រដ្ឋមន្រ្តីសុខាភិបាល៖ «នៅក្នុងរយៈពេលជាង២ឆ្នាំ នៃការជួបជុំគ្នាជាទៀតទាត់ ដើម្បីសិក្សាស្វែងយល់ពីភាពជាអ្នកដឹកនាំ មន្រ្តីនិងថ្នាក់ដឹកនាំសុខាភិបាលគ្រប់ជាន់ថ្នាក់បានប្រើប្រាស់ភាសាតែមួយក្នុងការបម្រើការងារក្នុងវិស័យសុខាភិបាល»

ឯកឧត្តមសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានថ្លែងយ៉ាងដូច្នេះនៅក្នុងពេលដែលឯកឧត្តមអញ្ជើញដឹកនាំវគ្គភាពអ្នកដឹកនាំនិងនវានុវត្តន៍ ដែលមានមន្រ្តីសុខាភិបាលគ្រប់ឋានានុក្រមក្រោមឱវាទក្រសួងសុខាភិបាលចូលរួមតាមប្រព័ន្ធវីដេអូសន្និសីទ(Zoom)សរុបចំនួន ៣១៤៨រូប កាលពីរសៀលថ្ងៃអង្គារទី១៧ ខែកុម្ភៈ ឆ្នាំ២០២៦។

ជាកិច្ចបន្ត ឯកឧត្តមសាស្រ្តាចារ្យរដ្ឋមន្រ្តី បានថ្លែងអំណរគុណ ដល់មន្រ្តីសុខាភិបាលទាំងអស់ ដែលបានខិតខំបម្រើសេវាសុខាភិបាល និងបានលើកយកឧទាហរណ៍ ដែលមានលក្ខណៈជាក់ស្តែងមួយចំនួន មកចែករំលែកជាដំណោះស្រាយ ដើម្បីផ្តល់ជាគំនិត ដល់មន្រ្តីសុខាភិបាលទាំងអស់យកទៅធ្វើការឆ្លុះបញ្ចាំង និងកែលម្អចំណុចដែលមិនទាន់បានល្អប្រសើរ ព្រោះថា វិស័យសុខាភិបាលយើង បាននឹងកំពុងរួមគ្នាធ្វើដំណើរឆ្ពោះទៅរកឧត្តមភាព នៃការផ្តល់សេវា។ ឯកឧត្តមសាស្រ្តាចារ្យបានរំលឹកថា ថ្នាក់ដឹកនាំសុខាភិបាល គ្រប់លំដាប់ថ្នាក់បានជួបជុំគ្នាជាររៀងរាល់រសៀលថ្ងៃអង្គារ បានចំនួន ១០៤ដង ដើម្បីរំលែកចំណេះដឹង និងបទពិសោធន៍លើភាពជាអ្នកដឹកនាំ។ ការជួបជុំជាប្រចាំនេះបានធ្វើឱ្យមន្រ្តី និងថ្នាក់ដឹកនាំសុខាភិបាលបានយល់ច្បាស់ជាងមុនលើភាពជាអ្នកដឹកនាំ និងបានយកចំណេះដឹងនេះទៅប្រើប្រាស់នាពេលកន្លងមក រហូតធ្វើឱ្យវិស័យសុខាភិបាល កាន់តែមានភាពប្រសើរឡើង។

ជាកិច្ចបន្ទាប់  ក្រុមការងារមន្ទីរសុខាភិបាលនៃរដ្ឋបាលខេត្តឧត្តរមានជ័យ បានធ្វើបទបង្ហាញអំពីការគ្រប់គ្រង សេវាសុខាភិបាលក្នុងកំឡុងពេលមានសង្គ្រាមឈ្លានពានកាលពីចុងឆ្នាំ២០២៥ កន្លងមក។ បទបង្ហាញនេះចែករំលែកបទពិសោធន៍ នៅក្នុងការងារត្រៀមខ្លួន និងឆ្លើយតបទៅនឹងគ្រោះមហន្តរាយជាពិសេសពេលមានសង្គ្រាម។

ឯកឧត្តមសាស្រ្តាចារ្យ កុយ វ៉ាន់នី បានផ្តល់ការសំយោគ និងដោយសង្ខេប ចេញពីលទ្ធផល និងសមិទ្ធិផលដឹកនាំរបស់ឯកឧត្តមសាស្ត្រាចារ្យរដ្ឋមន្ត្រីលើកត្តាដែលនាំឱ្យវិស័យសុខាភិបាល ទទួលបានជោគជ័យក្នុងខេត្តឧត្តរមានជ័យ ក៍ដូចជាតាមបណ្តាខេត្តផ្សេងៗទៀតនោះគឺ (១)ការប្រើប្រាស់ភាពជាអ្នកដឹកនាំដែលមានភាពធន់ បត់បែន និងឈរលើតុល្យភាព (២)ការតាំងចិត្តខ្ពស់ និងកាយរបស់មន្រ្តីសុខាភិបាលក្នុងការទ្រសភាពការណ៍ (៣)សមត្ថភាពនៃការអភិវឌ្ឍន៍ខ្លួនបានឆាប់រហ័ស និងការរៀនសូត្រយកចំណេះដឹងថ្មីៗមកប្រើក្នុងស្ថានភាពដែលប្រែប្រួលលឿន និង(៤)ការឈរលើជំហរស្មារតីរួមគ្នាតែមួយ របស់មន្រ្តីសុខាភិបាល តាំងពីថ្នាក់លើដល់ថ្នាក់ក្រោម។