ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការ សមាគមអតីតយុទ្ធជន និងនិវត្តជនកម្ពុជា (អ.ន.ក.) នារសៀលថ្ងៃទី២០ ខែសីហា ឆ្នាំ២០២៦ បានអញ្ជើញជាអធិបតីក្នុងពិធីប្រកាសសមាសភាពថ្នាក់ដឹកនាំ គណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តបន្ទាយមានជ័យ។
ពិធីប្រកាសសមាសភាពថ្នាក់ដឹកនាំ គណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តបន្ទាយមានជ័យ រួមមាន លោក ឃ្លោក នួយ ជាអនុប្រធានប្រចាំការ និងជាប្រធានលេខាធិការដ្ឋាន អ.ន.ក.ខេត្ត, លោក ហ៉ឹល រ៉ាយ៉ា ជាអនុប្រធាន អ.ន.ក.ខេត្ត និងលោកឧត្តមសេនីយ៍ត្រី សឿម សារិទ្ធ ជាអនុប្រធាន អ.ន.ក.ខេត្ត។
ពិធីនេះមានការអញ្ជេីញចូលរួមពី ឯកឧត្ដមប្រតិភូអមរបស់សមាគម, ឯកឧត្តម ប្លែក វ៉ារី ប្រធានក្រុមប្រឹក្សាខេត្ត, ឯកឧត្ដម អ៊ុំ រាត្រីអភិបាលខេត្ត និងជាប្រធាន អ.ន.ក.ខេត្ត, ស្នងការនគរបាលខេត្ត, តំណាងមេបញ្ជាការកងរាជអាវុធហត្ថខេត្ត, មេបញ្ជាការតំបន់ប្រតិបត្តិការសឹករងខេត្ត, លោក-លោកស្រីប្រធានមន្ទីរ-អង្គភាពជុំវិញខេត្ត, អភិបាលក្រុង-ស្រុក, មេឃុំ-ចៅសង្កាត់, នាយប៉ុស្តិ៍ ដែលពិធីនេះរៀបចំឡើងនៅសាលប្រជុំ សាលាខេត្តបន្ទាយមានជ័យ។
ក្នុងរបាយការណ៍ស្វាគមន៍ ឯកឧត្តម អ៊ុំ រាត្រី ប្រធាន អ.ន.ក.ខេត្ត បានឱ្យដឹងថា បច្ចុប្បន្ននេះអតីតយុទ្ធជន និងនិវត្តជនដែល អ.ន.ក.ខេត្តបន្ទាយមានជ័យ កំពុងគ្រប់គ្រងសរុបមានចំនួន ៦,៧៥៧នាក់ និងចូលជាសមាជិក មានចំនួន ៥,៥៥២នាក់ ខណៈអតីតមន្រ្តីរាជការស៊ីវិលកំពុងគ្រប់គ្រងបច្ចុប្បន្ន សរុបចំនួន ២,២០៨នាក់ និងមាននិវត្តជនចំនួន ១,៧៤៦នាក់។ ក្នុងនោះ មានសមាជិកដាក់ពាក្យស្នើសុំដី និងផ្ទះចំនួន ១៣២គ្រួសារ។
ឯកឧត្តម អ៊ុំ រាត្រី នឹងជំរុញដល់ក្រុមការងារទើបប្រកាសសមាសភាពឱ្យបន្តយកចិត្តទុកដាក់ចុះពិនិត្យ និងតាមដានឱ្យបានជាប់ជាប្រចាំ អំពីស្ថានភាពជីវភាព និងសុខុមាលភាពអតីតយុទ្ធជន និងនិវត្តជន ដើម្បីឆ្លើយតបនឹងគុណបំណាច់ និងការធ្វើពលិកម្មជូនជាតិ និងប្រជាជន។
