អង្គការសង្គមស៊ីវិលខេត្តព្រះសីហនុនិងខេត្តកោះកុង ប្តេជ្ញាគាំទ្ររាជរដ្ឋាភិបាលក្នុងការការពារបូរណភាព អធិបតេយ្យ និងឯករាជ្យភាពកម្ពុជា និងស្នើថៃឱ្យដោះលែងវីរកងទ័ពកម្ពុជាទាំង ១៨រូប ដោយឥតលក្ខខណ្ឌ
(ព្រះសីហនុ)៖ នៅព្រឹកថ្ងៃទី៤ ខែកញ្ញា ឆ្នាំ២០២៥ វេទិកាសម្ព័ន្ធសង្គមស៊ីវិល (វ.ស.ស.) បានរៀបចំវេទិកាសន្ទនាស្តីពី «កិច្ចសហប្រតិបត្តិការក្នុងភាពជាដៃគូដើម្បីពង្រឹងសមត្ថភាពអង្គការសង្គមស៊ីវិលក្នុងបរិបទថ្មី» ដែលបានប្រព្រឹត្តទៅក្រោមអធិបតីភាពឯកឧត្តម កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានក្រុមប្រឹក្សាភិបាល វ.ស.ស. និងលោក សុខ ភា អភិបាលរងនៃគណៈអភិបាលខេត្តព្រះសីហនុ តំណាងឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ដោយមានការអញ្ជើញចូលរួមពីតំណាងមកពីអង្គការ សមាគម សហគមន៍ និងសហជីព រួមទាំងមន្ទីរជំនាញមកពីខេត្តព្រះសីហនុនិងខេត្តកោះកុងជាច្រើនរូប។
ជាកិច្ចចាប់ផ្តើម លោក សុខ ភា អភិបាលរងនៃគណៈអភិបាលខេត្តព្រះសីហនុ បានថ្លែងអំណរគុណយ៉ាងជ្រាលជ្រៅចំពោះអង្គការសង្គមស៊ីវិលខេត្តព្រះសីហនុ ដែលបានចូលរួមចំណែកយ៉ាងសកម្មជាមួយរដ្ឋបាលខេត្ត ក្នុងការលើកម្ពស់ការកសាងសមត្ថភាព ការបណ្តុះបណ្តាលធនធានមនុស្ស និងការអភិវឌ្ឍសេដ្ឋកិច្ចសង្គម ដើម្បីភាពសុខសាន្តនិងគុណភាពជីវិតរបស់ប្រជាពលរដ្ឋ ជាពិសេសចូលរួមអភិវឌ្ឍខេត្តព្រះសីហនុឱ្យមានការរីកចម្រើនបន្ថែមទៀត ស្របតាមគោលនយោបាយរបស់រាជរដ្ឋាភិបាល ដើម្បីប្រែក្លាយខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូពហុបំណង។ លោកក៏បានលើកទឹកចិត្តឱ្យអង្គការសង្គមស៊ីវិលបន្តធ្វើសកម្មភាពរបស់ខ្លួន ដោយគោរពអនុវត្តច្បាប់ឱ្យបានខ្ជាប់ខ្ជួន និងបង្កើនកិច្ចសហប្រតិបត្តិការជិតស្និទ្ធជាមួយក្រសួងស្ថាប័នថ្នាក់ជាតិ មន្ទីរ-អង្គភាព និងអាជ្ញាធរថ្នាក់ក្រោមជាតិ។
ថ្លែងក្នុងអង្គវេទិកាសន្ទនានាព្រឹកនេះ ឯកឧត្តមប្រធានក្រុមប្រឹក្សាភិបាល វ.ស.ស. បានកោតសរសើរនិងវាយតម្លៃខ្ពស់ចំពោះកិច្ចសហការល្អរវាងអាជ្ញាធរមូលដ្ឋាននិងអង្គការសង្គមស៊ីវិល ទាំងក្នុងខេត្តព្រះសីហនុនិងខេត្តកោះកុង ក្នុងការជំរុញការអភិវឌ្ឍសេដ្ឋកិច្ច-សង្គមនៅថ្នាក់មូលដ្ឋាន ដើម្បីលើកកម្ពស់ជីវភាពនិងសុខុមាលភាពប្រជាពលរដ្ឋ។
