ឯកឧត្តម ជា សុមេធី បញ្ជាក់ថា បងប្អូនជនជាប់ឃុំជាស្ត្រីមានផ្ទៃពោះ និងកូនអាយុក្រោម ២ឆ្នាំ តាមម្ដាយនៅក្នុងពន្ធនាគារ ទទួលបានការយកចិត្តទុកដាក់ខ្ពស់ពីរាជរដ្ឋាភិបាល

ឯកឧត្តម ជា សុមេធី បញ្ជាក់ថា បងប្អូនជនជាប់ឃុំជាស្ត្រីមានផ្ទៃពោះ និងកូនអាយុក្រោម ២ឆ្នាំ តាមម្ដាយនៅក្នុងពន្ធនាគារ ទទួលបានការយកចិត្តទុកដាក់ខ្ពស់ពីរាជរដ្ឋាភិបាល

នៅព្រឹកថ្ងៃព្រហស្បតិ៍ ទី២៨ ខែសីហា ឆ្នាំ២០២៥ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន ព្រមទាំងថ្នាក់ដឹកនាំ អមដំណើរដោយ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ និងលោកជំទាវ ព្រមទាំងថ្នាក់ដឹកនាំ អគ្គនាយកដ្ឋានពន្ធនាគារ ក្រសួងមហាផ្ទៃ អញ្ជើញជួបសំណេះសំណាល សួរសុខទុក្ខ បងប្អូនជនជាប់ឃុំ ជាស្ត្រីមានផ្ទៃពោះ និងកូនតាមម្ដាយអាយុក្រោម ២ឆ្នាំ ដែលកំពុងទទួលផល ពីការអនុវត្តកម្មវិធីឧបត្ថម្ភសាច់ប្រាក់ ជូនជនជាប់ឃុំជាស្ត្រីមានផ្ទៃពោះ និងកូនអាយុក្រោម ២ឆ្នាំ តាមម្ដាយនៅក្នុងពន្ធនាគារ នៅមណ្ឌលអប់រំកែប្រែទី២ ក្នុងរាជធានីភ្នំពេញ។

ឯកឧត្តម ជា សុមេធី បានឲ្យដឹងថា តាមរយៈក្រុមប្រឹក្សាជាតិកម្ពុជាដើម្បីស្រ្តី បានគោរពស្នើសុំ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីធ្វើការគិតគូរ ដល់ជនជាប់ឃុំជាស្រ្តីមានផ្ទៃពោះ នៅក្នុងពន្ធនាគារ រួមមាន ស្នើរៀបចំបង្កើតឱ្យមានជាកម្មវិធីដើម្បីផ្តល់អត្ថប្រយោជន៍ ជូនដល់ជនជាប់ឃុំជាស្រ្តីមានផ្ទៃពោះ និងកុមារអាយុក្រោម ២ឆ្នាំ ព្រោះថា បើទោះបីជាម្តាយត្រូវជាប់ពិរុទ្ធក៏ដោយ តែទារកនៅក្នុងផ្ទៃ និងកូនតាមម្តាយនៅក្នុងពន្ធនាគារមិនមានកំហុសនោះទេ។ ដូច្នេះយើងត្រូវយកចិត្តទុកដាក់គិតគូរដល់សុខុមាលភាពរបស់ពួកគាត់ តាមរយៈការផ្តល់ការគាំពារប្រកបដោយសមធម៌ និងបរិយាបន្ន ស្របតាមគោលការណ៍ «មិនបោះបង់ពលរដ្ឋណាម្នាក់» និងបានស្នើរៀបចំឱ្យមានការបណ្តុះបណ្តាលជំនាញវិជ្ជាជីវៈក្នុងពន្ធនាគារដល់ស្រ្តីដែលកំពុងជាប់ឃុំ ដើម្បីឱ្យពួកគាត់អាចមានលទ្ធភាពចិញ្ចឹមជីវិត នៅពេលចេញពីពន្ធនាគារផងដែរ។

ឯកឧត្តម រដ្ឋមន្ត្រី ក៏បានបញ្ជាក់ទៀតថា កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម ២ឆ្នាំ មិនមែនជាកម្មវិធីថ្មី ដែលរាជរដ្ឋាភិបាលទើបដាក់ឱ្យអនុវត្តនោះទេ កម្មវិធីនេះ បានចាប់ផ្តើមអនុវត្តតាំងពីឆ្នាំ២០១៩ ដោយមានវិសាលភាពគ្របដណ្តប់លើគ្រួសារមានបណ្ណសមធម៌ និងបានពង្រីកវិសាលភាពនៃការឧបត្ថម្ភសាច់ប្រាក់នេះ ជូនដល់ជនជាប់ឃុំជាស្ត្រីមាផ្ទៃពោះ និងកុមារអាយុ២ឆ្នាំ តាមម្តាយក្នុងពន្ធនាគារ។ 

សូមបញ្ជាក់ដែលថា បច្ចុប្បន្ន រាជរដ្ឋាភិបាល បានពង្រីកវិសាលភាពគ្របដណ្តប់ ដល់សមាជិក ប.ស.ស ជាកម្មករ និយោជិត មន្រ្តីរាជការ មន្រ្តីកម្មសិក្សា និងមន្រ្តីជាប់កិច្ចសន្យា ជាស្រ្តីមានផ្ទៃពោះ និងកុមារអាយុក្រោម ២ឆ្នាំ ដែលបាននិងកំពុងអនុវត្តដោយបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ។ 

យោងតាមរបាយការណ៍ ពីមូលនិធិជាតិជំនួយសង្គម កម្មវិធីនេះ បានគ្រប់ដណ្តប់លើពន្ធនាគារ និងមណ្ឌលចំនួន ២៦ទីតាំង ដែលមានជនជាប់ឃុំជាស្រ្តី និងមានកូនម្តាយអាយុក្រោម ២ឆ្នាំ នៅក្នុងពន្ធនាគារ។ គិតត្រឹមខែកក្កដា ឆ្នាំ២០២៥ បានធ្វើការចុះឈ្មោះអ្នកទទួលផលសរុបចំនួន ១១២នាក់ ក្នុងនោះ ជនជាប់ឃុំជាស្រ្តីមានផ្ទៃពោះចំនួន ៣៦នាក់ ជាស្រ្តីសម្រាលកូន ១នាក់ និងជាកូនអាយុក្រោម ២ឆ្នាំ តាមម្តាយក្នុងពន្ធនាគារចំនួន ៧៥នាក់។