🇰🇭 កម្ពុជាស្វាគមន៍នាវាទេសចរណ៍ SEABOURN ENCORE មកដល់ខេត្តព្រះសីហនុ!

នាវាទេសចរណ៍ដ៏ប្រណីតមួយគ្រឿងឈ្មោះ SEABOURN ENCORE សញ្ជាតិ BAHAMAS នៅព្រឹកថ្ងៃអង្គារ ទី២៧ ខែមករា ឆ្នាំ២០២៦នេះ បានចូលចតនៅកំពង់ផែស្វយ័តក្រុងព្រះសីហនុ (ក.ស.ស.) ដោយសុវត្ថិភាព ដើម្បីនាំភ្ញៀវទេសចរចម្រុះជាតិសាសន៍មកកម្សាន្តនៅទឹកដីនៃព្រះរាជាណាចក្រកម្ពុជា។

នាវាទេសចរណ៍ខ្នាតធំនេះ មានបណ្តោយ ២១០,៥ ម៉ែត្រ ទទឹង ២៨,០០ ម៉ែត្រ និហជម្រៅទឹក៖ ៦,០០ ម៉ែត្រ បានធ្វើដំណើរចាកចេញពីប្រទេសវៀតណាម ក្នុងគោល បំណងមកទស្សនកិច្ចនៅកម្ពុជារយៈពេលមួយថ្ងៃពេញ។វត្តមានរបស់នាវា SEABOURN ENCORE នៅពេលនេះ បាននាំភ្ញៀវទេសចរណ៍សរុប ៥៣៨ នាក់ (ស្រី ២៦៨ នាក់) មាន ២៩ សញ្ជាតិ។ សញ្ជាតិដែលមានច្រើនជាងគេ៖ សហរដ្ឋអាមេរិក (២៥៩ នាក់) និង អង់គ្លេស (១២៨ នាក់) និងនាវិកសរុប ៤០៩ នាក់ (ស្រី ៨៤ នាក់) មាន ៤១ សញ្ជាតិ។

តាមគម្រោងដែលបានគ្រោងទុក ភ្ញៀវទេសចរទាំងអស់នឹងចុះទស្សនកិច្ចតាមតំបន់រមណីយដ្ឋានសំខាន់ៗ និងតំបន់សេដ្ឋកិច្ចក្នុងខេត្តព្រះសីហនុ ដើម្បីឈ្វេងយល់ពីវប្បធម៌ និងជីវភាពរស់នៅរបស់ប្រជាជនខ្មែរ។

បន្ទាប់ពីបញ្ចប់ដំណើរកម្សាន្តរយៈពេលខ្លីក្នុងប្រទេសកម្ពុជា នាវាទេសចរណ៍ SEABOURN ENCORE នឹងចាកចេញពីកំពង់ផែស្វយ័តក្រុងព្រះសីហនុវិញ នៅវេលាម៉ោង ២០:០០ នាទីយប់ ថ្ងៃដដែលនេះ ដើម្បីបន្តដំណើរឆ្ពោះទៅកាន់ប្រទេសថៃ។

អត្ថបទ៖ ម៉ារ៉ាឌី

ប្រភព៖Sihanoukville Autonomous Port (PAS)