រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត ខិតខំកសាង និងលើកកម្ពស់ជីវភាពអតីតយុទ្ធជនឱ្យកាន់តែប្រសើរ

នាថ្ងៃទី២៨ ខែសីហា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញក្នុងពិធីប្រគល់ផ្ទះ និងដីសម្បទានសង្គមកិច្ចជូនអតីតយុទ្ធជនចំនួន ៤០គ្រួសារ ព្រមទាំងសម្ពោធដាក់ឱ្យប្រើប្រាស់ស្រះទឹក និងបើកការដ្ឋានស្ថាបនាផ្លូវដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគមអតីតយុទ្ធជនកម្ពុជា កសាងតាមរយៈអ្នកឧកញ៉ា វិញ ហ៊ួរ ប្រធានក្រុមប្រឹក្សាភិបាលក្រុមហ៊ុន កំពតផត។ អំណោយផ្ទះ និងដីសម្បទានសង្គមកិច្ចខាងលើ ស្ថិតនៅភូមិគោករកា ឃុំដូនបារ ស្រុកគាស់ក្រឡ ខេត្តបាត់ដំបង។

ពិធីនេះមានអញ្ជើញចូលរួមពី ថ្នាក់ដឹកនាំ ស.អ.ក, តំណាងក្រសួងអភិវឌ្ឍន៍បទ, តំណាងក្រសួងធនធាទឹក និងឧតុនិយម, អ្នកឧកញ៉ា វិញ ហ៊ួរ, ឯកឧត្តម សុខ លូ អភិបាលខេត្ត និងជាប្រធានកិត្តិយស ស.អ.ក ខេត្ត, លោកឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាលខេត្ត និងជាប្រធាន ស.អ.ក ខេត្ត, ប្រធានមន្ទីរ/អង្គភាពជុំវិញខេត្ត, អាជ្ញាធរមូលដ្ឋាន និងអតីតយុទ្ធជនសរុបចំនួន ៣៥០នាក់។

ថ្លែងក្នុងឱកាសនេះ ឯកឧត្តម ទេសរដ្ឋមន្រ្តី គន់ គីម បានកោតសរសើរចំពោះគណៈកម្មាធិការ ស.អ.ក ខេត្តគ្រប់លំដាប់ថ្នាក់ ដែលបានរួមចំណែកក្នុងការសម្របសម្រួល ដើម្បីរៀបចំឱ្យអតីតយុទ្ធជនជួបការលំបាក បានទទួលផ្ទះ និងដីសម្បទានសង្គមកិច្ច។

ឯកឧត្តម ទេសរដ្ឋមន្រ្តី គន់ គីមមានប្រសាសន៍ថា ចំពោះការអភិវឌ្ឍន៍ភូមិអតីតយុទ្ធជនដែលកំពុងរស់នៅចំនួន ១៤៤គ្រួសារ បូករួមទាំងបងប្អូនអតីតយុទ្ធជនទើបទទួលអំណោយនាពេលនេះ, រាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត ប្តេជ្ញាខិតខំកសាងហេដ្ឋារចនាសម្ព័ន្ធ ដូចជា ផ្លូវ ភ្លើង សាលារៀន វត្តអារាម ដើម្បីលើកកម្ពស់ជីវភាពរស់នៅរបស់អតីតយុទ្ធជនឱ្យកាន់តែប្រសើរ។

អតីតយុទ្ធជនដែលទទួលបានផ្ទះ និងដីសម្បទានសង្គមកិច្ច បានថ្លែងអំណរគុណយ៉ាងជ្រាលជ្រៅជូនចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដែលបានបន្តគិតគូរពីសុខទុក្ខរបស់អតីតយុទ្ធជនគ្រប់រូប។ លើសពីនេះ អតីតយុទ្ធជន បានចាត់ទុកអំណោយទាំងនេះនឹងក្លាយជាមរតកដ៏មានអត្ថន័យសម្រាប់បន្តទៅកូនចៅ និងក្រុមគ្រួសាររបស់ខ្លួន។

គួរជម្រាបជូនថា ក្នុងនាមសម្ដេចតេជោ ហ៊ុន សែន ប្រធានសមាគម និងសម្ដេចចធិបតី ហ៊ុន ម៉ាណែត អនុប្រធានទី១ សមាគម, ឯកឧត្តមកិត្តិសង្គហបណ្ឌិត គន់ គីម តែងបានចុះជួបបងប្អូនអតីតយុទ្ធជនតាមខ្នងផ្ទះជាប់ជាប្រចាំ ដើម្បីពិនិត្យមើលពីជីវភាពរស់នៅ និងសិក្សាឈ្វេងយល់ពីតម្រូវការចាំបាច់របស់បងប្អូនអតីតយុទ្ធជន ដែលអាចផ្ដល់ជូនតាមរយៈគោលនយោបាយដោះស្រាយបញ្ហាក្នុងក្របខណ្ឌសមាគមផង ក្របខណ្ឌសប្បុរសជនផង និងក្របខណ្ឌរាជរដ្ឋាភិបាលផង៕