រដ្ឋបាលខេត្តព្រះសីហនុ ជួបពិភាក្សាការងារជាមួយអគ្គកុងស៊ុលចិន ដើម្បីពង្រឹងកិច្ចសហប្រតិបត្តិការ និងការវិនិយោគ

ខេត្តព្រះសីហនុ៖ កាលពីថ្ងៃទី៧ ខែមេសា ឆ្នាំ២០២៦ លោក សាមុត សុធារិទ្ធ អភិបាលរងខេត្ត តំណាង ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានអញ្ជើញទទួលជួបពិភាក្សាការងារជាមួយ លោកអគ្គកុងស៊ុលចិន ប្រចាំខេត្តព្រះសីហនុ ដើម្បីពង្រឹងចំណង មិត្តភាព និងជំរុញវិស័យសេដ្ឋកិច្ចរវាងភាគីទាំងពីរដែលស្ថិតនៅ សាលប្រជុំប្រជាជន សង្កាត់លេខ១ ក្រុងព្រះសីហនុ ខេត្តព្រះសីហនុ។

ក្នុងជំនួបប្រកបដោយភាពមស្និទ្ធស្នាលនេះ ភាគីទាំងពីរបានលើកឡើងនូវចំណុចសំខាន់ៗមួយចំនួនដែលជាប្រយោជន៍ដល់ការអភិវឌ្ឍខេត្ត រួមមាន៖

•  ការបង្កើនកិច្ចសហប្រតិបត្តិការ ការបន្តពង្រឹងទំនាក់ទំនង “មិត្តភាពដែកថែប” រវាងកម្ពុជា និងចិន ជាពិសេសការផ្សារភ្ជាប់រវាងរដ្ឋបាលខេត្តព្រះសីហនុ ជាមួយបណ្តាខេត្ត និងក្រុងនានារបស់ប្រទេសចិន។

•  ការជំរុញការវិនិយោគ និងពាណិជ្ជកម្ម ពិភាក្សាអំពីឱកាសវិនិយោគថ្មីៗក្នុងតំបន់សេដ្ឋកិច្ចពិសេស និងការទាក់ទាញអ្នកវិនិយោគចិនបន្ថែមទៀតមកកាន់ខេត្តព្រះសីហនុ ដែលជាប៉ូលសេដ្ឋកិច្ចដ៏សំខាន់របស់កម្ពុជា។

•  សន្តិសុខ និងសុវត្ថិភាពទេសចរ ការយកចិត្តទុកដាក់លើសុវត្ថិភាពរបស់អ្នកវិនិយោគ និងភ្ញៀវទេសចរចិនដែលមកកម្សាន្ត និងស្នាក់នៅក្នុងខេត្ត ដើម្បីបង្កើនទំនុកចិត្ត និងការរីកចម្រើននៃវិស័យទេសចរណ៍។

•  ការផ្លាស់ប្តូរវប្បធម៌ និងអប់រំ ការពិភាក្សាលើការផ្តល់អាហារូបករណ៍ និងការបណ្តុះបណ្តាលជំនាញបច្ចេកទេសដល់យុវជនក្នុងខេត្ត។

លោក សាមុត សុធារិទ្ធ ក៏បានបន្តរទៀតថា “ខេត្តព្រះសីហនុ តែងតែស្វាគមន៍ និងផ្តល់កិច្ចសហការយ៉ាងពេញទំហឹងចំពោះរាល់គម្រោងវិនិយោគដែលស្របតាមច្បាប់ និងផ្តល់ផលប្រយោជន៍ដល់ប្រជាពលរដ្ឋក្នុងតំបន់។” 

ជាការឆ្លើយតប លោកអគ្គកុងស៊ុលចិន បានសម្តែងនូវការអរគុណចំពោះរដ្ឋបាលខេត្តព្រះសីហនុ ដែលតែងតែសម្របសម្រួល និងគាំទ្រដល់ការរស់នៅ ក៏ដូចជាការប្រកបអាជីវកម្មរបស់ជនជាតិចិនក្នុងខេត្ត។ លោកក៏បានបញ្ជាក់ពីការប្តេជ្ញាចិត្តក្នុងការបន្តផ្សព្វផ្សាយពីសក្តានុពលរបស់ខេត្តព្រះសីហនុ ទៅកាន់ពិភពលោក ដើម្បីទាក់ទាញអ្នកវិនិយោគដែលមានគុណភាពបន្ថែមទៀត។

ជំនួបនេះបានបញ្ចប់ទៅក្រោមបរិយាកាសរីករាយ និងមានផ្លែផ្កា ដែលនេះសបញ្ជាក់ឱ្យឃើញពីការបន្តយកចិត្តទុកដាក់ខ្ពស់របស់រដ្ឋបាលខេត្តព្រះសីហនុ ក្នុងការអភិវឌ្ឍខេត្តឱ្យក្លាយជាតំបន់សេដ្ឋកិច្ចគំរូពហុបំណង ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា៕

អត្ថបទ៖ ស្រីមុំ