ឯកឧត្តមបណ្ឌិត ខាន់ ខុន និងលោកជំទាវ អញ្ជើញសម្ភោធដាក់ឱ្យប្រើប្រាស់ជាផ្លូវការនូវ «សាលាប្រជុំគ្រីស្ទបរិស័ទ» ចំនួន៥ខ្នង ដើម្បីបម្រើជាប្រយោជន៍ដល់ប្រជាពលរដ្ឋក្នុងសហគមន៍

ឯកឧត្តមបណ្ឌិត ខាន់ ខុន អនុរដ្ឋលេខាធិការក្រសួងធម្មការនិងសាសនា និងជាប្រធាន សមាគមគ្រីស្ទ បរិស័ទក្នុងសន្តិភាព ហៅកាត់ថា CAP តំណាង ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនា  រួមជាមួយលោកជំទាវ ខឹម បុប្ផា ទីប្រឹក្សាក្រសួងធម្មការនិងសាសនា និងជានាយិកា ក្រុមហ៊ុន ប៊ីម៉ារៀលអ៊ីស្ទេត ឯ.ក បានអញ្ជើញជាអធិបតីភាព ក្នុងពិធី សម្ភោធដាក់ឱ្យប្រើប្រាស់ជាផ្លូវការនូវ « សាលាប្រជុំគ្រីស្ទបរិស័ទ» ចំនួន៥ខ្នង ដើម្បីបម្រើជាប្រយោជន៍ដល់ប្រជាពលរដ្ឋក្នុងសហគមន៍។

ថ្លែងនាឱកាសនោះ ឯកឧត្តមបណ្ឌិត បានពាំនាំនូវការផ្តាំផ្ញើរ និងសួរសុខទុក្ខពី ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនាដល់អាជ្ញាធរមូលដ្ឋាន ពុទ្ធបរិស័ទ និងគ្រីស្ទបរិស័ទ ដែលបានអញ្ជើញចូលរួមជាភ្ញៀវកិត្តិយស និងជាសមាជិក សមាជិកា ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផល “សាលាប្រជុំគ្រីស្ទបរិស័ទ” ទាំង៥ខ្នងនោះ ដោយឯកឧត្តមបណ្ឌិត បានសង្កត់ធ្ងន់ថា ឯកឧត្តមបណ្ឌិត ចាយ បូរិន ក្នុងនាមជារដ្ឋមន្ត្រីក្រសួងធម្មការនិងសាសនា បានយកចិត្តទុកដាក់ជាខ្លាំងលើសាសនានានា ដែលមានវត្តមាននៅក្នុងទឹកដីនៃព្រះរាជាណាចកម្ពុជា ទោះបីជាច្បាប់រដ្ឋធម្មនុញ្ញនៃព្រះរាជាណាចក្រកម្ពុជាចែងថា “ពុទ្ធសាសនាជាសាសនារបស់រដ្ឋ” ក៏ដោយ ក៏ជារឿងៗលោកបានលើកទឹកចិត្តដល់អ្នកដឹកនាំគ្រីស្ទបរិស័ទឱ្យចេះរួមសាមគ្គីគ្នា និងមានសុខដុមរមនាជាមួយគ្នា រវាងសាសនានិងសាសនា ព្រមទាំងនិយាយនិងនិកាយ នៅក្នុងព្រះរាជាណាចក្រកម្ពុជា។

ឯកឧត្តមបណ្ឌិត ក៏បានលើកឡើងផងដែរថា ក្នុងបរិបទនៃអថេរភាព នៅតាមបន្ទាត់ព្រំដែន កម្ពុជា-ថៃ ដូចនេះ គ្រប់ទាំងសាសនិកនៃគ្រីស្ទសាសនាក៏ដូចជាសាសនិកនៃសាសនានានាដទៀតផងដែរ បានចូលរួមយ៉ាងសកម្មជាមួយរាជរដ្ឋាភិបាល ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានដូចជាការចូលរួមអធិដ្ឋានបួងសួង សូមសេចក្តីសុខសន្តិភាពដល់ប្រទេសជាតិ ការរួមចំណែកជាថវិកា ជាសម្ភារ និងជាធនធាននានា ទៅតាមលទ្ធភាពរៀងខ្លួន ដើម្បីជួយដល់ប្រជាពលរដ្ឋភៀសសឹក ក៏ដូចជា វិរកងទ័ពជួរមុខផងដែរ។ ឯកឧត្តមបណ្ឌិតបញ្ជាក់ថា ការររួមចំណែកទាំងនេះ គឺដើម្បីបង្ហាញពីការរួបរួមគ្នា ដើម្បីការពារទប់ស្កាត់ ពីការរំលោភបំពានមកលើអធិបតេយ្យជាតិកម្ពុជា ព្រោះការរួមសាមគ្គីភាពនេះ គឺជារឿងសំខាន់ និងចាំបាច់ ពីព្រោះយើង គឺជាខ្មែរតែមួយ។ដូច្នេះ ការចូលរួមជាមួយរដ្ឋាភិបាល ដើម្បីការកសាង និងការអភិវឌ្ឍជាតិ ឱ្យមានសុខសន្តិភាព និងការរីកចម្រើនលើគ្រប់វិស័យ ចាំបាច់ត្រូវមានការចូលរួម ពីគ្រប់សាសនា គ្រប់និន្នាការនយោបាយទាំងអស់ ទាំងក្នុង និងទាំងក្រៅប្រទេស។

