ឯកឧត្ដម ឈិន កេតនា អញ្ជើញដឹកនាំពិនិត្យផែនឈរត្រៀមរៀបចំពិធីបុណ្យឯករាជ្យជាតិ ៩ វិច្ឆិកា ឆ្នាំ២០២៥ នៅវិមានឯករាជ្យ
ឯកឧត្ដម ឈិន កេតនា ឧបនាយករដ្ឋមន្ត្រី អនុប្រធានអចិន្ត្រៃយ៍ និងជាអគ្គលេខាធិការគណៈកម្មាធិការជាតិរៀបចំបុណ្យជាតិអន្តរជាតិ នៅព្រឹកថ្ងៃទី៧ ខែវិច្ឆិកា ឆ្នាំ២០២៥ បានអញ្ជើញដឹកនាំ ដើម្បីពិនិត្យទីតាំងផែនឈរសម្រាប់ថ្នាក់ដឹកនាំ មន្ត្រីរាជការស៊ីវិល នគរបាលជាតិ និងកងយោធពលខេមរភូមិន្ទ សម្រាប់ចូលរួមពិធីខួបអនុស្សាវរីយ៍លើកទី ៧២ នៃទិវាបុណ្យឯករាជ្យជាតិ ៩ វិច្ឆិកា និងទិវាកំណើត នៃកងយុទ្ធពលខេមរភូមិន្ទ ឆ្នាំ២០២៥ ដោយមានការអញ្ជើញចូលរួមពី ឯកឧត្តម លោកជំទាវ តំណាងក្រសួង រដ្ឋលេខាធិការដ្ឋាន ស្ថាប័ន និងរដ្ឋបាលរាជធានីភ្នំពេញ វិមានឯករាជ្យ រាជធានីភ្នំពេញ។
ជាកិច្ចចាប់ផ្តើម ឯកឧត្តម ឈិន កេតនា ឧបនាយករដ្ឋមន្ត្រី បានថ្លែងអំណរគុណចំពោះសមាជិក សមាជិកា ដែលបាន ចូលរួមតាមការអញ្ជើញរបស់គណៈកម្មាធិការជាតិរៀបចំបុណ្យជាតិ-អន្តរជាតិ ហើយបានមានប្រសាសន៍បន្ថែមទៀតថា ការចុះត្រួតពិនិត្យនេះ មានគោលបំណងធានាបាននូវការប្រារព្ធនៃពិធីខួបអនុស្សាវរីយ៍នេះ ប្រព្រឹត្តទៅដោយរលូន និងអធិកអធម ។
ឯកឧត្តម ឧបនាយករដ្ឋមន្ត្រី បានជម្រាបលម្អិតជូនដល់ថ្នាក់ដឹកនាំ មន្រ្តីរាជការចូលរួមអំពីផែនឈរ រួមមាន៖
• ផែនឈរថ្នាក់ដឹកនាំ
• ផែនឈរមន្ត្រីរាជការ
• ផែនឈរនគរបាលជាតិ
• ផែនឈរកងយោធពលខេរមភូមិន្ទ
• ផែនកងកិត្តិយសត្រែទ័ព រួមនឹងផែនមហាជនជាច្រើនទៀត។
ឯកឧត្តម ឧបនាយករដ្ឋមន្រ្តី បានលើកគោលការណ៍សំខាន់ៗ សម្រាប់អនុវត្តនិងជម្រាបជូនអំពីកាលបរិច្ឆេទ ទីតាំងប្រារព្ធពិធី និងកម្មវិធី នៃការប្រារព្ធពិធីបុណ្យឯករាជ្យជាតិ ចាប់ពីថ្ងៃទី០៨ , ០៩ , ១០ ,១១ ខែវិច្ឆិកា ឆ្នាំ២០២៥ រួមមាន ៖
.ថ្ងៃទី០៨ វេលាម៉ោង ១៤:០០នាទី នឹងមានរៀបចំពិធីដាក់កម្រងផ្កាគោរពវិញ្ញាណក្ខន្ធ នៅវិមានឯករាជ្យ និងថ្វាយកម្រងផ្កាគោរពព្រះវិញ្ញាណក្ខន្ធ ព្រះករុណា “ព្រះបរមរតនកោដ្ឋ” នៅមណ្ឌបសួនច្បារខាងកើតវិមានឯករាជ្យ។
.ថ្ងៃទី០៩ វេលា៨:០០នាទីព្រឹក ចាប់ផ្តើមប្រារព្ធព្រះរាជពិធីប្រទានភ្លើងជ័យ នៅវិមានឯករាជ្យ។
.ថ្ងៃទី១០ មានកម្មវិធីសិល្បៈ តាមទីតាំងដែលបានកំណត់ ។
.ថ្ងៃទី១១ ខែវិច្ឆិកា ឆ្នាំ២០២៥ ម៉ោង ១៦:៣០នាទី ចាប់ផ្តើមប្រារព្ធព្រះរាជពិធីពន្លត់ភ្លើងជ័យ នៅវិមានឯករាជ្យ។
ឯកឧត្តម ឈិន កេតនា ឧបនាយករដ្ឋមន្ត្រី បានមានប្រសាសន៍បន្តថា ដើម្បីពិធីឱ្យកាន់តែអធឹកអធមថែមទៀតនោះ កម្មវិធីក៏បានចាត់តាំងការអុជកាំជ្រួចរយៈពេល២ថ្ងៃ គឺថ្ងៃទី៩ -១១ ខែវិច្ឆិកា ឆ្នាំ២០២៥ វេលាម៉ោង១៩:០០នាទី នៅមុខព្រះបរមរាជវាំង។
ទាំងអស់នេះបង្ហាញយ៉ាងច្បាស់អំពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្រោមការដឹកនាំដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីធ្វើយ៉ាងណាឱ្យពិធីនេះប្រព្រឹត្តទៅប្រកបដោយភាពថ្លៃថ្នូរ សក្តិសមនឹងព្រឹត្តិការណ៍ជាប្រវត្តិសាស្ត្រនៃព្រះរាជបូជនីយកិច្ចទាមទារឯករាជ្យ ៩ វិច្ឆិកា ១៩៥៣ ពីអាណានិគមបារាំងរបស់ព្រះករុណាព្រះបរមរតនកោដ្ឋ និងការរម្លឹកពិធីដ៏អធិកអធមនេះ ក៏នឹងប្រារព្ធក្រោមព្រះរាជាធិបតីភាពដ៏ខ្ពង់ខ្ពស់បំផុត ព្រះករុណា ព្រះបាទសម្ដេច ព្រះបរមនាថ នរោត្តមសីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។
