ពានរង្វាន់ Vattanac Legends Championship Legacy Edition 2025 អមជាមួយប្រាក់រង្វាន់ចំនួន ៨៨,៩២០ម៉ឺន$ បានរកឃើញម្ចាស់ជ័យលេភីហើយ…

ក្រុមហ៊ុន វឌ្ឍនៈគ្រុប និង Vattanac Golf Resort បានរៀបចំពិធីប្រគល់ពានរង្វាន់ Vattanac Legends Championship Legacy Edition 2025 ក្រោមអធិបតីភាព អ្នកឧកញ៉ា សំអាង និង អ្នកឧកញ៉ា ឈុន លាង សហស្ថាបនិកក្រុមហ៊ុនវឌ្ឍនៈគ្រុប និង អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ គ្រុប នៅថ្ងៃទី ២៨ ខែវិច្ឆិកា ឆ្នាំ២០២៥ នៅវឌ្ឍនៈហ្គោរីហ្សត

អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ គ្រុប បានថ្លែងក្នុងពិធីប្រគល់ពានរង្វាន់លំដាប់ពិភពលោកជូនកីឡាករជ័យលេភីថាៈ ព្រឹត្តិការណ៍វាយកូនហ្គោលលំដាប់ពិភពលោក Vattanac Legends Championship Legacy Edition 2025 រយៈពេល ៣ថ្ងៃគឺត្រូវបានបញ្ចប់ទៅ ដោយភាពជោគជ័យ ហើយក៏ជាប្រវត្តិសាស្តថ្មីមួយដែលប្រកបដោយមោទនភាពសម្រាប់ប្រទេសកម្ពុជាដែលក្លាយជាម្ចាស់ផ្ទះលើកដំបូងសម្រាប់ការប្រកួតវាយកូនហ្គោលកម្រិតអន្តរជាតិ ដល់ទៅ ពីរ ពានរង្វាន់ធំៗ ក្នុងរយៈពេលដ៏ខ្លី ដែលរៀបចំដោយ វឌ្ឍនៈ គ្រុប ក្នុងគោលបំណងផ្សារភ្ជាប់កីឡា និងទេសចរណ៍ ជាពិសេសលើកស្ទួយវិស័យវាយកូនហ្គោលនៅប្រទេសកម្ពុជា។ អ្នកឧញ្ញ៉ាបានបន្តទៀតថា ក្នុងនាមក្រុមហ៊ុនវឌ្ឍនៈគ្រុប និង Vattanac Golf Resort ខ្ញុំពិតជាមានកិត្តិយសយ៉ាងក្រៃលែងក្នុងការស្វាគមន៍លោកអ្នកមកកាន់ពិធីប្រគល់រង្វាន់នៃការប្រកួត Vattanac Legends Championship Legacy Edition ២០២៥។ ជាលើកដំបូងក្នុងប្រវត្តិសាស្ត្រនៃការប្រកួត Legends Tour ដែលការប្រកួតនៅតែបន្តនៅក្នុងទីក្រុងដដែល សម្រាប់សប្តាហ៍ទីពីរជាប់ៗគ្នា។ ទម្រង់ប្រកួតជាប់ៗគ្នាដែលមិនធ្លាប់មានពីមុនមកនេះឆ្លុះបញ្ចាំងពីកម្រិតនៃការជឿទុកចិត្ត និងទំនុកចិត្តយ៉ាងជ្រាលជ្រៅ វាបង្ហាញពីជំនឿដែល Legends Tour មាននៅក្នុងប្រទេសកម្ពុជា លើបដិសណ្ឋារកិច្ចរបស់ប្រជាជនយើង លើសម្រស់នៃទីលានវាយកូនហ្គោល វឌ្ឍនៈហ្គោរីហ្សត និងលើវិជ្ជាជីវៈរបស់ក្រុមហ៊ុនវឌ្ឍនៈគ្រុប។ យើងមានមោទនភាពដែលទទួលបានទំនុកចិត្តនេះ ហើយយើងប្តេជ្ញាលើកកម្ពស់ស្តង់ដារឱ្យកាន់តែខ្ពស់នៅក្នុងឆ្នាំខាងមុខបន្តទៀត។ អ្នកឧញ្ញ៉ាថ្លែងបន្ថែមទៀតថា ក្នុងរយៈពេលប៉ុន្មានថ្ងៃកន្លងមកនេះ យើងបានឃើញកីឡាវាយកូនហ្គោលដ៏អស្ចារ្យលំដាប់ពិភពលោក នៅលើទឹកដីកម្ពុជា។ ព្រឹត្តិការណ៍នេះគឺជាការបំផុសគំនិតដល់កីឡាករវាយកូនហ្គោលវ័យក្មេងកម្ពុជារបស់យើង និងបង្ហាញដល់អ្នកទស្សនា