មន្ត្រីកម្ពុជាទទួលចំណេះដឹងពីការប្រឆាំងនឹងការជួញដូរគ្រឿងញៀនខុសច្បាប់ នៅទីក្រុង Palasamudran

(ឥណ្ឌា )៖ ឯកឧត្តម សំរិត ជេដ្ឋាភិរម្យ អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ប្រាប់ឲ្យដឹងបែបនេះក្រោយលោកបានដឹកនាំមន្ត្រីកម្ពុជាវ័យក្មេងចំនួន ២០រូប ទៅចូលរួមវគ្គបណ្តុះបណ្តាលស្តីពីការប្រឆាំងនឹងការជួញដូរគ្រឿងញៀនខុសច្បាប់នៅទីក្រុង Palasamudran ប្រទេសឥណ្ឌា ពីថ្ងៃទី១៨ ខែសីហា ដល់ថ្ងៃទី២៩ ខែសីហា ឆ្នាំ២០២៥។ 

ឯកឧត្តម សំរិត ជេដ្ឋាភិរម្យ អគ្គលេខាធិការរង បានជម្រាបឲ្យដឹងថា វគ្គបណ្តុះបណ្តាលស្តីពីការប្រឆាំងនឹងការជួញដូរគ្រឿងញៀនខុសច្បាប់ ដែលជាជំនួយឧបត្ថម្ភគាំទ្រពីរដ្ឋាភិបាលសាធារណរដ្ឋឥណ្ឌា បានផ្ដល់ចំណេះដឹងយ៉ាងច្រើនពាក់ព័ន្ធនឹងការងារប្រយុទ្ធប្រឆាំងគ្រឿងញៀនតាមរយៈការចែករំលែកចំណេះដឹង មានជាអាទិ៍ ការចែករំលែកពីស្ថានភាពគ្រឿងញៀន ផលប៉ះពាល់ ច្បាប់  និន្នាការនៃការជួញដូរខុសច្បាប់  វិធីសាស្ត្រ​និង​បច្ចេកទេស​នៃ​ការ​រត់ពន្ធ​គ្រឿងញៀន ការអន្តរាគន៍ ភាពវៃឆ្លាត និងហានិភ័យករណីសិក្សាស្តីពីអន្តរការី និងការវិភាគតាមដានឌីជីថល & ការស៊ើបអង្កេតមូលដ្ឋានគ្រឹះការធ្វើកោសល្យវិច្ច័យឌីជីថល និងការគ្រប់គ្រងភស្តុតាង ការតាមដាននិងការរឹបអូសទ្រព្យសម្បត្តិ ការស៊ើបអង្កេតហិរញ្ញវត្ថុក្នុងសំណុំរឿងគ្រឿងញៀន និន្នាការនៃការជួញដូរខុសច្បាប់ សារធាតុសកម្មផ្លូវចិត្តថ្មី (NPS) និងការជួញដូរគ្រឿងញៀនតាមអ៊ីនធឺណិត  ការដោះស្រាយបញ្ហាដោយពិចារណាអំពីសីលធម៌ និងសិទ្ធិមនុស្សក្នុងការអនុវត្តករណីគ្រឿងញៀន ការប្រមូល និងរក្សាទុកភស្តុតាង កិច្ចសហប្រតិបត្តិការអន្តរជាតិក្នុងការស៊ើបអង្កេតហិរញ្ញវត្ថុនិងយន្តការសម្របសម្រួលឆ្លងកាត់ព្រំដែន ការជួញដូរគ្រឿងញៀនតាមបច្ចេកវិទ្យា ទស្សនកិច្ចសិក្សា ករណីសិក្សា ។ល។ កម្ពុជាបានចែករម្លែកការយល់ដឹងពីបញ្ហាគ្រឿងញៀន អត្ថប្រយោជន៍កម្មវិធី App NoDrug ផងដែរ ។ 

ថ្លែងក្នុងនាម ឯកឧត្តម នាយឧត្តមសេនីយ៍ មាស វិរិទ្ធអគ្គលេខាធិការ ក្នុងឱកាសនោះ ឯកឧត្តម សំរិត ជេដ្ឋាភិរម្យ បានពាំនាំនូវការថ្លែងអំណរគុណពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជូនភាគីមិត្តឥណ្ឌាដែលបានជួយបណ្ដុះបណ្ដាលមន្ត្រីកម្ពុជាឲ្យទទួលបាននូវចំណេះដឹងបន្ថែមលើការងារប្រយុទ្ធប្រឆាំងគ្រឿងញៀនសំដៅពង្រឹងបាននូវប្រសិទ្ធភាពការងារប្រយុទ្ធប្រឆាំងគ្រឿងញៀននៅកម្ពុជាក៏ដូចជាអាចចូលរួមជាមួយនឹងយន្តការតំបន់ សកលោកក្នុងការបង្ការ ទប់ស្កាត់ បង្ក្រាបបទល្មើសគ្រឿងញៀនឆ្លងដែន។ 

សូមបញ្ជាក់ថា  វគ្គបណ្តុះបណ្តាលមានរយៈពេល១២ថ្ងៃ នេះគឺមានប្រទេសចំនួន២០ ចូលរួម ៖ Cambodia , India, Chad, Djibouti, Jordan, Egypt, Eswatini, Ethiopia, Fiji, Kiribati, Liberia, Nigeria, Zimbabwe, Sierra Leone, Gambia, South Sudan, Tanzania, Sri Lanka, Algeria និង Iraq ។