អភិបាលខេត្តមណ្ឌលគិរី អញ្ជើញកាត់បើកវិញ្ញាសារប្រឡងបាក់ឌុប ឆ្នាំសិក្សា២០២៤-២០២៥ នៅមណ្ឌលវិទ្យាល័យហ៊ុនសែនមណ្ឌលគិរី
មណ្ឌលគិរី៖ ឯកឧត្តម ថង សាវុន អភិបាលខេត្តមណ្ឌលគិរី រួមទាំងលោកស្រី កែវ សាវឿន អភិបាលរងខេត្ត លោកឧត្តមសេនីយ៍ទោ ឡោ សុខា ស្នងការដ្ឋាននគរបាលខេត្ត លោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្ត អង្គភាពប្រឆាំងអំពើពុករលួយ និងមន្រ្តីអនុរក្សជាច្រើនរូប អញ្ជើញកាត់បើកវិញ្ញាសារប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៤-២០២៥ នៅមណ្ឌលវិទ្យាល័យហ៊ុនសែនមណ្ឌលគិរី ស្ថិតនៅក្រុងសែនមនោរម្យ នាព្រឹកថ្ងៃទី២៨ ខែសីហា ឆ្នាំ២០២៥។ ហើយថ្ងៃទី១ នៃការប្រឡងបាក់ឌុប គឺដំណើរការយ៉ាងរលូន និងអាកាសធាតុអំណោយផលយ៉ាងល្អប្រសើរ។
ឯកឧត្តម ថង សាវុន អភិបាលខេត្តមណ្ឌលគិរី បានលើកទឹកចិត្តដល់ក្មួយៗ ដែលជាបេក្ខជន បេក្ខនារីទាំងអស់ ត្រូវខិតខំធ្វើឱ្យអស់លទ្ធភាព និងចូលរួមថែទាំសុខភាពឱ្យបានល្អ សម្រាកឱ្យបានគ្រប់គ្រាន់ និងជូនពរប្រឡងជាប់និទ្ទេសល្អៗទាំងអស់គ្នា។ ឯកឧត្តម បានបន្ថែមថា ការប្រឡងឆ្នាំនេះ ក៏មិនខុសប្លែកពីឆ្នាំមុនៗនោះដែរ គឺក្រសួងអប់រំ យុវជន និងកីឡា បានធ្វើការរឹតបន្តឹងដល់បេក្ខជន បេក្ខនារី ដើម្បីធ្វើយ៉ាងណាឱ្យវិស័យអប់រំនៅកម្ពុជា មានគុណភាព មានន័យថា (អ្នកចេះ គឺជាប់)។
តាមការបញ្ជាក់របស់លោក លី សាមិ ប្រធានមន្ទីរអប់រំយុវជន និងកីឡាខេត្ត បានឱ្យដឹងថា ចំពោះបេក្ខជនប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៤-២០២៥នេះ សម័យប្រឡង ២៨ សីហា ២០២៥នេះ មានបេក្ខជន បេក្ខនារីសរុបចំនួន ៧២៣នាក់ ស្រី៤០៥នាក់ ជនជាតិដើមភាគតិចចំនួន ២២៥នាក់ ស្រី ១៣៧នាក់ មាន ២មណ្ឌល ស្មើ ២៩បន្ទប់ ក្នុងនោះ មានថ្នាក់វិទ្យាសាស្រ្តសង្គម និងថ្នាកវិទ្យាសាស្រ្ត។ លោក ប្រធានមន្ទីរ បញ្ជាក់ថា រហូតមកដល់ពេលនេះ មានសិស្សអវត្តមាន ០៣នាក់ ក្នុងនោះ បេក្ខជនចំណេះដឹងទូទៅ ១នាក់ បំពេញវិជ្ជា និងស្វៃរិន ២នាក់ ហើយចំពោះការប្រឡងនេះ មានការរៀបចំតឹងរឹងដូចរៀងរាល់ឆ្នាំ ពោលគឺមានគ្រូអនុរក្សចាំឆែកឆេរលើដងខ្លួនបេក្ខជនប្រឡង គឺមុនចូលបរិវេណមណ្ឌលប្រឡង និងមុនចូលបន្ទប់ប្រឡង ដោយរឹតបន្តឹងមិនឲ្យបេក្ខជន យកសំណៅឯកសារ ព្រីយ៉ុង ឬម៉ាស៊ីនគិតលេខ ទូរស័ព្ទ ចូលក្នុងបន្ទប់ប្រឡងបានទេ។
នៅបរិវេណមណ្ឌលប្រឡង ត្រូវគេឃើញថាក្រុមសហភាពសហព័ន្ធយុវជនកម្ពុជាខេត្ត បានរៀបចំកន្លែងផ្ញើម៉ូតូដោយមិនគិតថ្លៃ ពីបេក្ខជន ដើម្បីការពារសុវត្ថិភាពលើមធ្យោបាយ ថែមទាំង មានកម្លាំងនគរបាល អាវុធហត្ថ ក្រុមគ្រូពេទ្យ ក៏ត្រូវមានវត្តមាន នៅទីនោះថែមទៀត។
សូមបញ្ជាក់ថា ចំពោះបេក្ខជន បេក្ខនារី ដែលមកពីបណ្តាស្រុក ក្នុងខេត្តមណ្ឌលគិរី ដែលត្រូវមកប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៤-២០២៥ នៅមណ្ឌលវិទ្យាល័យហ៊ុនសែនមណ្ឌលគិរី គឺមានផ្ទះសំណាក់ សណ្ឋាគារ ម៉ូតែល សរុបចំនួន ៦កន្លែង បានផ្តល់បន្ទប់ស្នាក់នៅដោយឥតគិតថ្លៃ ចំពោះគ្រួសារដែលមានបណ្ណក្រីក្រ និងបញ្ចុះតម្លៃ ដើម្បីជួយសម្រួលការលំបាកដល់បេក្ខជន បេក្ខនារីទាំងអស់៕ ស៊ីផុន ហ៊ុងគ្រី
