ឯកឧត្តមបណ្ឌិត ថោង ខុន៖ អាណត្តិទី៨ ជាអាណត្តិពិសេសសម្រាប់ចលនាអូឡាំពិកកម្ពុជា និងគ្រួសារកីឡាជាតិ

ឯកឧត្តមបណ្ឌិត ថោង ខុន ទេសរដ្ឋមន្ដ្រីទទួលបន្ទុកបេសកកម្មពិសេស និងជាប្រធានគណៈកម្មាធិការជាតិអូឡាំពិកកម្ពុជា(NOCC) មានប្រសាសន៍ថា អាណត្តិទី៨ របស់ NOCC គឺជាអាណត្ដិពិសេសសម្រាប់ចលនាអូឡាំពិកកម្ពុជា និងគ្រួសារកីឡាជាតិ ដែលបានសម្រេចនូវសមិទ្ធផលសំខាន់ៗជាច្រើន ពិសេសភាពជោគជ័យដ៏អស្ចារ្យ នៃព្រឹត្តិការណ៍ SEA Games-ASEAN Para Games ឆ្នាំ២០២៣។

នេះបើតាមសេចក្ដីរាយការណ៍សង្ខេបពីសមិទ្ធផលសំខាន់ៗរបស់ NOCC នៅក្នុងមហាសន្និបាតបញ្ចប់អាណត្តិទី៨(ឆ្នាំ២០២២-២០២៦) និងបន្ដអាណត្តិទី៩ ឆ្នាំ២០២៦-២០៣០ របស់គណៈកម្មាធិការជាតិអូឡាំពិកកម្ពុជា នៅរសៀលថ្ងៃទី១៩ ខែមីនា ឆ្នាំ២០២៦ ដែលប្រព្រឹត្តទៅ ក្រោមអធិបតីភាពលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា។

ឯកឧត្តមទេសរដ្ឋមន្ដ្រីបានគូរំលេចថា «អាណត្តិទី៨ ឆ្នាំ២០២២-២០២៦ គឺពិតជាអាណត្តិពិសេសសម្រាប់ចលនាអូឡាំពិកកម្ពុជា និងគ្រួសារកីឡាជាតិ ពិសេសរាជរដ្ឋាភិបាល និងក្រុមប្រឹក្សាសហព័ន្ធកីឡាអាស៊ីអាគ្នេយ៍ បានផ្តល់សិទ្ធិ និងបេសកកម្មដ៏ធំមួយដល់ NOCC ក្នុងការរៀបចំព្រឹត្តិការណ៍ SEA Games-ASEAN Para Games ឆ្នាំ២០២៣ ដែលជាលទ្ធផលបានជោគជ័យលើសពីការរំពឹងទុកសម្រាប់កំណត់ត្រាប្រវត្តិសាស្រ្តកីឡាជាតិ ៦៤ឆ្នាំ និងសម្រាប់កិត្តិយសកិត្យានុភាពជាតិ និងចលនាអូឡាំពិកកម្ពុជា»។

ឯកឧត្តមបន្ដទៀតថា ក្រោមការដឹកនាំ និងគាំទ្ររបស់រាជរដ្ឋាភិបាល ក្រោយពីទីស្តីការគណៈរដ្ឋមន្ត្រីបានសម្រេចលើប្លង់រចនាកីឡដ្ឋានរួចហើយ NOCC បានរៀបចំបង្កើតគណៈកម្មការត្រួតពិនិត្យបច្ចេកទេសសាងសង់មានការចូលរួមពីគ្រប់ស្ថាប័នពាក់ព័ន្ធ ដែលមានលេខាធិការដ្ឋានមួយ សម្រាប់តាមដាន និងសម្របសម្រួលការងារសាងសង់នេះបានជោគជ័យតាមផែនការកំណត់ ទោះបីជួបការលំបាក និងស្ថិតក្នុងសភាពការណ៍លំបាកនៃការរីករាលដាលនៃជំងឺកូវីដ១៩ ក៏ដោយ។
លើសពីនេះ ក្រោមកិច្ចសហការគ្នាយ៉ាងជិតស្និតជាមួយសហព័ន្ធកីឡាជាតិ យើងបានកសាងមូលដ្ឋានគ្រឹះនៃការគ្រប់គ្រងដឹកនាំ អភិវឌ្ឍជំនាញបច្ចេកទេសកីឡាកម្រិតខ្ពស់ដល់សហព័ន្ធកីឡាជាតិជាច្រើន តាមរយៈវគ្គបណ្តុះបណ្តាលរដ្ឋបាលកីឡា គ្រូបង្វឹកជំនាញ និងមន្ត្រីបច្ចេកទេសពាក់ព័ន្ធ ព្រមទាំងបាន ទំនាក់ទំនងបើកផ្លូវស្វែងរកជំនួយឧបត្ថម្ភបច្ចេកទេសកីឡាដល់សហព័ន្ធកីឡាជាតិមួយចំនួន តាមរយៈ សហព័ន្ធកីឡាអន្តរជាតិ និងសហព័ន្ធកីឡាជាតិនៃតាមបណ្តាប្រទេសជាមិត្ត។

