គ.ជ.ស.ស. បញ្ចប់វគ្គបណ្តុះបណ្តាលច្បាប់សមុទ្រ ពង្រឹងខឿនការពារជាតិ និងសន្តិសុខលម្ហសមុទ្រកម្ពុជាឱ្យកាន់តែរឹងមាំ

ខេត្តព្រះសីហនុ – នាថ្ងៃទី២៤ ខែមីនា ឆ្នាំ២០២៦ គណៈកម្មាធិការជាតិសន្តិសុខលម្ហសមុទ្រ (គ.ជ.ស.ស.) បានរៀបចំពិធីបិទវគ្គបញ្ជ្រាបចំណេះដឹងផ្នែកច្បាប់សំខាន់ៗចំនួន ៤ ប្រកបដោយជោគជ័យ។ ពិធីនេះប្រារព្ធឡើងក្រោមអធិបតីភាព ឯកឧត្តម ឧត្តមនាវីឯក ទៀ ប៊ុនលៀម អគ្គលេខាធិការរង នៃគ.ជ.ស.ស. ក្នុងគោលបំណងលើកកម្ពស់សមត្ថភាពមន្ត្រីអនុវត្តច្បាប់ឱ្យឆ្លើយតបទៅនឹងការវិវត្តនៃសន្តិសុខតំបន់ និងសកលលោក។

ក្នុងវគ្គបណ្តុះបណ្តាលនេះ មន្ត្រីបង្គោលមកពីស្ថាប័នចម្រុះបានក្រេបជញ្ជក់នូវចំណេះដឹងលើច្បាប់គោលចំនួន ៤ ដែលជាឧបករណ៍យុទ្ធសាស្ត្រក្នុងការគ្រប់គ្រងដែនសមុទ្រ៖

•  អនុសញ្ញា UNCLOS ១៩៨២: ផ្តោតលើការយល់ដឹងពីដែនយុត្តាធិការ ដែនសមុទ្រសេដ្ឋកិច្ចផ្តាច់មុខ និងការបែងចែកខ្សែកោងមូលដ្ឋាន ដើម្បីការពារផលប្រយោជន៍ជាតិស្របតាមច្បាប់អន្តរជាតិ។

•  ច្បាប់ស្តីពីទេសចរណ៍: បង្កើនប្រសិទ្ធភាពគ្រប់គ្រងលំហូរភ្ញៀវទេសចរ ធានាសុវត្ថិភាពតាមបណ្តាកោះ និងឆ្នេរខ្សាច់ដែលជាសរសៃឈាមសេដ្ឋកិច្ច។

•  ច្បាប់ស្តីពីការគ្រប់គ្រងតំបន់ការពារធម្មជាតិ: សំដៅអភិរក្សប្រព័ន្ធអេកូឡូស៊ី ផ្កាថ្ម និងព្រៃកោងកាង ដែលជាទ្រព្យសម្បត្តិធម្មជាតិមិនអាចកាត់ថ្លៃបាន។

•  ច្បាប់ស្តីពីជលផល: ពង្រឹងការបង្ក្រាបបទល្មើសនេសាទខុសច្បាប់ (IUU) និងការការពារធនធានមច្ឆជាតិសម្រាប់ចីរភាពស្បៀងអាហារ។

ឯកឧត្តម ឧត្តមនាវីឯក ទៀ ប៊ុនលៀម បានពាំនាំនូវការផ្តាំផ្ញើសាកសួរសុខទុក្ខពី ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន គ.ជ.ស.ស.។ ឯកឧត្តមបានសង្កត់ធ្ងន់ថា ក្រោមការដឹកនាំរបស់ សម្តេចមហាវរធិបតី ហ៊ុន ម៉ាណែត កម្ពុជាកំពុងឈានទៅរកការធ្វើទំនើបកម្មវិស័យការពារជាតិ។

“ការយល់ដឹងច្បាស់អំពីក្រមនីតិវិធី មិនត្រឹមតែជាការអនុវត្តច្បាប់ប៉ុណ្ណោះទេ ប៉ុន្តែគឺជាការកសាងរបងការពារអធិបតេយ្យ ប្រឆាំងនឹងអំពើភេរវកម្ម និងបទល្មើសឆ្លងដែនគ្រប់ទម្រង់ ដើម្បីផ្តល់ភាពកក់ក្តៅដល់ប្រជាពលរដ្ឋ និងវិនិយោគិន”។ 

អ្វីដែលជាចំណុចលេចធ្លោនៃអង្គពិធី គឺវត្តមានរបស់តំណាងកងទ័ពជើងទឹក មូលដ្ឋានសមុទ្ររាម កងរាជអាវុធហត្ថ មន្ទីរបរិស្ថាន ព្រមទាំង ឯកឧត្តម អ្នកឧកញ៉ា ឧកញ៉ា និងសប្បុរសជនជាច្រើនរូប។ កិច្ចសហការនេះឆ្លុះបញ្ចាំងពី “ស្មារតីសាមគ្គីភាពជាតិ” ដែលវិស័យឯកជនបានចូលរួមចំណែកយ៉ាងសកម្មក្នុងការឧបត្ថម្ភសម្ភារៈ និងថវិកាដល់ទីបញ្ជាការជួរមុខ ដើម្បីបង្កើនប្រសិទ្ធភាពប្រតិបត្តិការ។

វគ្គបញ្ជ្រាបចំណេះដឹងនេះ គឺជាជំហានថ្មីមួយទៀតក្នុងការធានាថា មន្ត្រីបង្គោលរបស់កម្ពុជានឹងចុះបំពេញបេសកកម្មប្រកបដោយតម្លាភាព វិជ្ជាជីវៈខ្ពស់ និងសន្តិភាព។ ភាពជោគជ័យនៃវគ្គសិក្សានេះ គឺជាសារមួយបញ្ជាក់ទៅកាន់តំបន់ថា កម្ពុជាម្ចាស់ការលើសន្តិសុខលម្ហសមុទ្ររបស់ខ្លួនយ៉ាងពេញលេញ។

សម្រួលអត្ថបទ៖ ស្រីមុំ

រូបភាព៖ ផូង ថៃ