ឯកឧត្តមបានលើកទឹកចិត្តឱ្យអង្គការសង្គមស៊ីវិលបន្តយកចិត្តទុកដាក់ខ្ពស់ និងចូលរួមអភិវឌ្ឍសង្គមជាតិឱ្យកាន់តែរីកចម្រើនថែមទៀត ស្របតាមចក្ខុវិស័យនិងគោលនយោបាយអភិវឌ្ឍន៍របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ជាងនេះទៀត ដើម្បីបង្ហាញអំពីតម្លាភាព សុចរិតភាព និងការបង្កើនទំនុកចិត្តពីសំណាក់សាធារណជននិងម្ចាស់ជំនួយ ឯកឧត្តមបានលើកទឹកចិត្តឱ្យអង្គការសង្គមស៊ីវិលបន្តគោរពច្បាប់ជាធរមាន ដើម្បីបន្តថែរក្សាសុខសន្តិភាព ស្ថិរភាពយូរអង្វែង និងការអភិវឌ្ឍដោយចីរភាព។ ចំពោះស្ថានភាពជម្លោះព្រំដែនកម្ពុជា-ថៃនាពេលបច្ចុប្បន្ន ឯកឧត្តមក៏បានជំរុញឱ្យអង្គការសង្គមស៊ីវិលត្រូវតែបន្តស្មារតីរួមសាមគ្គី និងបង្កើនស្មារតីស្នេហាជាតិ ព្រមទាំងជឿជាក់ចំពោះការដោះស្រាយបញ្ហាព្រំដែនរបស់រាជរដ្ឋាភិបាល តាមរយៈយន្ដការការទូត និងសន្ដិវិធី ដើម្បីលើកស្ទួយកិត្យានុភាពជាតិ និងឧត្តមប្រយោជន៍ជាតិ។
ឆ្លៀតក្នុងឱកាសនេះ អង្គការសង្គមស៊ីវិលខេត្តព្រះសីហនុនិងខេត្តកោះកុង បានបង្ហាញស្មារតីសាមគ្គីជាធ្លុងមួយ ដោយបានចេញញត្តិគាំទ្រយ៉ាងពេញទំហឹងចំពោះការដឹកនាំរបស់រាជរដ្ឋាភិបាល ក្រោមមគ្គុទ្ទេសក៍ដឹកនាំរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងបុព្វហេតុការពារអធិបតេយ្យ និងបូរណភាពទឹកដី។
អង្គការសង្គមស៊ីវិលដែលបានចូលរួមអង្គវេទិកានាព្រឹកមិញនេះ ក៏បានប្រកាសថ្កោលទោសយ៉ាងដាច់អហង្ការចំពោះឧក្រិដ្ឋកម្មសង្គ្រាម និងអំពើឈ្លានពាន យ៉ាងគឃ្លើនពីសំណាក់កងទ័ពថៃមកលើបូរណភាពទឹកដីកម្ពុជា ដែលនេះជាការរំលោភបំពានលើធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្ដរជាតិពាក់ព័ន្ធ។
អង្គការសង្គមស៊ីវិលទាំងពីរខេត្តនេះក៏បានអំពាវនាវយ៉ាងទទូចដល់បណ្តាប្រទេសមហាអំណាច និងសហគមន៍អន្តរជាតិនានា ជួយអន្ដរាគមន៍ជំរុញឱ្យរដ្ឋាភិបាលនិងយោធាថៃគោរពអនុវត្តបទឈប់បាញ់ ដែលជាការធានាសន្តិភាពយូរអង្វែងនៅតំបន់ព្រំដែនកម្ពុជា-ថៃ និងជាការរួមចំណែកថែរក្សាសុខសន្តិភាព ស្ថិរភាព វឌ្ឍនភាព និងវិបុលភាពក្នុងតំបន់ ព្រមទាំងដោះលែងដោយឥតលក្ខខណ្ឌនូវវីរកងទ័ពកម្ពុជាទាំង ១៨រូប ដែលត្រូវបានកងទាហានថៃចាប់ខ្លួនដោយខុសច្បាប់ និងជាការរំលោភបំពានលើបទឈប់បាញ់ កាលពីវេលាព្រឹកថ្ងៃទី២៩ ខែកក្កដា ឆ្នាំ២០២៥។
