ក្រសួងបរិស្ថាន ផាកពិន័យក្រុមហ៊ុន និងរោងចក្រ ចំនួន៥២ និងខ្លះទៀតបញ្ជាឱ្យកែប្រែឈានដល់ផ្អាកដំណើរការទាំងស្រុង

ក្រុមហ៊ុន និងរោងចក្រ ចំនួន៥២ ត្រូវបាន ក្រសួងបរិស្ថាន ផាកពិន័យ បញ្ជាឱ្យកែប្រែ និងខ្លះទៀតត្រូវបានផ្អាកដំណើរការទាំងស្រុងតែម្ដង ក្នុងឆមាសទី១ឆ្នាំ២០២៥នេះ ក្រោយរកឃើញក្រុមហ៊ុនទាំងនោះបញ្ចេញសំណល់ធ្វើឱ្យប៉ះពាល់ដល់បរិស្ថាន។

ការថ្លែងនេះ ក្រោយកិច្ចប្រជុំពិនិត្យ និងពិភាក្សាលើវឌ្ឍនភាព ការងារ ប្រចាំឆមាសទី១ ឆ្នាំ២០២៥នាព្រឹកថ្ងៃទី២៧ សីហា នៅទីស្តីការក្រសួងបរិស្ថាន ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានអោយដឹងថា ក្រុមហ៊ុនចំនួន៥២ ត្រូវបានក្រសួងផាកពិន័យ ហើយក្រុមហ៊ុនខ្លះដែលបំពុលខ្លាំងយើងបានអោយគាត់សងសំណង់ សំអាតទឹកអោយស្អាតវិញធ្ងន់តែម្តងអត់លើកលែងទេ អោយធ្ងន់ជាទីបំផុតដើម្បីអោយក្រុមហ៊ុនដទៃទៀត កុំធ្វើតាម តែធ្វើតាមផាក អោយសំណងអោយធ្ងន់។ 

ឯកឧត្តម រដ្ឋមន្ត្រី ការសងសំណងដើម្បីយកលុយទេ គឺដើម្បីកុំអោយធ្វើទៅទៀត តែក្រុមហ៊ុនធ្វើទៅទៀតប្រភពទឹកស្អាតរបស់យើងមិនស្អាតទេ សុខភាពប្រជាជនរងគ្រោះ។ ឧទាហរណ បើទឹកបំពុលតែ១លិត្រចូលទឹកស្អាត ប្រជាជនប៉ុន្មាននាក់ទៅឈឺ ព្យាបាលជំងឺអស់ប៉ុន្មាន អាហ្នឹងវាធ្ងន់ធ្ងរណាស់ ហើយបើបាត់បង់ជីវិត ជីវិតថ្លៃជាងអ្វីៗទាំងអស់ គ្មានអ្វីទិញបានទេ ហើយការផាកពិន័យអត់គ្រប់គ្រាន់ទេ។

សូមបញ្ជាក់ថា មកទល់ពេលនេះ មន្រ្តីជំនាញ នៃក្រសួងបរិស្ថាន បានរកឃើញរោងចក្រ សហគ្រាស ៥២កន្លែង បានបញ្ចេញសំណល់រាវមានជាតិពុល ប៉ះពាល់ប្រភពទឹកសាធារណៈ។ រោងចក្រល្មើសទាំងនោះ ត្រូវបានក្រសួងបរិស្ថាន ចាត់វិធានការតាម «ក្រមបរិស្ថាន និងធនធានធម្មជាតិ» ដូចជាពិន័យអន្តរការណ៍, ផ្អាកផលិតកម្ម និងតម្រូវឱ្យរោងចក្ររៀបចំអាងប្រព្រឹត្តកម្មសំណល់រាវតាមស្តង់ដារ មុននឹងឱ្យដំណើរការវិញជាដើម៕