នៅក្នុងអាណត្តិទី៨ នេះដែរ NOCC ក្រោមកិច្ចសហការជាមួយគណៈកម្មាធិការអូឡាំពិកអន្តរជាតិ “IOC” និងបណ្តាប្រទេសជាមិត្តបានបញ្ជូនមន្ត្រីជាន់ខ្ពស់ និងថ្នាក់ដឹកនាំសហព័ន្ធទៅសិក្សាជំនាញគ្រប់គ្រងកីឡាកម្រិតខ្ពស់ថ្នាក់អនុបណ្ឌិតបានចំនួន ៦រូប នៅសាធារណរដ្ឋកូរ៉េ, ប្រទេសក្រិច, ប្រទេសអាល្លឺម៉ង់, ប្រទេសស្វីស និងប្រទេសកាណាដា ដែលសញ្ញាបត្រទាំងអស់សុទ្ធតែទទួលស្គាល់ដោយ IOC ហើយយើងបន្តជ្រើសរើសមន្ត្រីមានសមត្ថភាព ដើម្បីបញ្ជូនទៅសិក្សាជំនាញគ្រប់គ្រងកីឡាកម្រិតខ្ពស់នេះបន្តទៀតក្នុងអាណត្តិថ្មី។

ទន្ទឹមនឹងនោះ NOCC ក៏បានផ្សព្វផ្សាយបណ្តុះបណ្តាល និងបញ្ជ្រាបការយល់ដឹង ស្តីពីការអប់រំអូឡាំពិក គុណតម្លៃអូឡាំពិក អត្ថប្រយោជន៍កីឡាសម្រាប់សង្គមជាតិ និងការអភិវឌ្ឍខ្លួនដល់កុមារា កុមារី សិស្សានុសិស្ស យុវជន មហាជនចំនួនរាប់ម៉ឺននាក់ផងដែរ។ ព្រឹត្តិការណ៍កីឡាមហាជន និងកីឡាទេសចរណ៍ បរិស្ថាន វប្បធម៌ បានក្លាយជាចលនាអូឡាំពិកប្រចាំឆ្នាំយ៉ាងគគ្រឹកគគ្រេងល្បីល្បាញលើឆាកជាតិ-អន្តរជាតិផងដែរ ពិសេសទិវារត់ប្រណាំងអន្តរជាតិធំៗ នៅរាជធានីភ្នំពេញ សៀមរាប-អង្គរ និងខេត្តព្រះសីហនុ ដែលមានអ្នកចូលរួមកាន់តែច្រើនឡើងជាដើម។

ឯកឧត្តមបណ្ឌិត ថោង ខុន បន្ថែមទៀតថា «បន្ទាប់ពីជោគជ័យធ្វើម្ចាស់ផ្ទះស៊ី SEA Games-ASEAN Para Games ឆ្នាំ២០២៣ NOCC ក៏ទទួលបានការផ្តល់សេចក្តីទុកចិត្តពីរាជរដ្ឋាភិបាល គណៈកម្មាធិការប៉ារ៉ាឡាំពិកអាស៊ី និងក្រុមប្រឹក្សាអូឡាំពិកអាស៊ី អនុញ្ញាតជាគោលការណ៍ឲ្យធ្វើម្ចាស់ផ្ទះរៀបចំការប្រកួតកីឡាយុវជនអាស៊ីប៉ារ៉ាហ្គេម លើកទី៦ ឆ្នាំ២០២៩ និងកីឡាយុវជនអាស៊ីលើកទី៥ ឆ្នាំ២០៣១ ដែលក្នុងនោះ NOCC បានចុះហត្ថលេខាលើកិច្ចសន្យាទីក្រុងធ្វើម្ចាស់ផ្ទះ ហើយគណៈកម្មាធិការជាតិប៉ារ៉ាឡាំពិកកម្ពុជា បានចុះអនុស្សារណៈយោគយល់គ្នាធ្វើម្ចាស់ផ្ទះ និងរាជរដ្ឋាភិបាល បានចេញអនុក្រឹត្យបង្កើតគណៈកម្មាធិការជាតិរៀបចំការប្រកួតរួចហើយ និងកំពុងបន្តនីតិវិធីរៀបចំសមាសភាពថ្នាក់ដឹកនាំតាមខ្លឹមសារអនុក្រឹត្យបង្កើតគណៈកម្មាធិការជាតិរៀបចំ»។

គួរដឹងថា ចលលនាអូឡាំពិកកម្ពុជា គឺជាតំណាងចលនាអូឡាំពិកអន្តរជាតិប្រចាំកម្ពុជា ដែលមានសហព័ន្ធកីឡាជាតិជាសមាជិក និងដែគូអភិវឌ្ឍជំនាញវិជ្ជាជីវៈកីឡា ដែលគោរពទៅតាមស្មារតីរបស់ធម្មនុញ្ញអូឡាំពិកអន្តរជាតិ និងលក្ខន្តិកៈរបស់ខ្លួន។ ចលនាអូឡាំពិកកម្ពុជា មិនអាចដឹកនាំការអភិវឌ្ឍចលនាអូឡាំពិកបានទេ ប្រសិនមិនមានការជ្រោមជ្រែងឧបត្ថម្ភគាំទ្រពីរាជរដ្ឋាភិបាល ពិសេសក្រសួងអប់រំ   យុវជន និងកីឡា៕