ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការ និងសាសនា បានអញ្ជើញគោរពវិញ្ញាណក្ខន្ធ ឧបាសិកា ឡុង តៃ ដែលត្រូវជាម្តាយបង្កើតរបស់ លោកជំទាវ ជ័យ ណាវី អ៊ុ រាត្រី និងជាម្តាយក្មេករបស់ ឯកឧត្តម អ៊ុ រាត្រី អភិបាលខេត្តបន្ទាយមានជ័យ

ខេត្តបន្ទាយមានជ័យ –នៅវេលាថ្ងៃត្រង់ ថ្ងៃសៅរ៍ ៦កើត ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៤ ខែមករា ឆ្នាំ២០២៦ ឯកឧត្តម ឈួរ សុបញ្ញា រដ្ឋលេខាធិការសក្រសួងធម្មការ និងសាសនា បានអញ្ជើញគោរពវិញ្ញាណក្ខន្ធ ឧបាសិកា ឡុង តៃ ដែលត្រូវជាម្តាយបង្កើតរបស់ លោកជំទាវ ជ័យ ណាវី អ៊ុ រាត្រី និងជាម្តាយក្មេករបស់ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ។

ក្នុងឱកាសដ៏ក្រៀមក្រំ និងពោរពេញដោយសេចក្តីសោកស្តាយយ៉ាងជ្រាលជ្រៅនេះ ឯកឧត្តមបានចូលរួមមរណ:ទុក្ខនិងសោកស្តាយជាពន្លឹកចំពោះការបាត់បង់ ម្តាយ ជីដូន ជីដូនតួត ជាទីស្រឡាញ់ ដែលនេះគឺជាការបាត់បង់ដ៏ធំធេងមួយក្នុងជីវិត ប្រៀបដូចជាការរលត់បាត់នៃពន្លឺដ៏កក់ក្តៅ ដែលធ្លាប់បំភ្លឺផ្លូវជីវិតកូនចៅ។ សេចក្តីស្រណោះចិត្ត ក្តីអាណិតអាសូរ និងការចងចាំអនុស្សាវរីយ៍ល្អៗ នឹងនៅស្ថិតក្នុងបេះដូងកូនចៅ និងសាច់ញាតិជានិច្ច មិនរលាយតាមការបាត់បង់នៃរូបកាយឡើយ។ ព្រះពុទ្ធដីកាបានសម្តែងថា «មាតា មិត្តា គេហេ ធម្មា» មាតាជាមិត្តជិតស្និទ្ធបំផុតក្នុងជីវិត ជាមូលដ្ឋាននៃគុណធម៌ និងជាដើមកំណើតនៃការបណ្តុះសេចក្តីមេត្តាករុណា។ កូនចៅគប្បីយកការចងចាំគុណមាតា ជាថាមពលផ្លូវចិត្ត ដើម្បីបន្តធ្វើកុសលកម្ម និងរស់នៅក្នុងផ្លូវធម៌។

ជាមួយគ្នានេះ ព្រះពុទ្ធដីកាបានត្រាស់ថា«សព្វេ សង្ខារា អនិច្ចា សព្វេ សង្ខារា ទុក្ខា សព្វេ ធម្មា អនត្តា» សង្ខារទាំងអស់មិនទៀង ជាទុក្ខ និងមិនមែនជាខ្លួនអត្តា។ ការលាចាកនៃមាតាជាទីស្រឡាញ់ ជាសច្ចធម៌មួយនៃវដ្តជីវិតដែលបង្រៀនឲ្យមនុស្សយើងដឹងដល់តម្លៃពេលវេលា ក្តីស្រឡាញ់ និងការធ្វើល្អនៅពេលដែលនៅមានឱកាស។

ដោយកម្លាំងកុសលផលបុណ្យទាំងឡាយ ឯកឧត្តមសូមឧទ្ទិសបួងសួង និងបញ្ជូនបុណ្យកុសលជូនដួងវិញ្ញាណក្ខន្ធ ឧបាសិកា ឡុង តៃ សូមបានទៅសោយសុខក្នុង សុគតិភព កុំបីឃ្លៀងឃ្លាតឡើយ ហើយសូមឲ្យព្រះធម៌ ជាទីពឹងផ្លូវចិត្ត ដល់ឯកឧត្តម អ៊ុ រាត្រី លោកជំទាវ និងក្រុមគ្រួសារសពក្នុងការឆ្លងកាត់វេលាសោកស្តាយនេះដោយសេចក្តីអត់ធ្មត់។