ឯកឧត្តមបណ្ឌិត ខាន់ ខុន អញ្ជើញជាមួយគ្រីស្ទបរិស័ទ ក្នុងពិធីជួបជុំ «ការអធិដ្ឋាន និងការកាច់នំប៉័ង ដើម្បីសន្តិភាព»

ឯកឧត្តមបណ្ឌិត ខាន់ ខុន អនុរដ្ឋលេខាធិការក្រសួងធម្មការនិងសាសនា និងជាប្រធាន សមាគមគ្រីស្ទ បរិស័ទក្នុងសន្តិភាព (CAP = ឃែប) តំណាង ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនា អញ្ជើញជាអធិបតីក្នុងពិធីជួបជុំគ្នារបស់គ្រីស្ទបរិស័ទកម្ពុជា ដែលប្រារព្ធឡើងក្រោមប្រធានបទ «ការអធិដ្ឋាន និងការកាច់នំប៉័ង ដើម្បីសន្តិភាព» នៅទីរួមខេត្តកំពង់ធំ ។

ឯកឧត្តមបណ្ឌិត ខាន់ ខុន បានបញ្ជាក់នូវក្ដីនឹករលឹក និងសេចក្ដីគោរពស្រឡាញ់ចំពោះគ្រីស្ទបរិស័ទកម្ពុជា របស់ ឯកឧត្តមបណ្ឌិត ចាយ បូរិន ដែលបានសបញ្ជាក់ពីការយកចិត្តទុកដាក់ ការឱ្យតម្លៃ និងការគាំទ្រទៅលើតួនាទីសំខាន់របស់គ្រប់សាសនាក្នុងការរួមចំណែកអភិវឌ្ឍន៍សង្គម តាមរយៈការរួមសាមគ្គីគ្នា និងការរស់នៅដោយមានសន្តិភាព។ ពិធីដ៏មានអត្ថន័យដែលសាសនិកគ្រីស្ទាន ព្រមទាំងបងប្អូនពួកជំនុំគ្រប់កន្លែងបានប្រារព្ធឡើងនេះ គឺក្នុងគោលបំណង អធិដ្ឋានបួងសួងសុំសន្តិភាព និងសេចក្តីសុខសាន្តសម្រាប់ប្រទេសកម្ពុជា ។

ថ្លែងក្នុងពិធីសំណេះសំណាលជាមួយសាសនិកគ្រីស្ទបរិស័ទ ឯកឧត្តមបណ្ឌិត បានលើកឡើងថា ជំនឿ ការសាមគ្គី និងសន្តិភាពជាកម្លាំងដ៏សំខាន់ ដែលអាចជួយពង្រឹងទំនាក់ទំនងសង្គម និងការរស់នៅរបស់ប្រជាជន។ ពិធីនេះក៏បានជំរុញឲ្យសាសនិកគ្រប់រូប បន្តឈរជាប់នឹងការអធិដ្ឋាន ជាមួយរាជរដ្ឋាភិបាល សុំពរជ័យពីព្រះយេស៊ូវគ្រីស្ទឲ្យប្រទេសកម្ពុជាមានសុខសន្តិភាព និងមានភាពរឹងមាំ។

បន្ថែមពីនេះ ឯកឧត្តមបណ្ឌិត បានបញ្ជាក់ថា ក្នុងបរិបទនៃអថេរភាព នៅតាមបន្ទាត់ព្រំដែន កម្ពុជា-ថៃ ដូចនេះ គ្រប់ទាំងសាសនិកនៃគ្រីស្ទសាសនាក៏ដូចជាសាសនិកនៃសាសនានានាដទៀតផងដែរ បានចូលរួមយ៉ាងសកម្មជាមួយរាជរដ្ឋាភិបាល ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានដូចជាការចូលរួមអធិដ្ឋានបួងសួង សូមសេចក្តីសុខសន្តិភាពដល់ប្រទេសជាតិ ការរួមចំណែកជាថវិកា ជាសម្ភារ និងជាធនធាននានា ជាមួយរាជរដ្ឋាភិបាល រួបរួមគ្នាជាធ្លុងមួយ ដើម្បីការពារទប់ស្កាត់ ពីការរំលោភបំពានមកលើអធិបតេយ្យជាតិកម្ពុជា ។ រាជរដ្ឋាភិបាលកម្ពុជា បានប្តេជ្ញាយ៉ាងមុឺងម៉ាត់ និងប្រកាន់យកការដោះស្រាយឈរលើគោលការណ៍ច្បាប់អន្តរជាតិ ការដោះស្រាយដោយសន្តិវិធី និងរក្សាឲ្យបាននូវដែនអធិបតេយ្យភាពទឹកដីរបស់ខ្លួន ទោះក្នុងតម្លៃណាក៏ដោយ។

ជាមួយគ្នានេះ គ្រីស្ទបរិស័ទកម្ពុជាត្រូវបានអំពាវនាវឲ្យបន្តអធិដ្ឋាន និងរួមចំណែកផ្នែកថវិកា ធនធាន និងសមត្ថភាព ដើម្បីការពារ និងទប់ស្កាត់ការរំលោភបំពានលើអធិបតេយ្យជាតិ។ ពិធីនេះក្លាយជាវេទិកាសំខាន់មួយ ដែលបង្ហាញពីទំនាក់ទំនងរឹងមាំ រវាងសាសនានិងរដ្ឋ ក្នុងការរួមគ្នាជំរុញឲ្យប្រទេសកម្ពុជាមានសុខសន្តិភាព និងស្ថិរភាពយូរអង្វែង៕