ឯកឧត្តមបណ្ឌិត ម៉ុង ឫទ្ធី ចុះសំណេះសំណាលជាមួយមន្ត្រីមូលដ្ឋានក្នុងខេត្តព្រះសីហនុ ដើម្បីពង្រឹងប្រសិទ្ធភាពសេវាសាធារណៈ

នៅព្រឹកថ្ងៃទី១១ ខែកុម្ភៈ ឆ្នាំ២០២៦ ឯកឧត្តមបណ្ឌិត ម៉ុង ឫទ្ធី ប្រធានក្រុមសមាជិកព្រឹទ្ធ សភា ប្រចាំភូមិភាគទី៧ បានអញ្ជើញជួបសំណេះសំណាលជាមួយក្រុមប្រឹក្សាឃុំ សង្កាត់ ស្មៀន និងនាយប៉ុស្តិ៍នគរបាលរដ្ឋបាលទូទាំងខេត្តព្រះសីហនុ នៅស្រុកព្រៃនប់។
ខ្លឹមសារនៃកិច្ចពិភាក្សានេះ គឺផ្តោតទៅលើចំនុចសំខាន់ដូចជា៖
• ការវាយតម្លៃខ្ពស់ចំពោះមន្ត្រីមូលដ្ឋាន៖ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានកោតសរសើរដល់អាជ្ញាធរមូលដ្ឋានដែលបានខិតខំរក្សាសន្តិសុខ សណ្តាប់ធ្នាប់ និងរួមចំណែកអភិវឌ្ឍខេត្តឱ្យក្លាយជាតំបន់សេដ្ឋកិច្ចពិសេសគំរូពហុបំណង។ ជាមួយគ្នានេះ រដ្ឋបាលខេត្តក៏បានត្រៀមលក្ខណៈរួចរាល់សម្រាប់ការពារសុវត្ថិភាពក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ខាងមុខ។
• តួនាទីរបស់ព្រឹទ្ធសភា៖ ឯកឧត្តមបណ្ឌិត ម៉ុង ឫទ្ធី បានបញ្ជាក់ថា ការចុះជួបផ្ទាល់នេះគឺជាយន្តការការពារសិទ្ធិ និងផលប្រយោជន៍របស់ក្រុមប្រឹក្សាឃុំ សង្កាត់ និងប្រជាពលរដ្ឋ។ ព្រឹទ្ធសភាផ្តោតលើអាទិភាពពីរគឺ៖
1. ការលើកកម្ពស់ការទូតសភា។
2. ការធ្វើការជិតស្និទ្ធជាមួយអង្គបោះឆ្នោត ដើម្បីជំរុញគោលនយោបាយវិមជ្ឈការ និងវិសហមជ្ឈការ។

សូមបញ្ជាក់ថា គោលបំណងសំខាន់នៃពិធីសំណេះសំណាលនេះគឺ ពង្រឹងទំនាក់ទំនងរវាងព្រឹទ្ធសភា និងអង្គបោះឆ្នោតនៅមូលដ្ឋាន។ឈ្វេងយល់ពីបញ្ហាប្រឈម និងប្រសិទ្ធភាពនៃការផ្តល់សេវាសាធារណៈជូនពលរដ្ឋ។ប្រមូលសំណូមពរនានាដើម្បីដាក់ជូនព្រឹទ្ធសភាពិនិត្យ និងដោះស្រាយ។
• ការប្តេជ្ញាចិត្តរបស់រាជរដ្ឋាភិបាល៖ បន្តពង្រឹងសន្តិភាព និងទប់ស្កាត់បទល្មើសគ្រប់ប្រភេទ (គ្រឿងញៀន, ល្បែងស៊ីសង, ការជួញដូរមនុស្ស) តាមរយៈគោលនយោបាយ “ភូមិ ឃុំ សង្កាត់មានសុវត្ថិភាព” ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងឈានទៅសម្រេចចក្ខុវិស័យកម្ពុជាឆ្នាំ២០៥០។
ជាទីបញ្ចប់ ឯកឧត្តមបណ្ឌិតបានលើកទឹកចិត្តឱ្យសមាជិកក្រុមប្រឹក្សាឃុំ សង្កាត់ទាំងអស់ ហ៊ានលើកឡើងនូវបញ្ហាប្រឈម និងបទពិសោធន៍នានា ដើម្បីរួមគ្នាស្វែងរកដំណោះស្រាយឱ្យបានចំគោលដៅ និងមានប្រសិទ្ធភាព។

អត្ថបទ៖ ម៉ារ៉ាឌី