លោកឧត្តមសេនីយ៍ត្រី ម៉េង ស្រ៊ុន អញ្ជើញជាអធិបតីក្នុងពិធីជួបសំណេះសំណាលជាមួយអាវុធហត្ថនារី ដើម្បីចូលរួមអបអរសាទរខួបអនុស្សាវរីយ៍លើកទី ១១៥ ទិវាអន្តរជាតិនារី ៨មីនា ឆ្នាំ២០២៦ ក្រោមប្រធានបទ “សន្តិភាព និងសន្តិសុខសម្រាប់ស្ត្រី និងគ្រួសារ”
កំពង់ស្ពឺ៖ ដោយអនុវត្ត និងយកគំរូដឹកនាំដ៏បុិនប្រសព្វឈ្លាសវៃប្រកបដោយគុណធម៌របស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ស្ថិតនៅសាលប្រជុំធំ នៃបញ្ជាការដ្ឋានកងរាជអាវុធហត្ថខេត្តកំពុងស្ពឺ នៅថ្ងៃទី៧ ខែមីនា ឆ្នាំ២០២៦ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ បានអញ្ជើញជាអធិបតី ក្នុងពិធីជួបសំណេះសំណាលជាមួយអាវុធហត្ថនារី ដើម្បីចូលរួមអបអរសាទរខួបអនុស្សាវរីយ៍លើកទី១១៥ ទិវាអន្តរជាតិនារី ៨មីនា ឆ្នាំ២០២៦ ក្រោមប្រធានបទ សន្តិភាព និងសន្តិសុខសម្រាប់ស្តី្រ នឹងគ្រួសារ។
ឆ្លៀតក្នុងឱកាសនោះដែរ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ ក៏បានសំណេះសំណាលកោតសរសើរយ៉ាងស្មោះស្ម័គ្រចំពោះអាវុធហត្ថនារីទាំងអស់ ដែលបានបូជាកម្លាំងកាយចិត្តដោយមិនខ្លាចការនឿយហត់ ក្នុងការចូលរួមចំណែកយ៉ាងសកម្មក្នុងការបំពេញតួនាទីភារកិច្ច ក្នុងអង្គភាពនាពេលកន្លងមក ជាពិសេសផងដែរ ក៏បានពាំនាំនូវការផ្តាំផ្ញើរសាកសួរសុខទុក្ខ និងជូនពរពីចម្ងាយរបស់ ឯកឧត្តម នាយឧត្តមសេនីយ៍ សៅ សុខា ចំពោះអាវុធហត្ថនារីខេត្តកំពង់ស្ពឺទាំងអស់ ព្រមទាំងក្រុមគ្រួសារ។
លោកឧត្តមសេនីយ៍ត្រី ម៉េង ស្រ៊ុន មេបញ្ជាការ បានបន្តទៀតថា ទិវាអន្តរជាតិនារី ៨មីនា ឆ្នាំ២០២៦នេះ (ក្រោមប្រធានបទ សន្តិភាព និងសន្តិសុខសម្រាប់ស្តី្រ នឹងគ្រួសារ) គឺក្នុងគោលបំណងរំលេចពីសារៈសំខាន់មិនអាចកាត់ថ្លៃបាន នៃសន្តិភាព និងសន្តិសុខសម្រាប់ស្ត្រីនិងក្រុមគ្រួសារ ដែលជាបុរេលក្ខខណ្ឌដ៏ចម្បង ញ៉ាំងឱ្យស្ត្រី និងក្រុមគ្រួសារបានរស់នៅជួបជុំ ប្រកបដោយសុភមង្គលសុខដុមរមនា សុខមាលភាពទាំងផ្លូវកាយ និងផ្លូវចិត្ត ជាការគូសបញ្ជាក់ពីការចូលរួមចំណែកយ៉ាងសកម្មរបស់ស្ត្រី ក្នុងកិច្ចខិតខំប្រឹងប្រែងដើម្បីកសាង និងថែរក្សាសន្តិភាព ដែលជាធាតុផ្សំមិនអាចខ្វះបានសម្រាប់ការអភិវឌ្ឍប្រកបដោយចីរភាព ស្ថេរភាព និងវិបុលភាពសង្គមផងដែរ។
ជាចុងក្រោយ លោកឧត្តមសេនីយ៍ត្រី ម៉េង ស្រ៊ុន ក៏បានផ្តល់កិត្តិយសប្រគល់នូវវត្ថុអនុស្សាវរីយ៍ និងបាច់ផ្កាជូនដល់អាវុធហត្ថនារីដើម្បីជាការលើកទឹកចិត្ត និងជានិមិត្តរូបនៃសេចក្តីស្រឡាញ់ និងការផ្តល់តម្លៃដល់ស្ត្រី ព្រមទាំងបានឧបត្ថម្ភដល់អាវុធហត្ថនារីចំនួន០៤នាក់ ដោយក្នុងម្នាក់ទទួលបាននូវ ថវិកាចំនួន ១០០,០០០រៀល រួមទាំងសម្ភារៈមួយចំនួនទៀតមានដូចជា ទឹកសុទ្ធ ៥កេស,ទឹកផ្លែឈើ +ភេសជ្ជៈ ៥កេស និងមី ៥កេសថែមទៀតផង៕
