ក្រសួងសេដ្ឋកិច្ច និង ហិរញ្ញវត្ថុ បញ្ជ្រាបការយល់ដឹងអំពីការអនុវត្តគម្រោង និង ចែករំលែកបទពិសោធន៍ នៃការប្រើប្រាស់ FMIS ជូនអ្នកប្រើប្រាស់ នៅតាមក្រសួង-ស្ថាប័ន និង ភាគីពាក់ព័ន្ធ

នារសៀលថ្ងៃទី ២៨ ខែ សីហា ឆ្នាំ ២០២៥ នៅសណ្ឋាគារ សាងគ្រីឡា ភ្នំពេញ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមការងារគ្រប់គ្រងគម្រោងFMIS, តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្នឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ បានអញ្ជើញជាអធិបតីភាពក្នុងកម្មវិធី “បញ្ជ្រាបការយល់ដឹងអំពីការអនុវត្តគម្រោង និងចែករំលែកបទពិសោធន៍ នៃការប្រើប្រាស់ FMIS” ជូនក្រុមការងារអនុវត្តគម្រោង FMIS នៅតាមក្រសួង–ស្ថាប័ន ដោយមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ, ឯកឧត្តមប្រតិភូរាជរដ្ឋាភិបាល ឯកឧត្តម លោកជំទាវ លោក លោកស្រី ថ្នាក់ដឹកនាំជាន់ខ្ពស់ និង មន្ត្រីជំនាញ នៃក្រសួង–ស្ថាប័នពាក់ព័ន្ធ ។

កម្មវិធីនេះ ត្រូវបានរៀបចំឡើងក្នុងគោលបំណង ពង្រីក និង ពង្រឹងការអនុវត្តសកម្មភាពគ្រប់គ្រងការផ្លាស់ប្តូរ ក្នុងទិសដៅជំរុញ និងលើកទឹកចិត្តដល់ក្រុមការងារអនុវត្តគម្រោង FMIS (FIWG) និង មន្ត្រីគ្រប់គ្រងការផ្លាស់ប្តូរ (Change Agent) នៅគ្រប់ការដ្ឋាន, ធ្វើបច្ចុប្បន្នភាពអំពីសមិទ្ធផលសំខាន់ៗ នៃការអនុវត្តគម្រោង FMIS, ផ្សារភ្ជាប់ទំនាក់ទំនងរវាងក្រុមការងារគ្រប់គ្រងគម្រោង FMIS នៃក្រសួងសេដ្ឋកិច្ច និងហិរញ្ញវត្ថុនិង ក្រុមការងារអនុវត្តគម្រោង FMIS ប្រចាំក្រសួង–ស្ថាប័ន ឱ្យកាន់តែមានភាពស្និទ្ធស្នាលបន្ថែមទៀត, ព្រមទាំងបញ្ជ្រាបការយល់ដឹងជូនអ្នកប្រើប្រាស់FMIS នៅតាមក្រសួង–ស្ថាប័ន និង ភាគីពាក់ព័ន្ធ ក្នុងគោលដៅធ្វើឱ្យអ្នកប្រើប្រាស់ត្រៀមខ្លួនឱ្យបានរួចរាល់ និង ចូលរួមគ្រប់សកម្មភាពគន្លឹះ សម្រាប់ការផ្លាស់ប្តូរជាបន្តបន្ទាប់ នាពេលខាងមុខ ក្នុងក្របខ័ណ្ឌនៃការអនុវត្តនីតិវិធីក្នុងFMIS ។

ថ្លែងក្នុងឱកាសនោះ, ឯកឧត្តមបណ្ឌិតសភាចារ្យ ហ៊ាន សាហ៊ីប បានគូសរំលេចនូវចក្ខុវិស័យរបស់ FMIS ដែលជាប្រព័ន្ធទំនើបកម្មតែមួយគត់សម្រាប់ការគ្រប់គ្រងហិរញ្ញវត្ថុសាធារណៈ និង ការអនុវត្តថវិកានៅព្រះរាជាណាចក្រកម្ពុជា ដោយមានបេសកកម្មក្នុងការពង្រឹង និង ពង្រីកមុខងាររបស់ប្រព័ន្ធ តាមរយៈការធ្វើវិមជ្ឈការលើការប្រើប្រាស់ FMIS នៅរដ្ឋបាលថ្នាក់ជាតិ និង រដ្ឋបាលថ្នាក់ក្រោមជាតិ ព្រមទាំងពន្លឿននីតិវិធីអនុវត្តការងារហិរញ្ញវត្ថុ ប្រកបដោយ ប្រសិទ្ធភាព តម្លាភាព និង ព័ត៌មានជាក់លាក់ ស្របតាមឧត្តមានុវត្តន៍អន្តរជាតិ ។ ទន្ទឹមនេះ, ឯកឧត្តម បានគូសរំលេចអំពីសារៈសំខាន់នៃ សកម្មភាពគ្រប់គ្រងការផ្លាស់ប្តូរ ដែលជាកត្តាគន្លឹះក្នុងការជំរុញការអនុវត្តគម្រោង FMIS ឱ្យកាន់តែល្អប្រសើរជាលំដាប់ព្រោះថា ប្រសិនបើគ្មានការចូលរួម ការគាំទ្រ និង ការប្តេជ្ញាចិត្ត របស់អ្នកចូលរួមគ្រប់លំដាប់ថ្នាក់, ចាប់ពីថ្នាក់ដឹកនាំកំពូល ថ្នាក់បច្ចេកទេសជំនាញរហូតដល់មន្រ្តីអនុវត្តផ្ទាល់, នោះគម្រោង FMIS នឹងពុំអាចទទួលបានភាពជោគជ័យឡើយ ។

