ឯកឧត្តម រដ្ឋមន្ត្រី នេត្រ ភក្ត្រា ថ្លែងថា សុខភាពភ្នែកគឺសំខាន់ណាស់ដែលអាចឲ្យយើងឃើញនូវអ្វីដែលជាដំណើរនៃធម្មជាតិ ដំណើរនៃការអភិវឌ្ឍប្រទេស ដំណើរនៃការវិវឌ្ឍអ្នកនៅជុំវិញខ្លួន និងកូន ចៅរបស់យើង

ប៉ុន្តែបើសិនជាភ្នែករបស់យើងមិនបានមើលឃើញ នោះគឺអ្វីៗដែលអាចមើលអ្វីនេះ ទៅមុខយើងឃើញតែរូបភាពអតីតកាល,

ដូច្នេះហើយត្រូវថែរក្សាឲ្យបានល្អកុំជឿការឃោសនាផ្សព្វផ្សាយតាមប្រព័ន្ធ អនឡាញ គឺភាគច្រើនមិនស្របតាមវិជ្ជបញ្ជា របស់វេជ្ជបណ្ឌិតនោះទេ ត្រូវទៅមន្ទីរពេទ្យជំនាញភ្នែកដើម្បីពិនិត្យព្យាបាលបានត្រឹមត្រូវ,

នេះជាការថ្លែងរបស់ ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន ក្នុងឱកាសអញ្ជើញជាអធិបតីក្នុងពិធី ពិនិត្យភ្នែក និងវាស់កាត់វ៉ែនតា ជាប្រភេទវ៉ែនតា ការពារកុំព្យូទ័រ វ៉ែនតាមីញ៉ូប និងវ៉ែនតាសម្រាប់អានអក្សរ ជូនដល់ថ្នាក់ដឹកនាំ និងមន្ត្រីរាជការ មន្ត្រីជាប់កិច្ចសន្យា ក្រសួងព័ត៌មាន ប្រមាណ ៦០០នាក់ ដោយឥតគិតថ្លៃ នៅព្រឹកថ្ងៃទី២៩ ខែវិច្ឆិកា ឆ្នាំ២០២៥ សាលមណ្ឌលបណ្តុះបណ្តាលនិងវិក្រឹតការវិជ្ជាជីវៈសារព័ត៌មាន ទីស្តីការក្រសួង ដោយមានការចូលរួមពី ឯកឧត្តម ជា ណារ៉េត រដ្ឋលេខាធិការក្រសួងធម្មការ និងសាសនា

លោក ចក្ខុបណ្ឌិត ប៉ាង សាម៉ន ប្រធានគ្រូពេទ្យ គៀនឃ្លាំង ។

ឯកឧត្តម រដ្ឋមន្រ្តី នេត្រ ភក្ត្រា បានជម្រាបជូនថា ការដែលក្រសួងព័ត៌មាន សហការជាមួយ ក្រុមគ្រូពេទ្យភ្នែក គៀនឃ្លាំង ធ្វើការពិនិត្យភ្នែក និងផ្តល់ជូនវ៉ែនតាដល់ ថ្នាក់ដឹកនាំ ទីប្រឹក្សា ជំនួយការ មន្ត្រីរាជការ និងមន្ត្រីជាប់កិច្ចសន្យាក្រសួងព័ត៌មាន ធ្វើឡើងក្នុងគោលបំណងសំខាន់លើការថែទាំសុខភាពភ្នែក ដើម្បីអនុវត្តការងារប្រចាំថ្ងៃឱ្យកាន់តែប្រសើរឡើង និងមាន ប្រសិទ្ធភាពខ្ពស់ ។ ឯកឧត្តម រដ្ឋមន្ត្រី បានថ្លែងការអរគុណ លោក ចក្ខុបណ្ឌិត ប៉ាង សាម៉ន ប្រធានគ្រូពេទ្យគៀនឃ្លាំង ដែលបាននាំមកនូវអំណោយមួយដែលផ្តល់នូវតម្លៃជីវិត និងផ្តល់ក្តីសង្ឃឹមបន្ថែមទៀត ទាក់ទងបញ្ហាសុខភាពភ្នែក កាត់បន្ថយការស្រវាំងភ្នែក ឬបញ្ហាឈឺក្បាល។ ប្រសិនបើអ្នកមានជំងឺភ្នែកមីញ៉ូប មិនមាន វ៉ែនតាជាជំនួយនោះទេ ច្បាស់ណាស់ ប្រសិទ្ធភាពការងារក៏នឹងមិនធ្វើបានល្អនោះដែរ ពីព្រោះបញ្ហាជំងឺភ្នែក វាបង្កផលរំខានជាច្រើនដល់អ្នកជំងឺ។ ឯកឧត្តម នេត្រ ភក្ត្រា បានលើកឡើងថា បុគ្គលដែលមានបញ្ហាភ្នែក ប៉ុន្តែនៅពេលទទួលបានវ៉ែនតា ដែលក្រុមគ្រូពេទ្យជំនាញបានពិនិត្យ វាស់ជាក់ស្តែងតាមអាការៈភ្នែករបស់អ្នកជំងឺច្បាស់ណាស់ វានឹងធ្វើឱ្យអ្នកមានបញ្ហាភ្នែកដែលបានពាក់វ៉ែនតា នឹងមានអារម្មណ៍ប្លែក និងធូរស្រាល មានអារម្មណ៍ស្រឡះក្នុងខ្លួន ដែលអាចជួយឱ្យអ្នកជំងឺអាចបំពេញការងារបានយ៉ាងរលូន។

