លោកឧត្តមសេនីយ៍ទោ សេង ធារិន ដឹកនាំកងកម្លាំង យោធាជាង៨០០នាក់ ចុះបង្ក្រាបបទល្មើសនៅតំបន់បឹងទន្លេសាប

ខេត្តបន្ទាយមានជ័យ៖ ដើម្បីអនុវត្តតាមបទបញ្ជាររបស់ប្រមុខរាជរដ្ឋាភិបាល ក្នុងការបង្ការបង្រ្កាបទប់ស្កាត់ឲ្យខាងតែបាននូវរាល់បទល្មើសនេសាទផ្សេងៗ ក្នុងតំបន់បឹងទន្លេសាប ឲ្យកាន់តែមានប្រសិទ្ធភាពនោះ លោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោភូមិភាគទី៥ និងជាប្រធានគណៈបញ្ជាការដឹកនាំបង្រ្កាបបទល្មើសនេសាទបឹងទន្លេសាប បានដឹកនាំកងកម្លាំងយោធាចំនួន៨០០នាក់ ក្នុងនោះ ក៏មានការចូលរួមពីកងពលតូចថ្មើរជើងលេខ៥១ សហការចុះធ្វើការបង្ក្រាបរាល់បទល្មើសនេសាទ ខុសច្បាប់នានាក្នុងតំបន់បឹងទន្លេសាប ត្រង់ចំណុចភូមិសាស្រ្តខេត្តពោធិ៍សាត់ បាត់ដំបង និងខេត្តសៀមរាប ដើម្បីបង្ការទប់ស្កាត់រាល់បទល្មើសនេសាទ និងបានរក្សានូវពូជមច្ឆជាតិឲ្យបាននៅគង់វង្ស។

ជាមួយគ្នានោះដែរលោកឧត្តមសេនីយ៍ទោ សេង ធារិន បានបន្តថា ក្រោយពីទទួលបានបទបញ្ជាពីប្រមុខរាជរដ្ឋាភិបាលកម្ពុជា លោកបានដឹកនាំកងកម្លាំង ជាង៨០០នាក់ ធ្វើការចុះបង្ក្រាបរាល់បទល្មើសនេសាទខុបច្បាប់ជុំវិញបឹងទន្លេសាប យ៉ាងសស្រាកសស្រាំ ដូចភ្លៀងរលឹម ដើម្បីសម្រេចឲ្យបានតាមបទបញ្ជារបស់ប្រមុខរាជរដ្ឋាភិបាល។

លទ្ធផលក្នុងការចុះបង្រ្កាបនោះដែរ គឺបានរឹបអូស សម្ភារៈ នេសាទខុសច្បាប់មួយចំនួន យកមកធ្វើការដុតបំផ្លាញចោល និងបានព្រលែងត្រីគ្រប់ប្រភេទចូលទន្លេវិញផងដែរ។

ទន្ទឹមគ្នានោះដែរលោកឧត្តមសេនីយ៍ទោ សេង ធារិន ក៏បានអំពាវនាវដល់បងប្អូនប្រជាពលរដ្ឋ សូមកុំប្រើប្រាស់ឧបករណ៍នេសាទខុសច្បាប់ ដែលវានាំឱ្យអន្តរាយដល់ពូជត្រី និងសូមចូលរួមអភិរក្សពូជត្រីដែលមាននៅក្នុងតំបន់បឹងទន្លេសាបទាំងអស់គ្នា ឱ្យបានគង់វង្ស។ សូមឱ្យបងប្អូនប្រជាពលរដ្ឋចូលរួមសហការជាមួយកងកម្លាំង បើមានបទល្មើសនេសាទខុសច្បាប់កើតមាន សូមរាយការណ៍មកកងកម្លាំង ដើម្បីធ្វើការចុះអន្តរាគមន៍បង្ក្រាបឱ្យបានទាន់ពេលវេលា៕