ឯកឧត្តមបណ្ឌិត បានបញ្ជាក់ជាថ្មីថា៖ សមិទ្ធផលទាំងនេះ គឺជាអំណោយរបស់ សមាគមគ្រីស្ទបរិស័ទក្នុងសន្តិភាព ដើម្បីជាការលើកកម្ពស់នូវឧត្តមភាព របស់គ្រីស្ទបរិស័ទ ក្នុងសហគមន៍។ លោកបានថ្លែងបន្ថែមថា ការផ្តល់នូវ “សាលាប្រជុំគ្រីស្ទបរិស័ទ” នេះ គឺដើម្បីជួយដល់ គ្រីស្ទបរិស័ទ ឱ្យមានទីកន្លែងសមរម្យសម្រាប់ជួបប្រជុំអធិដ្ឋាន ថ្វាយបង្គំព្រះ រៀនព្រះបន្ទូលព្រះ ការប្រកបសាមគ្គីគ្នា និងជាពិសេស ជាកន្លែងជួយជុំគ្នាធ្វើការងារមនុស្សធម៌ ហើយជាការជួយដល់ប្រទេសជាតិ ការអភិវឌ្ឍន៏ តាមរយ:សេចក្ដីជំនឿ តាមវិស័យគ្រីស្ទបរិស័ទ ដោយរក្សានូវការរួមសាមគ្គីភាព ក្នុងមូលដ្ឋានប្រកបដោយចីរភាពល្អក្នុងភូមិ។ សាលាប្រជុំនីមួយៗមានទំហំ ៦ម៉ែត x ១២ម៉ែត ដែលមានទីតាំងស្ថិតនៅ៖

1- ភូមិតាំងយ៉ ឃុំប្រម៉ោយ ស្រុកវាលវែង ខេត្តពោធិ៍សាត់ ។

2- ភូមិត្រពាំងល្ពៅ ឃុំជ័យយោ ស្រុកចំការលើ ខេត្តកំពង់ចាម ។

3- ភូមិពូក្រេង ឃុំស្រែអំពូម ស្រុកពេជ្រាដា ខេត្តមណ្ឌលគិរី ។

4-  ភូមិទំពួនរឺងធំ ឃុំតាវែងក្រោម ស្រុកតាវែង ខេត្តរតនគិរី ។

5- ភូមិតាវែងទីរួមស្រុក ឃុំតាវែងលើ ស្រុកតាវែង ខេត្តរតនគិរី ។

ចុងក្រោយ ឯកឧត្តមបណ្ឌិត បានបញ្ជាក់ និងផ្តាំផ្ញើថា សមិទ្ធផលដ៏មានតម្លៃទាំងអស់នេះ បានកើតឡើងជារូបរាង ក៏ដោយសារមានការរួមចំណែក និងការគាំទ្រ ពីគ្រប់គ្រីស្ទបរិស័ទ ទាំងនៅក្នុង និងនៅក្រៅប្រទេស តាមរយៈ សមាគមគ្រីស្ទបរិស័ទក្នុងសន្តិភាព និងអង្គការ Relevant Expeditions រួមជាមួយការឧបត្ថម្ភគាំទ្រជាថវិការដ៏ពិសេសពី អង្គការ ចយ មែយើរ – ដៃនៃសេចក្តីសង្ឃឹម (Joyce Meyer Ministries – Hand of Hope) ដូច្នេះ សូមថ្នាក់ដឹកនាំគ្រីស្ទបរិស័ទ និងពួកជំនុំ ជួយគ្នាថែរក្សានូវសមិទ្ធផលទាំងនេះ ឱ្យបានល្អនិងគង់វង់នៅយូរអង្វែង ៕