ឯកឧត្តមបណ្ឌិត កៅ ថាច ចុះជួបសំណេះសំណាលផ្ទាល់ជាមួយប្រជាកសិករស្រុកទឹកផុស សម្រាប់វិស័យកសិកម្មខេត្តកំពង់ឆ្នាំង!

ខេត្តកំពង់ឆ្នាំង៖ នៅព្រឹកថ្ងៃទី ៣០ខែវិច្ឆិកា ឆ្នាំ២០២៥ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួល បន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមន៍បណ្តាញកសិករតេជោ បានអញ្ជើញចុះជួបសំណេះសំណាលដោយផ្ទាល់ និងយ៉ាងស្និទ្ធស្នាលជាមួយបងប្អូនប្រជាកសិករជិត ៥០០ នាក់នៅស្រុកទឹកផុស ខេត្តកំពង់ឆ្នាំង។

ក្នុងឱកាសដ៏មានសំខាន់នេះ ឯកឧត្តមបណ្ឌិតប្រធានបានគូសបញ្ជាក់ពីគោលបំណងចម្បង និងសារៈសំខាន់បំផុតនៃការបង្កើត “សមាគមបណ្តាញកសិករតេជោ” ដែលដើរតួនាទីជាសសរស្តម្ភដ៏រឹងមាំក្នុងការលើកកម្ពស់ជីវភាព និងកិត្យានុភាពរបស់កសិករកម្ពុជា។

តួនាទីស្នូលទាំងពីររបស់ “សមាគមន៍បណ្តាញកសិករតេជោ” ឯកឧត្តមបណ្ឌិត កៅ ថាច បានលើកឡើងយ៉ាងច្បាស់ថា សមាគមនេះមានតួនាទីសំខាន់ ២យ៉ាងគឺ៖

១. ធ្វើជាស្ពានចម្លងដ៏រឹងមាំ÷សមាគមនឹងធ្វើជាចំណុចតភ្ជាប់ដ៏សំខាន់សម្រាប់កសិករ ដើម្បីសម្រេចបាននូវការអភិវឌ្ឍន៍ប្រកបដោយចីរភាព៖

* ក. ភ្ជាប់ទៅប្រភពហិរញ្ញវត្ថុ (ឥណទាន)៖ ឯកឧត្តមបណ្ឌិតបានបញ្ជាក់យ៉ាងមុតមាំថា ធនាគារ ARDB បានត្រៀមរួចជាស្រេចនូវកញ្ចប់ឥណទានពិសេសៗ ដែលមាន អត្រាការប្រាក់ទាប និងលក្ខខណ្ឌអនុគ្រោះ បំផុត ដើម្បីបង្កើនទុនបង្វិល និងលើកកម្ពស់សមត្ថភាពវិនិយោគរបស់បងប្អូនកសិករដោយផ្ទាល់។

* ខ. ភ្ជាប់ទៅបច្ចេកវិទ្យា និងអ្នកជំនាញ៖ ជួយកសិករឱ្យទទួលបាននូវ បច្ចេកវិទ្យាកសិកម្មទំនើបៗ ព័ត៌មានជាក់លាក់ និងការណែនាំពីអ្នកជំនាញ ដើម្បីបង្កើនទិន្នផល គុណភាព និងឈានទៅរកការកែច្នៃដែលផ្តល់នូវ ប្រាក់ចំណេញសមស្រប និងប្រសើរជាងមុន។

* គ. ភ្ជាប់ទៅទីផ្សារតម្លៃកសិផល៖ ផ្តល់ព័ត៌មានទីផ្សារច្បាស់លាស់ និងជួយសម្របសម្រួលការលក់កសិផល ធានាឱ្យកសិករលក់បានក្នុង តម្លៃល្អប្រសើរ និងសមរម្យ ជៀសវាងការគាបសង្កត់តម្លៃ។

* ឃ. ពាំនាំសំឡេងកសិករ៖ ដើរតួជាតំណាងដ៏ស្មោះ ត្រង់ ក្នុងការលើកយកនូវបញ្ហា កង្វល់ និងសំណូមពរនានា ជាពិសេសបញ្ហាទីផ្សារ ទៅដល់ថ្នាក់ដឹកនាំ និងអាជ្ញាធរពាក់ព័ន្ធដើម្បីស្វែងរកដំណោះស្រាយទាន់ពេលវេលា។

២. ជាខែល ឬ ជាឆ័ត្រការពារ÷សមាគមដើរតួនាទីយ៉ាងសំខាន់ក្នុងការ ការពារផលប្រយោជន៍ស្របច្បាប់ របស់កសិករ ក្នុងករណីមានការរំលោភបំពាន ឬការទិញទំនិញបង្ខិតបង្ខំលើកសិករពីសំណាក់ឈ្មួញកណ្តាល ឬភាគីពាក់ព័ន្ធមួយចំនួន។

ការលើកទឹកចិត្ត និងសារសំខាន់របស់កសិករ។

ជាចុងបញ្ចប់នៃកម្មវិធី ឯកឧត្តមបណ្ឌិតប្រធានបានអំពាវនាវ និង លើកទឹកចិត្តដល់បងប្អូនកសិករទាំងអស់នៅស្រុកទឹកផុស សូមចូលរួមជាមួយ “សមាគមបណ្តាញកសិករតេជោ” ដើម្បីទទួលបាននូវ ការគាំពារ ការការពារ និងព័ត៌មានគ្រប់ជ្រុងជ្រោយ អំពីទីផ្សារ ឥណទាន និងបច្ចេកទេស។

ឯកឧត្តមបណ្ឌិតមានប្រសាសន៍គួរឲ្យកត់សម្គាល់ថា”កសិករជាឆ្នាំងបាយរបស់ប្រទេសជាតិ និងរបស់ពិភពលោក ដែលមិនអាចខ្វះបាន។” ប្រសាសន៍នេះបានឆ្លុះបញ្ចាំងពីតម្លៃដ៏មហិមារបស់កសិករ ដែលជាសសរស្ដម្ភនៃសន្តិសុខស្បៀងជាតិ និងសកលលោក ព្រម ទាំងបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលចំពោះវិស័យកសិកម្ម។

សូមចូលរួមជាមួយបណ្តាញកសិករតេជោដើម្បីភាពរីកចម្រើន!