រដ្ឋមន្រ្តីសុខាភិបាល÷ ណែនាំដល់ថ្នាក់ដឹកនាំមន្ទីរពេទ្យគ្រប់ឋានានុក្រម «ត្រូវបន្តផ្តោតសំខាន់ខ្ពស់លើសុវត្ថិភាពអ្នកជំងឺ»

រដ្ឋមន្រ្តីសុខាភិបាល÷ ណែនាំដល់ថ្នាក់ដឹកនាំមន្ទីរពេទ្យគ្រប់ឋានានុក្រម «ត្រូវបន្តផ្តោតសំខាន់ខ្ពស់លើសុវត្ថិភាពអ្នកជំងឺ»

____

រាជធានីភ្នំពេញ៖ ថ្លែងថែមទៀតនោះ ឯកឧត្តមសាស្រ្តាចារ្យរដ្ឋមន្ត្រីសុខាភិបាល ឈាងរ៉ា បានសង្កត់ធ្ងន់លើការងារសំខាន់ៗ ចំពោះមុខជាអាទិភាព ដោយត្រូវបន្តការយកចិត្តទុកលើការងារនៅតាមបណ្តោព្រំដែន ទឹកជំនន់និងជំងឺឆ្លងនានា ដែលត្រូវបង្កើនប្រុងប្រយ័ត្ន និងត្រៀមលក្ខណៈឱ្យបានគ្រប់ជ្រុងជ្រោយ និងត្រូវតាមដានគ្រប់សភាពការណ៍ ដើម្បីឆ្លើយតបបានរហ័សទាន់ពេលវេលា។ ឯកឧត្តមសាស្រ្តាចារ្យ បានបន្ថែមថា ក្នុងអំឡុងពេលនេះ នៅតាមតំបន់ដែលអាចនឹងប្រឈមការជន់លិច ត្រូវបង្កើនការណែនាំ និងអប់រំសុខភាពដល់ប្រជាជន ដើម្បីបង្ការការខ្លួនពីជំងឺផ្សេងៗ សត្វដែលមានពិស និងត្រូវគេងក្នុងមុងដើម្បីចៀសវាងពីជំងឺគ្រុនឈាមជាដើម។

ឯកឧត្តមសាស្រ្តាចារ្យរដ្ឋមន្រ្តី បានណែនាំដល់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត បង្កើនការយកចិត្តទុកដាក់ឱ្យកាន់តែសសាក់សស្រាំលើការអប់រំសុខភាព បាញ់ថ្នាំមូស ដើម្បីទប់ស្កាត់ជំងឺគ្រុនឈាម ក្នុងអំឡុងពេលរដូវវស្សានេះ។

ឯកឧត្តមសាស្រ្តាចារ្យ ក៏បានផ្តល់អនុសាសន៍ដល់ថ្នាក់ដឹកនាំមន្ទីរពេទ្យជាតិ មន្ទីរសុខាភិបាលរាជធានីខេត្ត មន្ទីរពេទ្យគ្រប់កម្រិត ត្រូវរៀបចំត្រៀមលក្ខណៈគ្រប់ពេលវេលា ដោយសហការគ្នាឱ្យបានជិតស្និត និងអាចទំនាក់ទំនងគ្នាគ្រប់ពេលវេលា ជាពិសេសនៅក្នុងពិធីបុណ្យជាតិនានាខាងមុននេះ។

ឯកឧត្តមសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំ និងអង្គភាពទាំងអស់ ត្រូវបន្តពង្រឹងលើការងារបណ្តុះបណ្តាល គ្រប់គ្រងឱសថ និងកិច្ចសហការជាមួយដៃគូ និងអន្តរក្រសួងស្ថាប័ន និងជាពិសេសការងារឆ្លើយតបនឹងគ្រោះមហន្តរាយ។

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល មានប្រសាសន៍បែបនេះក្នុងឱកាសអញ្ជើញដឹកនាំកិច្ចប្រជុំកម្រិតថ្នាក់ដឹកនាំលើកទី១ នៃខែតុលា ឆ្នាំ២០២៥ ដើម្បីពិនិត្យវឌ្ឍនភាពការងារ និងលើកទិសដៅការងារបន្តនៅទីស្ដីការក្រសួងសុខាភិបាល នារសៀលថ្ងៃទី៦ ខែតុលា  ដែលមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គនាយករង និងគ្រប់ប្រធានអង្គភាពថ្នាក់កណ្តាលក្រោមឱវាទក្រសួងសុខាភិបាល ប្រធានមន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត៕