និងពេលវេលាដែលមិនអាចបំភ្លេចបានសម្រាប់អ្នកចូលរួមទាំងអស់។ អ្នកឧញ្ញ៉ាក៏បានថ្លែងអំណរអគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជាចំពោះការណែនាំ និងការគាំទ្រនៃព្រឹត្តិការណ៍នេះ។ យើងមានកិត្តិយសជាពិសេសចំពោះភាពជាអ្នកដឹកនាំ និងចក្ខុវិស័យរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចមហាបវរតីតេជោ ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ សូមថ្លែងអំណរគុណចំពោះការលើកទឹកចិត្តជាបន្តបន្ទាប់ និងការយកចិត្តទុកដាក់យ៉ាងជ្រាលជ្រៅចំពោះវិនិយោគិននៅកម្ពុជា ហើយការលះបង់របស់ពួកគេចំពោះសន្តិភាព ស្ថិរភាព និងការអភិវឌ្ឍជាតិបានបង្កើតបរិយាកាសដែលអនុញ្ញាតឱ្យព្រឹត្តិការណ៍កីឡាអន្តរជាតិរីកចម្រើន នៅក្នុងព្រះរាជាណាចក្ររបស់យើង។ ខ្ញុំសូមកោតសរសើរយ៉ាងស្មោះស្ម័គ្រដល់គណៈកម្មាធិការអូឡាំពិកជាតិកម្ពុជា ក្រសួងទេសចរណ៍ សហព័ន្ធវាយកូនហ្គោលកម្ពុជា និងអាជ្ញាធរនៃរាជធានីភ្នំពេញ និងខេត្តកណ្តាល ដែលបាន សហប្រតិបត្តិការ និងមានការសម្របសម្រួល ក្នុងដំណើរការនៃការប្រកួតនេះ កិច្ចសហការណ៍នេះបានដើរតួនាទីយ៉ាងសំខាន់ម្តងទៀតក្នុងការអនុញ្ញាតឱ្យ វឌ្ឍនៈគ្រុប រៀបចំព្រឹត្តិការណ៍លំដាប់ពិភពលោកនេះបាន។ ចំពោះជើងឯកនៃការប្រកួត Vattanac Legends Championship Legacy Edition ២០២៥ ខ្ញុំសូមអបអរសាទរយ៉ាងកក់ក្តៅ និងស្មោះស្ម័គ្របំផុត ដល់ក្រុមកីឡាករទាំអស់ដែលបានចំណាយពេលវេលេដ៏មានតម្លៃ រយៈពេលជិត២សប្តាហ៍នេះនៅលើទឹកដីកម្ពុជាដែលបានបង្ហាញពីការប្រកួតយ៉ាងស្វិតស្វាញ ហើយមិនត្រឹមប៉ុណ្ណោះទេក៏បានបង្ហាញពីជំនាញលំដាប់ពិភព និងភាពស្និទ្ធស្នាល ខាងកីឡាដល់កីឡាករ និងអ្នកទស្សនានៅកម្ពុជាបានទស្សនា និងយល់ដឹងបន្ថែម។ អ្នកឧញ្ញ៉ាស្វាគមន៍ និងសង្ឃឹមថា ក្រុមកីឡាករ លំដាប់ពិភពលោកទាំងអស់របស់យើងនិងត្រឡប់មកម្តងទៀតនៅឆ្នាំខាងមុខ ដើម្បីបន្តកសាងអនុស្សាវរីយ៍ថ្មីៗ កំណត់ស្តង់ដារថ្មីៗ នៃកីឡាវាយកូនហ្គោលនៅកម្ពុជាផងដែរ៕

គួរបញ្ជាក់ផងដែរថា អ្នកឧញ្ញ៉ា ពិតជាមានមោទនភាព និងអបអរសាទរ ដល់កីឡាករអាហ្វ្រិកខាងត្បូង លោក Darren Fichardt ដែលទទួលបាននៃការគ្រងជើងឯកពានរង្វាន់ Vattanac Legends Championship Legacy Edition 2025 អមជាមួយប្រាក់រង្វាន់ចំនួន ៨៨,៩២០ម៉ឺន$ បន្ទាប់ពីឆ្លងកាត់ការប្រកួតរយៈពេល ៣ថ្ងៃ នៅទីលានវឌ្ឍនៈហ្គោរីហ្សត ចាប់ពីថ្ងៃទី២៦-២៨ ខែវិច្ឆិកានេះ ដោយរកបានពិន្ទុសរុប -19 (Under Par) នាំមុខយ៉ាងប្រកៀកប្រកិតលើកីឡាករអូស្ដ្រាលី Scott HEND ដែលរកបានត្រឹម -18 (Under Par ) តែប៉ុណ្ណោះ៕