ឡើងកំដៅដូច Heat Wave នៅអឹរ៉ុប! សង្រ្គាមប៉ាគីស្ថាន-អាហ្វហ្កានីស្ថានអាចនឹងកើតឡើងទៀតទេ? ក្រោយពីកងកម្លាំងប៉ាគីស្ថានសម្លាប់ជនស៊ីវិលអាហ្វហ្គានីស្ថាន៣៦នាក់ដែលគ្រប់គ្រងដោយតាលីបង់
ការវាយប្រហារតាមអាកាសពេញមួយយប់មិញ និងប្រតិបត្តិការលើដីដោយកងកម្លាំងប៉ាគីស្ថានបានសម្លាប់ជនស៊ីវិលយ៉ាងហោចណាស់ ៣៦ នាក់ និងរបួសជាង ១៦០ នាក់ផ្សេងទៀត នេះបើយោងតាមមន្ត្រីអាហ្វហ្គានីស្ថានបាននៅថ្ងៃចន្ទនេះ ខណៈដែលភាពតានតឹងរវាងប្រទេសជិតខាងប៉ាគីស្ដាន និង អហ្វាហ្កានីស្ថានកំពុងបាននឹងឡើងកម្តៅដូចរលកកំដៅនៅទ្វីបអឺរ៉ុបដែរ។ មន្ត្រីអាហ្វហ្គានីស្ថានម្នាក់បាននិយាយថា ការវាយប្រហារទាំងនោះ នឹងត្រូវបានឆ្លើយតបដោយការសងសឹកក្នុងពេលឆាប់ខាងមុខ។ កងកម្លាំងសន្តិសុខប៉ាគីស្ថានបានធ្វើប្រតិបត្តិការលើដីតាមបណ្តោយព្រំដែនប៉ាគីស្ថាន-អាហ្វហ្គានីស្ថានកាលពីល្ងាចថ្ងៃអាទិត្យនេះ បន្ទាប់មកក៏មានការវាយប្រហារប្រឆាំងនឹងកន្លែងលាក់ខ្លួនរបស់ពួកសកម្មប្រយុទ្ធ និងកន្លែងសុវត្ថិភាពរបស់ពួកគេ ដោយបានសម្លាប់ពួកយុទ្ធជនសកម្មចំនួន២៩នាក់ នេះបើយោងតាមរដ្ឋមន្ត្រីក្រសួងព័ត៌មានប៉ាគីស្ថាន លោក Attaullah Tarar។ ចំណែកភាគីប៉ាគីស្ថានបាននិយាយថា ប្រតិបត្តិការនេះត្រូវបានចាប់ផ្តើមដើម្បីឆ្លើយតបទៅនឹងការវាយប្រហាររបស់ពួកសកម្មប្រយុទ្ធជាច្រើនទៀតនៅទូទាំងប្រទេសប៉ាគីស្ថាន។ អាហ្វហ្គានីស្ថានបានថ្កោលទោសការវាយប្រហារទាំងនោះថាជា “ទង្វើដ៏កំសាកនៃការឈ្លានពាន” និង “ជាទង្វើដ៏ឃោរឃៅលើជនស៊ីវិល”។ លោក Hamdullah Fitrat អ្នកនាំពាក្យរងរបស់រដ្ឋាភិបាលតាលីបង់ដែលកំពុងគ្រប់គ្រងអាហ្វហ្គានីស្ថានបាននិយាយថា កងកម្លាំងប៉ាគីស្ថានបានកំណត់គោលដៅលើផ្ទះមួយខ្នងនៅក្នុងស្រុក Chamkani ខេត្ត Paktia ដោយបានសម្លាប់បុរសវ័យចំណាស់ម្នាក់ និងកុមារម្នាក់ ខណៈដែលសមាជិកគ្រួសារផ្សេងទៀតបានរងរបួស។ នៅពេលដែលអ្នកស្រុកបានប្រមូលផ្តុំគ្នាដើម្បីជួយសង្គ្រោះមនុស្ស ស្រាប់តែតំបន់នោះត្រូវបានវាយប្រហារជាថ្មីម្តងទៀត ដោយបានសម្លាប់អ្នកភូមិចំនួន ២៨ នាក់ និងរបួស ១៥៨ នាក់។ លោកបាននិយាយថា មនុស្ស៦នាក់ ដែលភាគច្រើនជាស្ត្រី និងកុមារ ត្រូវសម្លាប់នៅក្នុងភូមិមួយក្នុងស្រុក Giyan ខេត្ត Paktika នៅពេលដែលផ្ទះមួយខ្នងទៀតត្រូវបានវាយប្រហារដែរ។ ផ្ទះជនស៊ីវិលមួយខ្នងក្នុងខេត្ត Kunar ក៏ត្រូវបានវាយប្រហារ ប៉ុន្តែមិនបង្កឲ្យមានអ្នករងរបួសទេ គ្រាន់តែបានសម្លាប់សត្វពាហនៈអស់ប្រហែល៣០ក្បាល។ ប្រតិបត្តិការសន្តិសុខប៉ាគីស្ថានបានកើតឡើងបន្ទាប់ពីការវាយប្រហាររបស់ក្រុមសកម្មប្រយុទ្ធដែលកំណត់គោលដៅទីស្នាក់ការតំបន់របស់កងកម្លាំងប្រដាប់អាវុធនៅក្នុងទីក្រុង Karachi ដែលបានសម្លាប់ទាហានបីនាក់។ កងកម្លាំងសន្តិសុខបានសម្លាប់អ្នកវាយប្រហារ៣នាក់ និងចាប់ខ្លួនអ្នកវាយប្រហារម្នាក់ទៀត ដែលយោធាបានកំណត់អត្តសញ្ញាណថាជាជនជាតិអាហ្វហ្គានីស្ថានម្នាក់ដែលស្ថិតក្នុងស្ថានភាពមានរបួស។ អង្គការ Jamaat-ul-Ahrar បានអះអាងពីការទទួលខុសត្រូវចំពោះការវាយប្រហារនៅក្នុងទីក្រុង Karachi ដូចគ្នា៕
សម្រួលអត្ថបទ៖ សុផារិន្ទ