នាឱកាសនោះ ឯកឧត្តម ទេសរដ្ឋមន្រ្តី មានប្រសាសន៍ថា យោងតាមអនុសាសន៍ដឹកនាំដ៏ខ្ពង់ខ្ពស់ពីសម្តេេចអគ្គមហាសេនាបតីតេជោ ហ៊ុន សែន ប្រធានសមាគម បានដាក់ចេញគោលការណ៍ក្នុងការកែសម្រួលសមាសភាពគណៈកម្មាធិការសមាគមអតីតយុទ្ធជន និងនិវត្តជនកម្ពុជាតាមបណ្តារាជធានី-ខេត្ត, ក្រុង- ស្រុក និងសាខាសមាគមឃុំ-សង្កាត់ ដើម្បីផ្តល់លទ្ធភាពដល់ការអនុវត្តគោលការណ៍ និងការយកចិត្តទុកចិត្តជូនអតីតយុទ្ធជន និងនិវត្តជនទាំងអស់ដែលបានមកជ្រកក្រោមឆ័ត្រមួយរបស់សមាគម។
ឯកឧត្តម ទេសរដ្ឋមន្រ្តី មានប្រសាសន៍ទៀតថា ពិធីប្រកាសកែសម្រួលសមាសភាពថ្នាក់ដឹកនាំសមាគមនាពេលនេះ គឺផ្នែកមួយនៃកិច្ចការងាររបស់សមាគម ដើម្បីធានាថា រចនាសម្ព័ន្ធការងារនៅតាមបណ្ដាខេត្តនានា មានភាពរឹងមាំ និងមានសមត្ថភាពគ្រប់គ្រាន់ក្នុងការសម្របសម្រួល និងផ្ដល់ការយកចិត្តទុកដាក់ខ្ពស់ចំពោះសុខុមាលភាព និងជីវភាពរស់នៅរបស់អតីតយុទ្ធជន និងនិវត្តជនទាំងអស់នៅក្នុងមូលដ្ឋានខេត្តនីមួយៗ ឲ្យទទួលបាននូវគោលនយោបាយ និងអត្ថប្រយោជន៍នានាពីរាជរដ្ឋាភិបាល។
ឯកឧត្តម ទេសរដ្ឋមន្រ្តី បន្តថា គោលបំណងចំបងរបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគម មានចក្ខុវិស័យវែងឆ្ងាយគិតគូរដល់អតីតយុទ្ធជន និងនិវត្តជន ដែលជួបការលំបាកឱ្យទទួលបានអត្ថប្រយោជន៍ ដោយសារអតីតយុទ្ធជន និងនិវត្តជនទាំងអស់សុទ្ធសឹងតែជាអ្នកតស៊ូ ពលី និងលះបង់បម្រើជាតិមាតុភូមិដូចគ្នា និងជាកម្លាំងសាមគ្គីមួយដ៏រឹងមាំដែលបានរួមចំណែកការពារជាតិ ស្ថាបនាជាតិ និងអភិវឌ្ឍន៍ជាតិមកទល់ពេលបច្ចុប្បន្ន។
ឯកឧត្តម ទេសរដ្ឋមន្ត្រី បន្ថែមថា ក្នុងន័យនេះ រាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាអនុប្រធានទី១សមាគម ជានិច្ចកាលបានបន្តអនុវត្ត និងដោះស្រាយជូនអតីតយុទ្ធជន ដោយការចុះជួបផ្ទាល់ជាមួយបងប្អូនអតីតយុទ្ធជន និងនិវត្តជនតាមមូលដ្ឋាន ដើម្បីឈ្វែងយល់ពីសុខទុក្ខ និងការលំបាក, ហើយបានរិះរកគ្រប់មធ្យោបាយ ដើម្បីជួយលើកស្ទួយជីវភាពអតីតយុទ្ធជន និងនិវត្តជនឱ្យទទួលបាននូវអត្ថប្រយោជន៍ជាច្រើនសំដៅកែប្រែជីវភាពរស់នៅកាន់តែល្អប្រសើរឡើង៕