ឆ្លៀតក្នុងឱកាសនេះដែរ ឯកឧត្តម នេត្រ ភក្ត្រា បានលើកទឹកចិត្តដល់អ្នកមានជំងឺភ្នែក មកទទួលសេវាព្យាបាលនៅមន្ទីរពេទ្យជំនាញឯកទេសចក្ខុ ពីព្រោះបច្ចុប្បន្ននេះ មន្ទីរពេទ្យមានឧបករណ៍ទំនើប និងមានក្រុមគ្រូពេទ្យជំនាញៗ សម្រាប់ពិគ្រោះ និងព្យាបាលជំងឺភ្នែកជូនអ្នកកជំងឺ។ បន្ថែមពីនេះ អ្នកជំងឺដែលមានបណ្ណ ប.ស.ស នៅក្នុងដៃ គឺមិនតម្រូវឱ្យចំណាយថវិកាលើថ្លៃព្យាបាលនោះទេ។

លោកចក្ខុបណ្ឌិត ប៉ាង សាម៉ន បានជម្រាបជូនថា សកម្មភាពធ្វើការពិនិត្យភ្នែក និងផ្តល់វ៉ែនតា នេះធ្វើឡើងតាំងពីឆ្នាំ២០១១ ដោយមុនដំបូងនៅក្នុងស្រុកកណ្តាលស្ទឹង ខេត្តកណ្តាល ហើយបានបន្តធ្វើនៅតាមបណ្តាខេត្ត ក្រុង ក្រសួង ស្ថាប័ន សរុបបានចំនួន ៩៤លើក ដោយធ្វើការពិនិត្យ និងផ្តល់វ៉ែនតា ជូនដល់គ្រូបង្រៀន និងមន្ត្រីរាជការសរុបបានចំនួនជាង ៣មុឺន ៥ពាន់នាក់។ សម្រាប់ឱកាសកម្មវិធីថ្ងៃនេះ នៅក្រសួងព័ត៌មាន ធ្វើឡើងក្នុង គោលបំណងចង់ឃើញមន្ត្រីរាជការ បានវាស់ ពិនិត្យភ្នែកបានត្រឹមត្រូវ ព្រោះកន្លងមកពិនិត្យឃើញថា លោកគ្រូ អ្នកគ្រូ និងមន្រ្តីរាជការ ពេលខ្លះបានទិញវ៉ែនតា តម្លៃថោកៗយកមកពាក់ ដោយមិនបានវាស់ភ្នែកបានត្រឹមត្រូវ ។ ដូច្នេះក្នុងឱកាសនេះ លោកបាននាំក្រុមគ្រូពេទ្យ មកពិនិត្យភ្នែក និងផ្ដល់វ៉ែនតាដល់មន្ត្រីរាជការនៅក្រសួងព័ត៌មាន ឥតគិតថ្លៃ ដោយប្រើប្រាស់ថវិកាផ្ទាល់ខ្លួនរបស់ក្រុមគ្រួសាររបស់លោកផ្ទាល់។

