ប៉េកាំង:ថ្ងៃ ទី២៩ សីហា ២០២៥ មន្រ្តីក្រសួងព័ត៌មាន២៥រូបបានទៅទស្សនកិច្ចតំបន់ប្រវតិ្តសាស្រ្ត និងវប្បធម៌ដ៏ល្បីគឺ ព្រះវិហារឋានសួគ៌ ជាទីកន្លែងដែលស្តេចនៃរាជវង្សមីង និងរាជវង្សឈីង ថ្វាយយញ្ញបូជាដល់ ឋានសួគ៌ និងបួងសួងសុំឱ្យទទួលបានផលច្រើនល្អ មានទំហំផ្ទៃដីសរុប ២៧៣ ហិចតា។ ព្រះវិហារ ចែកចេញជា២ផ្នែកធំៗដោយជញ្ជាំង គឺអាសនៈខាងក្នុង និងអាសនៈខាងក្រៅ។ ជញ្ជាំងខាងជើង គឺជារាងរង្វង់ជានិមិត្តរូបផ្ទៃមេឃ ចំណែកជញ្ជាំងខាងត្បូងមានរាងការ៉េជានិមិត្តរូបផែនដី ហើយ រួមគ្នាតំណាងឲ្យពិភពលោក។ សំណង់នៃព្រះវិហារភាគច្រើនស្ថិតនៅអាសនៈខាងក្នុង ដែល ត្រូវ បានបែងចែកជាពីរផ្នែកដោយជញ្ជាំង៖ ផ្នែកខាងជើងគឺអាសនៈQigu ដែលមានអគារកណ្តាលមួយ ហៅថា Qiniandian (The Hall of Prayer for Good Harvests) គឺសម្រាប់ការអធិស្ឋាននិទាឃរដូវ ដើម្បីទទួលផលច្រើនល្អ។ ផ្នែកខាងត្បូងគឺអាសនៈរង្វង់មូល ហើយមានវេទិកាថ្មរាងជារង្វង់ដ៏ធំមួយ ស្ថិតនៅកណ្តាលហៅថា Yuangu (The Circular Mound Altar) ដែលប្រើសម្រាប់ថ្វាយយញ្ញបូជា ដល់ឋានសួគ៌នៅពេលអយនភាគនៃសិសិរដូវ(Winter Solstice)។