ឯកឧត្តមបណ្ឌិតសភាចារ្យ បានគូសបញ្ជាក់បន្ថែមថា ការអនុវត្តគម្រោង និង ការពង្រីកការប្រើប្រាស់ FMIS ជាជំហានៗ ពីការដ្ឋានថ្នាក់ជាតិ បន្តទៅដល់ថ្នាក់ក្រោមជាតិ គឺជាបុរេលក្ខខណ្ឌ និង កត្តាគន្លឹះ ដែលបាននិង កំពុងចូលរួមចំណែកជួយឱ្យកម្ពុជា មានលទ្ធភាពសម្រេចបានចក្ខុវិស័យកែទម្រង់ការគ្រប់គ្រងហិរញ្ញវត្ថុសាធារណៈ និង ចក្ខុវិស័យកម្ពុជាឆ្នាំ ២០៥០ ក្រោមការដឹកនាំដ៏ស្វាហាប់ ឈ្លាសវៃ និង ប៉ិនប្រសព្វរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ។

នៅក្នុងកម្មវិធីនេះ ក៏មានការចូលរួមចែករំលែកបទពិសោធន៍ នៃការអនុត្តនីតិវិធីការងារតាម FMIS នាពេលកន្លងមក របស់ក្រុមការងារអនុវត្តគម្រោង FMIS មកពីក្រសួងមហាផ្ទៃ និង ក្រសួងធនធានទឹក និងឧតុនិយម។ ក្នុងនោះដែរ, តំណាងក្រសួងទាំងពីរ បានកោតសរសើរដល់ក្រុមការងារគ្រប់គ្រងគម្រោង FMIS នៃក្រសួងសេដ្ឋកិច្ច និងហិរញ្ញវត្ថុ ដែលតែងតែផ្តល់ការគាំទ្រ តាមគ្រប់រូបភាព ជូនអង្គភាពប្រើប្រាស់ប្រព័ន្ធ សំដៅជំរុញគាំទ្រដល់ការគ្រប់គ្រងការផ្លាស់ប្តូរ ពីការអនុវត្តការងារដោយដៃ មកការប្រើប្រាស់ប្រព័ន្ធទំនើប ដែលការណ៍នេះបានជួយសម្រួលដល់ការងារគ្រប់គ្រងហិរញ្ញវត្ថុ និង ថវិកានៅតាមក្រសួង–ស្ថាប័ន ។

គួរបញ្ជាក់ផងដែរថា ចាប់តាំងពីការអនុវត្តជំហានទី ១ រហូតមកដល់បច្ចុប្បន្ន, ការដ្ឋានដែលកំពុងប្រើប្រាស់ FMIS សរុបមានចំនួន ៣១១ការដ្ឋាន, មុខងារប្រព័ន្ធដែលកំពុងដំណើរការមានចំនួន ៨ មុខងារ, សន្ធានកម្មជាមួយប្រព័ន្ធខាងក្រៅមានចំនួន ១៦ ប្រព័ន្ធ, របាយការណ៍ផលិតចេញពីប្រព័ន្ធសរុបមានចំនួន ៦៦ របាយការណ៍ និង អ្នកប្រើប្រាស់ប្រព័ន្ធសរុបមានចំនួន ៣.៧៩៨ រូប ។ ដោយឡែក សម្រាប់ការដ្ឋានដែលកំពុងប្រើប្រាស់ FMIS Portal ជំនាន់ទី ១ មានចំនួន ១.៨៧០ ការដ្ឋាន ដោយអ្នកប្រើប្រាស់សរុបចំនួន ៣.៣៧២ រូប ។ ជាមួយគ្នានេះ, ការប្រើប្រាស់FMIS បានក្លាយជាកម្លាំងចលនា ក្នុងការជួយជំរុញដល់ដំណើរការ នៃការកែទម្រង់ហិរញ្ញវត្ថុសាធារណៈនៅកម្ពុជា ឱ្យសម្រេចបានលទ្ធផលយ៉ាងល្អប្រសើរ ។

ជាទីបញ្ចប់, ឯកឧត្តមបណ្ឌិតសភាចារ្យ បានវាយតម្លៃខ្ពស់ និងថ្លែងអំណរគុណ ចំពោះការខិតខំប្រឹងប្រែងរបស់ក្រុមការងារគ្រប់គ្រងគម្រោង FMIS, លេខាធិការដ្ឋានក្រុមការងារគ្រប់គ្រងគម្រោង FMIS, អគ្គនាយកដ្ឋានពាក់ព័ន្ធនៃក្រសួងសេដ្ឋកិច្ច និងហិរញ្ញវត្ថុ, ក្រុមការងារអនុវត្តគម្រោង FMIS នៅគ្រប់ការដ្ឋាននៃក្រសួង–ស្ថាប័ន ទាំងថ្នាក់ជាតិ និងថ្នាក់ក្រោមជាតិ, ទីប្រឹក្សាអន្តរជាតិ រួមទាំងដៃគូអភិវឌ្ឍន៍នានា, ជាពិសេសសហភាពអ៊ឺរ៉ុប ដែលបានចូលរួមគាំទ្រយ៉ាងសកម្ម ទាំងផ្នែកបច្ចេកទេស និងហិរញ្ញប្បទាន ដែលបានចូលរួមសហការជាសហថាមពលមួយ ស្របតាមអភិក្រម “ជវភាពនៃប្រព័ន្ធតួអង្គតែមួយ” រហូតសម្រេចបាននូវសមិទ្ធផលសំខាន់ៗជាច្រើន ស្របតាមចក្ខុវិស័យ និង គោលនយោបាយអាទិភាពរបស់រាជរដ្ឋាភិបាល ៕