លោកចក្ខុបណ្ឌិត បានបញ្ជាក់ថា ការពិនិត្យភ្នែក និងផ្តល់វ៉ែនតាជូនមន្ត្រីរាជការនៃក្រសួងព័ត៌មាន ចង់រួមចំណែកដល់រាជរដ្ឋាភិបាលកម្ពុជា និងបម្រើដល់ប្រទេសជាតិ ហើយគិតថាមន្ត្រីរាជការ គឺត្រូវការវ៉ែនតាជាចាំបាច់ក្នុងការមើល សរសេរ និងការអាន ធ្វើឯកសារផ្សេងៗ ជារៀងរាល់ថ្ងៃ ម្យ៉ាងវិញទៀត គឺដោយសារឃើញមន្ត្រីរាជការ គាត់មិនសូវមានពេល ឬមិនបានវាស់ភ្នែកឱ្យត្រឹមត្រូវ គាត់ច្រើនតែទិញវ៉ែនតា នៅតាមទីផ្សារយកមកប្រើតែម្ដង។

លោក ប៉ាង សាម៉ន បានបញ្ជាក់ដែរថា ក្នុងនាមលោកជាគ្រូពេទ្យឯកទេសជំងឺភ្នែក យើងចង់រួមចំណែកទិញវ៉ែនតាល្អៗជូនដល់មន្ត្រីរាជការ និងវាស់បានត្រឹមត្រូវ មិនមែនចេះតែយកមកពាក់នោះទេ គឺយើងមានម៉ាស៊ីនវាស់ដឺក្រេត្រឹមត្រូវ ហើយទើបផ្ដល់វ៉ែនតាត្រឹមត្រូវដល់ជូន អាចពាក់ធ្វើការងារ សរសេរឯកសារបានងាយស្រួលបំពេញការងារប្រចាំថ្ងៃ។

ការផ្ដល់វ៉ែនតានេះសំដៅលើវ៉ែនតាមីញ៉ូបឆ្ងាយ និងមីញ៉ូបជិត មិនគិតចាស់ក្មេងនោះទេ។ ក្នុងឱកាសនោះដែរ លោកក៏បានផ្ដាំផ្ញើដល់មន្ត្រីរាជាការ ដែលបញ្ហាជំងឺភ្នែកឡើងបាយ កន្ទុយថ្លែន មិនអាចពាក់វ៉ែនតាជួយឱ្យភ្លឺទេ ហើយក៏មិនមានថ្នាំបន្ដក់ ថ្នាំលេបណាមានប្រសិទ្ធភាពអាចព្យាបាលឡើងបាយ កន្ទុយថ្លែនបាននោះដែរ។ ត្រូវតែទៅពិគ្រោះជាមួយគ្រូពេទ្យ វេជ្ជបណ្ឌិតឯកទេសជំងឺភ្នែកនៅក្បែរផ្ទះរបស់គាត់ ដើម្បីអាចប្រឹក្សាយោបល់ថា តើព្យាបាលយ៉ាងម៉េច ចៀសជាងឱ្យគាត់ទិញថ្នាំ ឬក៏វ៉ែនតាមកប្រើ គឺជាការខាតបង់ថវិកាឥតប្រយោជន៍ ជួនកាលទុកឱ្យជំងឺរបស់គាត់កាន់តែធ្ងន់ទៅៗ ដល់ពេលត្រូវព្យាបាល គឺហួសពេលមានន័យថាទោះបីជាយើងបកយើងព្យាបាលក៏នៅតែមើលមិនឃើញដែរព្រោះដោយសារគាត់ទុកជ្រុលពេលហើយ។ ដូច្នេះសូមបញ្ជាក់ថាវ៉ែនតា និងថ្នាំបន្តក់ ថ្នាំលេប មិនអាចជួយព្យាបាលជំងឺឡើងបាយ កន្ទុយថ្លែនបាននោះទេ៕