ប្រទេសចិនប្តេជ្ញាកសាងសមុទ្រចិនខាងត្បូងទៅជា«សមុទ្រសន្តិភាព មិត្តភាព កិច្ចសហប្រតិបត្តិការ»

វិទ្យាស្ថាន Xinhua ដែលជាស្ថាប័នផ្តល់ប្រឹក្សាយោបល់មួយរបស់ប្រទេសចិន និង ជាផ្នែក Think Tank ដែលមានទំនាក់ទំនងជាមួយទីភ្នាក់ងារសារព័ត៌មាន Xinhua ដែរ បានចេញផ្សាយរបាយការណ៍មួយកាលពីថ្ងៃអាទិត្យនេះ ដោយបង្ហាញពីការប្តេជ្ញាចិត្តរបស់ប្រទេសចិន ក្នុងការកសាងសមុទ្រចិនខាងត្បូង ទៅជាសមុទ្រសន្តិភាព មិត្តភាព និងកិច្ចសហប្រតិបត្តិការ។ របាយការណ៍ដែលមានចំណងជើងថា “ការធ្វើឱ្យសមុទ្រចិនខាងត្បូងក្លាយជាសមុទ្រសន្តិភាព មិត្តភាព និងកិច្ចសហប្រតិបត្តិការ៖ ជាបេសកកម្មរបស់ចិន” ហើយបានបោះពុម្ពជាភាសាចិន និងអង់គ្លេសដោយផ្តោតសំខាន់ថា ប្រទេសចិនតែងតែជាអ្នកតស៊ូមតិ ជំរុញ និងការពារសន្តិភាព និងស្ថិរភាពនៅសមុទ្រចិនខាងត្បូងយ៉ាងខ្ជាប់ខ្ជួន។ យោងតាមរបាយការណ៍ប្រទេសចិនគឺបានរក្សាជាយូរមកហើយថា សន្តិភាព និងស្ថិរភាពនៅក្នុងដែនទឹកទាំងនេះ អាស្រ័យលើកិច្ចខិតខំប្រឹងប្រែងរួមគ្នារវាងប្រទេសចិន និងរដ្ឋជាសមាជិកនៃសមាគមប្រជាជាតិអាស៊ីអាគ្នេយ៍ (អាស៊ាន)។ តាមរយៈការជឿទុកចិត្តគ្នាយ៉ាងស៊ីជម្រៅ និងកិច្ចសហប្រតិបត្តិការលើវិស័យនយោបាយ សេដ្ឋកិច្ច និងវប្បធម៌ ភាពជាដៃគូនេះបានបង្កើតផលប្រយោជន៍ទៅវិញទៅមកយូរអង្វែង។ អាស្រ័យហេតុនេះ ប្រទេសចិនបានរំលេចចេញនូវកម្លាំងដែលអាចជឿទុកចិត្តបានសម្រាប់ការរក្សាសន្តិភាព និងស្ថិរភាពក្នុងតំបន់ ទន្ទឹមនឹងការជំរុញកិច្ចសហប្រតិបត្តិការ និងការអភិវឌ្ឍន៍នៅសមុទ្រចិនខាងត្បូង។ របាយការណ៍បានបញ្ជាក់ទៀតថា ប្រទេសចិនតែងតែប្រកាន់ខ្ជាប់នូវគោលការណ៍កសាងសមុទ្រចិនខាងត្បូងទៅជាសមុទ្រសន្តិភាព មិត្តភាព និងកិច្ចសហប្រតិបត្តិការ៖ ការពិគ្រោះយោបល់គ្នា ជាន់លើដែនសមុទ្រនេះដោយស្មើភាព សហគ្រប់គ្រងផ្អែកលើច្បាប់ កិច្ចសហប្រតិបត្តិការដែលមានផលប្រយោជន៍ទៅវិញទៅមក និងតួនាទីស្ថាបនា។ របាយការណ៍នេះបានអំពាវនាវដល់ប្រទេសចិន និងបណ្តាប្រទេសអាស៊ានដើម្បីធានាថា ដំណោះស្រាយនៃបញ្ហាសមុទ្រចិនខាងត្បូងនៅតែស្ថិតក្នុងដៃរបស់ពួកគេដដែល ដោយប្រកាន់ខ្ជាប់នូវគោលការណ៍ និងទិសដៅត្រឹមត្រូវក្នុងការដោះស្រាយបញ្ហា និងបន្តរក្សាគោលគំនិតនៃសហគមន៍សមុទ្រដែលមានអនាគតរួមគ្នា។ របាយការណ៍ក៏បានអំពាវនាវឱ្យមានកិច្ចខិតខំប្រឹងប្រែងរួមគ្នារបស់ប្រទេសចិន និងបណ្តាប្រទេសអាស៊ានក្នុងការកសាងសមុទ្រចិនខាងត្បូងទៅជាសមុទ្រសន្តិភាព មិត្តភាព និងកិច្ចសហប្រតិបត្តិការដែលផ្តល់ផលប្រយោជន៍ដល់ប្រជាជននៃប្រទេសក្នុងតំបន់ទាំងអស់ដែរ។ របាយការណ៍របស់ Think Tank បានវាយតម្លៃជាវិជ្ជមានពីអ្នកជំនាញ។ ពួកគេជឿជាក់ថា របាយការណ៍នេះបានពន្យល់យ៉ាងទូលំទូលាយនូវសមិទ្ធិផលជាក់ស្តែង ការយល់ដឹង និងមាគ៌ារបស់ប្រទេសចិនក្នុងការតស៊ូមតិសម្រាប់សមុទ្រចិនខាងត្បូងឱ្យក្លាយជាសមុទ្រនៃសន្តិភាព មិត្តភាព និងកិច្ចសហប្រតិបត្តិការ ដែលជាការរួមចំណែកសិក្សាយ៉ាងសំខាន់ក្នុងការសិក្សាអំពីបញ្ហាសមុទ្រចិនខាងត្បូង។ លោក Zhang Jie អ្នកស្រាវជ្រាវនៅបណ្ឌិត្យសភាវិទ្យាសាស្ត្រសង្គមចិនបានកត់សម្គាល់ថា របាយការណ៍នេះមិនត្រឹមតែផ្តល់នូវភាពស៊ីជម្រៅផ្នែកប្រវត្តិសាស្ត្រប៉ុណ្ណោះទេ ប៉ុន្តែថែមទាំងបានសង្ខេបពីការវិវត្តចុងក្រោយបង្អស់នៅក្នុងស្ថានភាពសមុទ្រចិនខាងត្បូងផងដែរ។ វាបានបញ្ជាក់ពីជំហរជាគោលការណ៍របស់ប្រទេសចិន និងបង្ហាញឱ្យឃើញយ៉ាងទូលំទូលាយនូវការរួមចំណែកជាវិជ្ជមានរបស់ប្រទេសចិនចំពោះសន្តិភាព និងស្ថិរភាពនៃសមុទ្រចិនខាងត្បូងដោយផ្អែកលើភាពពិតជាក់ស្តែង៕

សម្រួលអត្ថបទ៖ Borinika Sopharin Em