អំពូលសូឡាចំនួន៦១៤ដើម ជាអំណោយរបស់ដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុនី្ន ហ៊ុនម៉ាណែត តាមរយៈ ឯកឧត្តមបណ្ឌិត អ៊ាង សុផល្លែត បានប្រគល់ជូនប្រជាពលរដ្ឋខេត្តត្បូងឃ្មុំ ដើម្បីសម្រួលការធ្វើដំណើរ ធានាសុវត្ថិភាព និង សន្តិសុខពេលរាត្រី អបអរឱកាសពិធីបុណ្យភ្ជុំបិណ្ឌខាងមុខនេះ

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានក្រុមការរាជរដ្ឋាភិបាលចុះមូលដ្ឋានខេត្តត្បូងឃ្មុំ និងជាប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានស្រុកអូររាំងឪ ពញាក្រែក និងត្បូងឃ្មុំ និងមានការអញ្ជេីញចូលរួមពី ឯកឧត្តម ប៉ែន កុសល្យ អភិបាលនៃគណ:អភិបាលខេត្តត្បូងឃ្មុំ ព្រមទាំងប្រតិភូក្រសួងបរិស្ថាន និងអាជ្ញាធរមូលដ្ឋាន បានអញ្ជើញជាអធិបតីក្នុងពិធីសំណេះសំណាលជាមួយសិស្សានុសិស្ស និងប្រជាពលរដ្ឋ នៅវិទ្យាល័យ ហេង សំរិនចក និងពិធីដាំបង្គោលសូឡាតាមបណ្តោយផ្លូវ៣៧០ ក្នុងស្រុកអូររាំងឪ ខេត្តត្បូងឃ្មុំ ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុនី្ន ហ៊ុនម៉ាណែត។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានក្រុមការរាជរដ្ឋាភិបាលចុះមូលដ្ឋានខេត្តត្បូងឃ្មុំ និងជាប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានស្រុកអូររាំងឪ ពញាក្រែក និងត្បូងឃ្មុំ បានមានប្រសាសន៍ថា បន្ថែមទៅលើសមិទ្ធផលជាច្រើន ដែលរាជរដ្ឋាភិបាលកម្ពុជាបានប្រគល់ជូនប្រជាពលរដ្ឋស្រុកត្បូងឃ្មុំនាពេលកន្លងមក នៅក្នុងឱកាសអបអរសាទរពិធីបុណ្យភ្ជុំបិណ្ឌនេះ ដើម្បីជាគិតគូរបន្ថែម ពីសុខសុវត្ថិភាព ប្រជាពលរដ្ឋក្នុងការធ្វើដំណើរផង និងការលើកកម្ពស់ជីវភាពរបស់ប្រជាពលរដ្ឋ តាមរយៈតម្រូវការដឹកកសិផលនានា ទៅកាន់ទីផ្សារនៅពេលព្រលឹមស្រាងៗផង និងពេលរាត្រីផង សម្តេចមហាបវរធិបតីហ៊ុន ម៉ាណែត និងលោកជំទាវបណ្ឌិត ពេជ ចន្ទមុនី្ន ហ៊ុនម៉ាណែត បានប្រគល់អំពូលសូឡាចំនួន៦១៤ដើម តាមរយៈ ឯកឧត្តមបណ្ឌិតជូនប្រជាពលរដ្ឋយើង ដូចនេះសូមប្រជាពលរដ្ឋចូលរួមថែរក្សាការពារទាំងអស់គ្នា ជាពិសេសសូមបន្តវប្បធម៌ ស្អាត និង បៃតង លម្អ ជាមួយសម្រស់អំពូលសូឡា នៅក្នុងភូមិយើង សហគមន៍យើង។

គួរបញ្ជាក់ថា សម្រាប់ការដាក់អំពូលសូឡាបំភ្លឺតាមដងផ្លូវកៅស៊ូលេខ៣៧០ ដែលមានចម្ងាយប្រមាណ៣០គីឡូម៉ែត្រ គឺចាប់ផ្តើមពីផ្លូវជាតិលេខ១១ ស្រុកអូររាំងឪ ដល់ផ្លូវជាតិលេខ៧ ក្រុងសួង ឆ្លងកាត់២ស្រុក (អូររាំងឪនិងត្បូងឃ្មុំ) និង១ក្រុង(សួង) ក្នុងនោះ ស្រុកអូររាំងឪ ឆ្លងកាត់ភូមិសាស្ត្រឃុំគងជ័យ ឃុំទួលសូភី ឃុំចក និងឃុំដំរិល។ ចំពោះស្រុកត្បូងឃ្មុំឆ្លងកាត់ ឃុំជីគរ និងឃុំមង់រៀវ និងដោយឡែកក្រុងសួង ឆ្លងកាត់ សង្កាត់សួង៕