សានូវស្មារតីសាមគ្គីភាព ឯកភាពជាតិ ជឿជាក់លើរាជរដ្ឋាភិបាល កុំជឿលើការឃោសនាអកុសលផ្សេងៗនិងក្នុងឱកាសឆ្នាំថ្មីសុំរួមគ្នាលេងល្បែងប្រជាប្រិយខ្មែរដើម្បីលើកកម្ពស់វប្បធម៌ដ៏ផូផង់របស់ខ្មែរយើង បើកបរដោយការអធ្យាស្រ័យ ចៀសឆ្ងាយមិនទៅប្រើគ្រឿងញៀន និងថែរក្សាសុខភាពក្នុងរដូវក្តៅនេះ។

ជាមួយគ្នានេះដែរ ជាមួយនឹងទឹកចិត្តសទ្ធាជ្រះថ្លា ឯកឧត្តម កែ គឹមយ៉ាន និងលោកជំទាវ ព្រមទាំងក្រុមគ្រួសារ បាននាំយកបច្ច័យ ទេយ្យទាន ទេយ្យវត្ថុវេរប្រគេនព្រះសង្ឃ ១០៨អង្គ និងអំណោយជាថវិកា សម្ភារៈប្រើប្រាស់ គ្រឿងឧបភោគ បរិភោគ ចែកជូនដល់មនុស្សវ័យចាស់ចំនួន២០០នាក់ផងដែរ។